അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.ദോഹ: വിദേശത്ത് ചികിത്സ തേടുന്നവർക്ക് സേവനങ്ങളും അനുബന്ധ വിവരങ്ങളും കൈമാറുന്നതിന് പ്രത്യേക ഓൺലൈൻ പോർട്ടൽ സ്ഥാപിച്ച് ഖത്തർ പൊതുജനാരോഗ്യ മന്ത്രാലയം. പൗരന്മാർക്ക് വിദേശരാജ്യങ്ങളിൽ ഏറ്റവും മികച്ച ചികിത്സ സേവനങ്ങൾ ഉറപ്പാക്കാനും, ചികിത്സനിലവാരം ഉയർത്താനും ലക്ഷ്യമിട്ടാണ് പുതിയ പോർട്ടൽ സജ്ജമാക്കിയത്.
ഖത്തർ നാഷനൽ ഡെവലപ്‌മെന്റ് സ്ട്രാറ്റജിയുടെ മൂന്നാം ഘട്ടത്തിന്റെ ഭാഗമായാണിത്.
വിദേശങ്ങളിൽ ചികിത്സ തേടുന്നവർന്ന് നിരവധി സേവനങ്ങൾ പോർട്ടൽ നൽകും. വിദേശ ചികിത്സ അനുമതിയുടെ ഫോളോ അപ്പ്, വിദേശത്തുള്ള രോഗിയുടെ ചികിത്സ കവറേജ്, ചികിത്സ ചെലവുകൾക്കുള്ള നഷ്ടപരിഹാരത്തുക, ചികിത്സ സമിതിയുമായി ബന്ധപ്പെട്ട പരാതി സമർപ്പിക്കൽ തുടങ്ങിയ സംവിധാനങ്ങളും പോർട്ടലിൽ ഉൾപ്പെടുത്തിയിരിക്കും.
കൂട്ടുവരുന്നവരുടെ വിശദാംശങ്ങൾ ചേർക്കുക, ടിക്കറ്റുകൾ അപ്ഗ്രേഡ് ചെയ്യൽ, ചികിത്സ തേടുന്ന രാജ്യം മാറ്റാനുള്ള സൗകര്യം, വിദേശത്ത് ചികിത്സയുമായി ബന്ധപ്പെട്ട വിവരങ്ങൾ നൽകുന്ന ബുക് ലെറ്റുകൾ, അപേക്ഷയുടെ സ്ഥിതിയും തീരുമാനങ്ങളും അറിയൽ എന്നീ സൗകര്യങ്ങളും പോർട്ടലിലുണ്ട്.
പൗരന്മാർക്ക് വിദേശത്തും സ്വദേശത്തും ലഭ്യമാക്കുന്ന സൗജന്യ ചികിത്സയും അനുബന്ധ സേവനങ്ങളും കുറ്റമറ്റതാക്കുകയും, തുടർ നടപടികൾ കൂടുതൽ ലളിതമാക്കുകയുമാണ് ഇലക്ട്രോണിക് സേവനങ്ങളിലൂടെ ലക്ഷ്യമിടുന്നതെന്ന് പൊതുജനാരോഗ്യ മന്ത്രാലയം വിദേശ ചികിത്സ വിഭാഗം മെഡിക്കൽ റിലേഷൻസ് ആൻഡ് ട്രീറ്റ്മെന്റ് ഡയറക്ടർ ഡോ. ഗാലിയ അൽ ഹറമി അറിയിച്ചു. പൗരന്മാർക്ക് വിദേശചികിത്സ നടപടികൾ എളുപ്പമാക്കാൻ പുതിയ പോർട്ടൽവഴി കഴിയുമെന്ന് എം.ഒ.പി.എച്ച് ഇഫർമേഷൻസ് സിസ്റ്റം ഡിപ്പാർട്സ് ഡയറക്ടർ സാമിറ ബഷ്റഹീൽ അറിയിച്ചു.
അന്വേഷണം വാർത്തകൾ വാട്ട്സപ്പിൽ ലഭിക്കാൻ ഇവിടെ ക്ലിക്ക് ചെയ്യൂ
