അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.ആംസ്റ്റർഡാം: മുൻ ഡച്ച് പ്രധാനമന്ത്രിക്കും ഭാര്യയ്ക്കും ദയാവധം. 1977 മുതൽ 1982 വരെ നെതർലൻഡ്‌സിനെ നയിച്ച ഡ്രീസ് വാൻ ആഖ്ത് ആണ് 93-ാം വയസിൽ ഭാര്യയുടെ കൈപിടിച്ച് മരണം വരിച്ചത്. നെതർലൻഡ്‌സിലെ ക്രിസ്റ്റ്യൻ ഡെമോക്രാറ്റ് പാർട്ടിയുടെ പ്രമുഖനായ നേതാവായിരുന്നു.
ഡ്രീസ് വാൻ ആഖ്ത് സ്ഥാപിച്ച മനുഷ്യാവകാശ സംഘടനയായ ദി റൈറ്റ്‌സ് ഫോറം ആണു മരണവിവരം പുറത്തുവിട്ടത്. ഡ്രീസും ഭാര്യ ഭാര്യ യൂജിൻ ക്രെകെൽബെർഗും സ്വയം ദയാവധം സ്വീകരിക്കാൻ തീരുമാനിക്കുകയായിരുന്നു. കഴിഞ്ഞ 70 വർഷമായി താങ്ങും തണലുമായി കൂടെയുണ്ടായിരുന്ന സഹധർമിണിയുടെ കൈപ്പിടിച്ചാണ് ഡ്രീസ് ഈ ലോകം വിട്ടുപോയതെന്ന് റൈറ്റ്‌സ് ഫോറം വാർത്താകുറിപ്പിൽ പറഞ്ഞു. ഡച്ച് നഗരമായ നിജ്‌മെഗെനിൽ ഇരുവരെയും അടക്കം ചെയ്യും. മൂന്ന് മക്കളുണ്ട് ദമ്പതികൾക്ക്.
വാർധക്യസഹജമായ അസുഖങ്ങളെ തുടർന്ന് അവശനിലയിലായിരുന്നു ഡ്രീസ് വാൻ ആഖ്തും ഭാര്യ യൂജിനും. 2019ൽ ഡ്രീസ് ഒരു ഫലസ്തീൻ ഐക്യദാർഢ്യ പരിപാടിയിൽ സംസാരിക്കവെ തലച്ചോറിൽ രക്തസ്രാവമുണ്ടായി ആശുപത്രിയിൽ പ്രവേശിപ്പിക്കുകയായിരുന്നു. ഇതിനുശേഷം പൂർണമായി സുഖം പ്രാപിക്കാനായിരുന്നില്ല. 2017ൽ ഫലസ്തീൻ-ഇസ്രായേൽ വിഷയത്തിലെ നിലപാടുമാറ്റത്തിൽ പ്രതിഷേധിച്ചാണ് അദ്ദേഹം ക്രിസ്റ്റ്യൻ ഡെമോക്രാറ്റ് പാർട്ടി വിടുന്നത്. ഇതിനുശേഷവും പുരോഗമന പക്ഷത്ത് നിലയുറപ്പിച്ച നേതാവായിരുന്നു.
1999ൽ ഇസ്രായേലിൽ നടത്തിയ സന്ദർശനത്തിനുശേഷമാണ് ഡ്രീസ് ഫലസ്തീൻ ജനതയുടെ ശക്തനായ വക്താവായി മാറിയത്. നിലപാടിനെ മാറ്റിമറിച്ച യാത്രയായാണ് ഈ സന്ദർശനത്തെ ഡ്രീസ് വിശദീകരിച്ചിരുന്നത്. 2009ലാണ് റൈറ്റ്‌സ് ഫോറത്തിനു രൂപം നൽകുന്നത്. ഫലസ്തീൻ-ഇസ്രായേൽ വിഷയത്തിൽ നീതിപൂർവവും സുസ്ഥിരവുമായ ഡച്ച്-യൂറോപ്യൻ നയം വളർത്തിക്കൊണ്ടുവരികയായിരുന്നു ഇതുവഴി ലക്ഷ്യമിട്ടിരുന്നത്.
- തൃപ്പൂണിത്തുറ തെരഞ്ഞെടുപ്പ് കേസിൽ കെ ബാബുവിന് തിരിച്ചടി; എം സ്വരാജ് നൽകിയ ഹർജി നിലനിൽക്കുമെന്ന് കോടതി
- മഹാരാഷ്ട്രയിൽ കോൺഗ്രസിന് തിരിച്ചടി; മുൻ മുഖ്യമന്ത്രി അശോക് ചവാൻ കോൺഗ്രസ് വിട്ടു
- സമാജ്വാദി പാര്‍ട്ടിയുടെ പ്രതിനിധിയായി ബോളിവുഡ് താരം ജയ ബച്ചന്‍ വീണ്ടും രാജ്യസഭയിലേക്ക്
- തെരഞ്ഞെടുപ്പ് ഫലം വൈകുന്നു: ഇലക്ട്രോണിക് വോട്ടിങ് മെഷീനുകളെ പ്രകീർത്തിച്ച് പാകിസ്‍താൻ പ്രസിഡന്റ്
- ബോധമില്ലാത്ത ആനയല്ല, കഴിവുകെട്ട സര്‍ക്കാരാണ് പ്രതി; ജനങ്ങളുടെ ജീവനും സ്വത്തും സംരക്ഷിക്കുന്നതില്‍ സര്‍ക്കാര്‍ പരാജയപ്പെട്ടു; വി ഡി സതീശൻ
ഡച്ച് പ്രധാനമന്ത്രി മാർക്ക് റുത്തെ അനുശോചനം രേഖപ്പെടുത്തി. ധ്രുവീകരണത്തിന്റെ കാലത്ത് കൃത്യമായ ബോധ്യങ്ങളിലൂടെയും വ്യക്തമായ അവതരണങ്ങളിലൂടെയും ഡച്ച് രാഷ്ട്രീയത്തിന് നിറവും അർത്ഥവും നൽകിയ നേതാവായിരുന്നു അദ്ദേഹമെന്നും റുത്തെ അനുസ്മരിച്ചു. ഡച്ച് രാജകുടുംബവും ഡ്രീസിന് ആദരമർപ്പിച്ചു. പ്രക്ഷുബ്ധമായ കാലത്ത് ഭരണച്ചുമതല ഏറ്റെടുത്ത നേതാവാണ് ഡ്രീസ് വാൻ ആഖ്ത്. തന്റെ വ്യക്തിപ്രഭാവത്തിലൂടെ എല്ലാവരെയും പ്രചോദിപ്പിക്കാൻ അദ്ദേഹത്തിനായെന്നും വില്ലെം അലെക്‌സാണ്ടർ രാജാവും മാക്‌സിമ രാജ്ഞിയും ബീട്രിക്‌സ് രാജകുമാരിയും പ്രസ്താവനയിൽ അനുശോചിച്ചു.
അന്വേഷണം വാർത്തകൾ വാട്സാപ്പിൽ ലഭിക്കാൻ ഇവിടെ ക്ലിക്ക് ചെയ്യുക
