അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.ന്യൂഡൽഹി: പ്രായപൂർത്തിയാകാത്ത പെൺകുട്ടിയെ പൂവ് സ്വീകരിക്കാൻ നിർബന്ധിക്കുന്നത് പോക്‌സോ നിയമപ്രകാരമുള്ള കുറ്റകൃത്യമാകാമെന്ന് സുപ്രീം കോടതി. വിദ്യാർത്ഥിനിയോട് പൂക്കൾ സ്വീകരിക്കാൻ പരസ്യമായി അധ്യാപകൻ നിർബന്ധിച്ചതുമായി ബന്ധപ്പെട്ട കേസിലാണ് സുപ്രീം കോടതിയുടെ ഇടപെടൽ. ഇത്തരം കുറ്റകൃത്യങ്ങൾ പോക്‌സോ നിയമപ്രകാരം ലൈംഗികാതിക്രമമായി കണക്കാക്കുമെന്ന് കോടതി നിരീക്ഷിച്ചു.
അതേസമയം; കേസിൽ കുറ്റാരോപിതനായ അധ്യാപകൻ്റെ പദവികളെയടക്കം ബാധിക്കാനിടയുള്ളതിനാൽ തെളിവുകൾ കർശനമായി പരിശോധിക്കുന്നതിന്റെ ആവശ്യകതയും കോടതി ചൂണ്ടിക്കാട്ടി. ഇതുകൂടാതെ പെൺകുട്ടിയെ ഉപയോഗിച്ച് അധ്യാപകനെ പ്രതിയാക്കാനുള്ള നീക്കം ഇതിന് പിന്നിലുണ്ടോ എന്നതിൽ സുപ്രീം കോടതി ആശങ്ക അറിയിച്ചു.
തുടർന്ന് അധ്യാപകനെ മൂന്ന് വർഷം തടവിന് ശിക്ഷിച്ച തമിഴ്‌നാട് വിചാരണ കോടതിയുടെയും മദ്രാസ് ഹൈക്കോടതിയുടെയും വിധി ജസ്റ്റിസുമാരായ കെ.വി. വിശ്വനാഥൻ, സന്ദീപ് മേഹ്ത, ദീപങ്കർ ദത്ത എന്നിവരടങ്ങിയ ബെഞ്ച് റദ്ദാക്കി. കേസിൽ അധ്യാപകൻ്റെ നിലയും വിലയും അപകടത്തിലാകുന്നത് കണക്കിലെടുത്താണ് വിധി.
ലൈംഗികാരോപണങ്ങൾ ഉൾപ്പടെയുള്ള കേസുകളിൽ കൃത്യമായി വിധി പറയേണ്ടതിൻ്റെ ആവശ്യകത ബെഞ്ച് ചൂണ്ടിക്കാട്ടി. ഇത്തരം കുറ്റകൃത്യങ്ങൾ ഭാവിയിലുണ്ടാക്കാൻ പോകുന്ന വലിയ ഭീഷണികളെ പരിഗണിച്ച് അധ്യാപകന് ശിക്ഷ വിധിച്ച മദ്രാസ് ഹൈക്കോടതിയുടെ തീരുമാനത്തോട് പൂർണമായും യോജിക്കുന്നു. പ്രായപൂർത്തിയാകാത്ത പെൺകുട്ടിയെ അധ്യാപകൻ ഉപദ്രവിക്കുന്ന പ്രവൃത്തി ഗുരുതരമായ കുറ്റകൃത്യങ്ങളുടെ പട്ടികയിൽ ഉൾപ്പെടുന്നതാണെന്നും കോടതി ചൂണ്ടിക്കാട്ടി
