അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.ഇസ്രയേൽ സൈനികർ ബന്ദികളെ ഇസ്രയേലിലേക്ക് എത്തിക്കാനായി നിർമ്മിച്ച തുരങ്കം എന്ന രീതിയിൽ ഒരു ഫോട്ടോ സോഷ്യൽ മീഡിയയിൽ പ്രചരിക്കുന്നുണ്ട്.
“ബന്ദികളെ കിട്ടിയാൽ സുരക്ഷിതമായി ഇസ്രായേലിൽ എത്തിക്കാൻ തുരങ്കം നിർമ്മിച്ച് അധിനിവേശ സൈനികർ. സ്വന്തം രാജ്യത്തിൻറെ അഭിമാനത്തിനും , സ്വാതന്ത്ര്യത്തിനും വേണ്ടി ഇത്രയേറെ കഷ്ടപ്പെടുന്ന പോരാളികളെ ആർക്ക് പരാജയപ്പെടുത്താൻ സാധിക്കും?” എന്ന കുറിപ്പോടെ പ്രചരിക്കുന്ന പോസ്റ്റർ പ്രചരിക്കുന്നത്.
എന്നാൽ, ഇത് ഇസ്രയേൽ സേന നിർമ്മിച്ച തുരങ്കമല്ലെന്നും ഹമാസ് നിർമ്മിച്ച തുരങ്കമാണെന്നും പിന്നീട് നടന്ന അന്വേഷണത്തിൽ കണ്ടെത്തി.
സോഷ്യൽ മീഡിയിൽ പ്രചരിക്കുന്ന ഫോട്ടോ റിവേഴ്സ് ഇമേജ് സെർച്ചിന്റെ സഹായത്തോടെ പരിശോധിച്ചപ്പോൾ സമാനമായ ചിത്രം ഉൾപ്പെടുന്ന ഫോബ്സിന്റെ റിപ്പോർട്ട് ലഭ്യമായി. ഡിസംബർ 17ന് പ്രസിദ്ധീകരിച്ച ഈ റിപ്പോർട്ടിൽ ഹമാസ് നിർമ്മിച്ച വലിയ തുരങ്കം ഇസ്രയേൽ സേന കണ്ടെത്തി എന്നാണ് പറയുന്നത്. ഇസ്രയേലിന്റെയും നോർത്തേൺ ഗാസയുടെയും അതിർത്തിയുടെ അടുത്ത് വരെ നീണ്ടുകിടക്കുന്ന വലിയ ടണലാണ് സേന കണ്ടെത്തിയത്.
ആഴ്ചകൾക്ക് മുമ്പ് തന്നെ ഈ തുരങ്കം ഇസ്രയേൽ സേന കണ്ടെത്തിയിരുന്നെങ്കിലും വൈകിയാണ് ഇക്കാര്യം പുറത്ത് വിട്ടത്. ഇതുവരെ ഇസ്രയേൽ സേന കണ്ടെത്തിയ ഹമാസ് തുരങ്കങ്ങളിൽ ഏറ്റവും വലുതാണ് ഇതെന്ന് ഫോബ്സ് റിപ്പോർട്ട് പറയുന്നു. ഈ റിപ്പോർട്ടിന്റെ സ്ക്രീൻ ഷോട്ട് ചുവടെ കാണാം.
അസോസിയേറ്റഡ് പ്രസ് എന്ന ന്യൂസ് ഏജൻസിയുടെ ഫോട്ടോഗ്രാഫർ അരീൽ സ്കാലിറ്റ് എടുത്ത ചിത്രമാണ് ഇപ്പോൾ സോഷ്യൽ മീഡിയയിൽ പ്രചരിക്കുന്നത്. ഇതേ ചിത്രം ഉപയോഗിച്ച് മണികൺട്രോൾ എന്ന വെബ്സൈറ്റും ഡിസംബർ 17ന് ഹമാസ് ടണലിനെ കുറിച്ചുള്ള റിപ്പോർട്ട് പ്രസിദ്ധീകരിച്ചിരുന്നു. 4 കിലോമീറ്റർ വരെ നീളത്തിലുള്ള ഈ ടണലിലൂടെ ചെറിയ കാറുകൾക്ക് പോലും സഞ്ചരിക്കാൻ സാധിക്കുമെന്ന് ഇസ്രയേൽ സൈനികർ പറഞ്ഞതായി മണികൺട്രോൾ റിപ്പോർട്ട് ചെയ്തു.
ലഭ്യമായ വിവരങ്ങളിൽ നിന്നും ഇസ്രയേൽ സേന നിർമ്മിച്ച തുരങ്കം എന്ന രീതിയിൽ പ്രചരിക്കുന്നത് ഹമാസ് ഗാസയിൽ നിർമ്മിച്ച ടണലാണെന്ന് വ്യക്തമായി.
അന്വേഷണം വാർത്തകൾ വാട്സ്ആപ്പിലൂടെ ലഭിക്കാൻ ക്ലിക്ക് ചെയ്യു
