അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.
തിരുവനന്തപുരം: സംസ്ഥാനത്തെ എല്ലാ തദ്ദേശഭരണ സ്ഥാപനങ്ങളുടെയും 2024-25 സാമ്പത്തിക വർഷത്തെ വാർഷിക പദ്ധതി സമർപ്പണ അംഗീകാര നടപടികൾ പൂർത്തിയായതായി തദ്ദേശ സ്വയം ഭരണ എക്സൈസ് വകുപ്പ് മന്ത്രി എം ബി രാജേഷ് അറിയിച്ചു. 941 ഗ്രാമപഞ്ചായത്തുകൾ, 152 ബ്ലോക്ക് പഞ്ചായത്തുകൾ, 87 നഗരസഭകൾ, 14 ജില്ലാ പഞ്ചായത്തുകൾ, 6 കോർപ്പറേഷനുകൾ ഉൾപ്പെടെ 1200 തദ്ദേശഭരണ സ്ഥാപനങ്ങളുടെയും വാർഷിക പദ്ധതികളാണ് തയ്യാറായത്. ആകെ 17909.28 കോടി രൂപയുടെ 1,77,597 പദ്ധതികളാണ് വിവിധ വികസന മേഖലകളിലായി തദ്ദേശഭരണ സ്ഥാപനങ്ങൾ ഏറ്റെടുത്തിട്ടുള്ളത്.
ഉത്പാദന മേഖലയിൽ 1922.75 കോടി രൂപയുടെയും സേവന മേഖലയിൽ 11961.76 കോടി രൂപയുടെയും പശ്ചാത്തല മേഖലയിൽ 4024.76 കോടി രൂപയുടെയും പദ്ധതികളാണ് വരുന്ന സാമ്പത്തിക വർഷം ഏറ്റെടുക്കുന്നത്. സാമ്പത്തിക വർഷം ആരംഭിക്കുന്നതിന് ഒരു മാസം മുൻപ് തന്നെ പദ്ധതികള്‍ അന്തിമമാക്കി സമർപ്പിച്ച എല്ലാ തദ്ദേശ സ്വയം ഭരണ സ്ഥാപനങ്ങളെയും തദ്ദേശ സ്വയം ഭരണ എക്സൈസ് വകുപ്പ് മന്ത്രി എം ബി രാജേഷ് അഭിനന്ദിച്ചു.
പദ്ധതികള്‍ മുൻകൂട്ടി ആസൂത്രണം ചെയ്ത് നടപ്പിലാക്കുന്നതോടെ സാമ്പത്തിക വർഷത്തിന്റെ തുടക്കത്തിൽ തന്നെ പദ്ധതി നിർവഹണം ആരംഭിക്കാൻ കഴിയും. അതുവഴി സമയബന്ധിതവും കാര്യക്ഷമവുമായി പ്രവൃത്തികള്‍ പൂർത്തിയാക്കാനാവും. ജനപ്രതിനിധികളുടെയും ജീവനക്കാരുടെയും കാര്യക്ഷമമായ ഇടപെടൽ പദ്ധതി നടത്തിപ്പിലും പ്രതീക്ഷിക്കുന്നുവെന്നും മന്ത്രി പറഞ്ഞു.
ശുചിത്വ പ്രവർത്തനങ്ങള്‍ക്കാണ് പദ്ധതിയിൽ മുഖ്യ പ്രാധാന്യം നൽകിയിരിക്കുന്നത്. ശുചിത്വ പദ്ധതികള്‍ക്ക് പൊതുവായി 327.12 കോടിയും, ഖരമാലിന്യ സംസ്കരണവുമായി ബന്ധപ്പെട്ട പദ്ധതികള്‍ക്ക് 419.93 കോടിയും, ദ്രവമാലിന്യ പദ്ധതികള്‍ക്ക് 130.68 കോടിയും നീക്കിവെച്ചിട്ടുണ്ട്. ഇങ്ങനെ മാലിന്യ സംസ്കരണ മേഖലയ്ക്ക് മാത്രം 877.73 കോടി രൂപയാണ് തദ്ദേശ സ്വയം ഭരണ സ്ഥാപനങ്ങള്‍ നീക്കിവെച്ചിരിക്കുന്നത്. 633.12 കോടി രൂപയുടെ പദ്ധതികള്‍ കാർഷിക മേഖലയിലും, 6482.17 കോടി രൂപ ഭവനനിർമ്മാണത്തിനും, 715.38 കോടി വിദ്യാഭ്യാസ മേഖലയ്ക്കും, 3052.29 കോടി റോഡ്-നടപ്പാത ഉള്‍പ്പെടെയുള്ള പ്രവൃത്തികള്‍ക്കുമാണ് നീക്കിവെച്ചിരിക്കുന്നത്.
Read more :
- സിദ്ധാർഥിന്റെ മരണം : അധികൃതരുടെ വീഴ്ച പരിശോധിക്കാൻ നാലംഗ സമിതിയെ നിയോഗിച്ച് വി.സി
- കേരളത്തിൻ്റെ ‘പെരിയാർ’; ഓർമ്മകളിൽ മലയാള നാടിൻ്റെ സഹോദരൻ
- മലയാളികളുടെ മനസിൽ മണി ഇപ്പോഴും മുഴങ്ങുന്നു
- ചെങ്കടലിൽ കേബിളുകൾക്ക് തകരാർ; ഇന്റർനെറ്റ് തടസ്സം
- മൂന്നാംദിനവും റേഷൻ വിതരണം സ്തംഭിച്ചു; കുഴഞ്ഞുമറിഞ്ഞ് റേഷൻ വിതരണവും മസ്റ്ററിങ്ങും
- പുതിയ ഉൽപന്നങ്ങള് ഏപ്രില് മുതല് വിൽക്കില്ല; കെ.സി.ഡി.എഫ്
