അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.
ദമ്മാം: സൗദി അറേബ്യയുടെ കിഴക്കന്‍ പ്രവിശ്യ കേന്ദ്രികരിച്ചു പ്രവര്‍ത്തിക്കുന്ന തിരുവനന്തപുരം നിവാസികളുടെ കൂട്ടായ്മയായ ‘തിരുവനന്തപുരം പ്രവാസി അസോസിയേഷന്‍ (ടിപ്ര) പതിനൊന്നാം വാര്‍ഷികത്തോടനുബന്ധിച്ചു അല്‍ ഖോബാര്‍ ഹോളിഡേ ഇന്‍ ഹോട്ടലില്‍ ‘ സ്റ്റാര്‍ നൈറ്റ് 2024 ‘ എന്ന പേരില്‍ വര്‍ണ്ണാഭമായ സംഗീത നൃത്ത ഹാസ്യ മെഗാ ഷോ അവതരിപ്പിച്ചു.
കിഴക്കന്‍ പ്രവിശ്യയിലെ കലാകാരോടൊപ്പം ട്രിപയുടെ കുട്ടികള്‍ അവതരിപ്പിച്ച നൃത്തങ്ങളോടുകൂടി മെഗാ ഷോയ്ക്ക് തുടക്കമായി. പ്രശസ്ത പിന്നണി ഗായകരായ ബിജു നാരായണന്‍, നാരായണി ഗോപന്‍, അതുല്‍ നറുകര എന്നിവര്‍ ചേര്‍ന്നൊരുക്കിയ ഗാനമേള, ഫ്ളവേഴ്സ് ടി.വി. കോമഡി താരങ്ങളായ തങ്കച്ചന്‍ വിതുര, അഖില്‍ കവലയൂര്‍ എന്നിവര്‍ക്കൊപ്പം കിഴക്കന്‍ പ്രവിശ്യയിലെ അറിയപ്പെടുന്ന സോഷ്യല്‍ മീഡിയ താരമായ ഷഹാന റാണിയും ചേര്‍ന്നൊരുക്കിയ കോമഡി സ്‌കിറ്റ്, ഇന്‍സ്ട്രുമെന്റല്‍ ഫ്യൂഷന്‍ ഒരുക്കി ചെമ്മീന്‍ ബാന്‍ഡിലുടെ പ്രശസ്തരായ നിധിന്‍ രാജ്, സജീവ് ജോബ് എന്നിവരുടെ പരിപാടികള്‍ സ്റ്റാര്‍ നൈറ്റ് 2024 സമാനതകള്‍ ഇല്ലാത്ത ഒരു ഗംഭീര കലാവിരുന്നാക്കി മാറ്റി.
അവതാരകനായി എത്തിയ ബിഗ് ബോസിലൂടെയും ജീവകാരുണ്യ പ്രവര്‍ത്തനത്തിലൂടെയും നടനും സംവിധായകനും സോഷ്യല്‍ മീഡിയ ഇന്‍ഫ്‌ളുവന്‍സറുമായ കിടിലം ഫിറോസ് കലാസന്ധ്യയ്ക്ക് ഏറെ പുതുമനല്‍കി. ട്രിപ കുടുംബത്തില്‍ നിന്നും രാജി അരുണും അവതാരകയായിരുന്നു. എല്ലാ കലാകാരും പ്രേക്ഷകരോട് നേരിട്ട് സംവദിച്ചു ആസ്വാദ്യകരമായോരുക്കിയ കലാസന്ധ്യ അക്ഷരാര്‍ഥത്തില്‍ കാണികള്‍ക്കു തികഞ്ഞൊരു ദൃശ്യവിരുന്നായിരുന്നു.
ഇ.ആര്‍. ഇവന്റ് എന്റര്‍ടൈന്‍മെന്റ് കമ്പനിയുടെ നേതൃത്വത്തില്‍ ട്രിപയ്ക്ക് വേണ്ടി മെഗാ ഷോ അവതരിപ്പിക്കാനുള്ള ജി.ഇ.എയുടെ അംഗീകാരം നേടുകയും പൂര്‍ണമായും പാസ്സിലൂടെ ഹാളിനുള്ളിലേക്കുള്ള പ്രവേശനം പരിമിതപ്പെടുത്തി മെഗാ ഷോയിലേക്കു വന്നെത്തിയ എല്ലാ കലാപ്രേമികള്‍ക്കും വേണ്ട സൗകര്യങ്ങള്‍ ഒരുക്കാനും സംഘാടകര്‍ക്കു സാധിച്ചു.
