അർഷ്ദീപിന് അഞ്ച് വിക്കറ്റ്, അരങ്ങേറ്റത്തിൽ അര്‍ധ സെഞ്ചുറിയുമായി സായ്; ദക്ഷിണാഫ്രിക്കയെ എട്ടുവിക്കറ്റിന് തകർത്ത് ഇന്ത്യൻ യുവനിര

ദക്ഷിണാഫ്രിക്കക്കെതിരായ ആദ്യ ഏകദിനത്തിൽ ഇന്ത്യക്ക് 8 വിക്കറ്റിന്‍റെ ആധികാരിക ജയം. ആദ്യം ബാറ്റ് ചെയ്ത ദക്ഷിണാഫ്രിക്കയെ 116 റൺസിനൊതുക്കിയ ഇന്ത്യ 16.4 ഓവറിൽ രണ്ട് വിക്കറ്റ് നഷ്ടപ്പെടുത്തി വിജയലക്ഷ്യം മറികടന്നു. ബൗളിംഗിൽ അർഷ്ദീപ് സിംഗ് അഞ്ചും ആവേശ് ഖാൻ നാലും വിക്കറ്റ് വീഴ്ത്തി.

ഇന്ത്യന്‍ ബാറ്റര്‍മാരില്‍ സായ് സുദര്‍ശന്‍ അരങ്ങേറ്റ മത്സരം തന്നെ ഗംഭീരമാക്കി. ഋതുരാജ് ഗെയ്ക്‌വാദിനൊപ്പം ഓപ്പണിങ്ങില്‍ ഇറങ്ങിയ സുദര്‍ശന്റെ അര്‍ധ സെഞ്ചുറി പ്രകടനമാണ് (43 പന്തില്‍ 55 റണ്‍സ്) ഇന്ത്യന്‍ ഇന്നിങ്‌സില്‍ നിര്‍ണായകമായത്. ശ്രേയസ് അയ്യരും അര്‍ധ സെഞ്ചുറി നേടി (45 പന്തില്‍ 52 റണ്‍സ്). ടീം സ്‌കോര്‍ 23-ല്‍ നില്‍ക്കേ വിയാന്‍ മുള്‍ഡറിന്റെ പന്തിനു മുന്നില്‍ കുരുങ്ങി ഗെയ്ക്‌വാദാണ് ആദ്യം മടങ്ങിയത്.

പിന്നാലെ ശ്രേയസ് അയ്യരും സുദര്‍ശനും ചേര്‍ന്ന് വിജയലക്ഷ്യത്തിലേക്ക് ബാറ്റേന്തി. വിജയിക്കാന്‍ ആറു റണ്‍സ് ബാക്കിയിരിക്കേ, ശ്രേയസ് അയ്യര്‍ മടങ്ങി. ഫെഹ്‌ലുക്‌വായയുടെ പന്തില്‍ ഡേവിഡ് മില്ലറിന് ക്യാച്ച് നല്‍കുകയായിരുന്നു. പിന്നാലെയെത്തിയ തിലക് വര്‍മയെത്തി സുദര്‍ശനൊപ്പം ചേര്‍ന്ന് കളി ജയിപ്പിച്ചു.

 
നേരത്തേ ടോസ് നേടി ബാറ്റിംഗ് തിരഞ്ഞെടുത്ത ദക്ഷിണാഫ്രിക്കയെ ഇന്ത്യൻ പേസർമാർ തകർത്തെറിഞ്ഞു. മുകേഷ് കുമാർ തല്ലുവാങ്ങിയെങ്കിലും ആദ്യ നാല് വിക്കറ്റ് വീഴ്ത്തിയ അർഷ്ദീപ് ദക്ഷിണാഫ്രിക്കയുടെ ടോപ്പ് ഓർഡർ തകർത്തു. റീസ ഹെൻറിക്സ് (0), വാൻ ഡർ ഡസ്സൻ (0), ടോണി ഡി സോർസി (28), ഹെന്രിച് ക്ലാസൻ (6) എന്നിവരെയാണ് അർഷ്ദീപ് ആദ്യം വീഴ്ത്തിയത്. 

മുകേഷ് കുമാറിനു പകരം ആവേശ് ഖാൻ എത്തിയതോടെ ദക്ഷിണാഫ്രിക്കയ്ക്ക് വീണ്ടും തുടരെ വിക്കറ്റ് നഷ്ടമായി. എയ്ഡൻ മാർക്രം (12), വ്യാൻ മുൾഡർ (0), ഡേവിഡ് മില്ലർ (2), കേശവ് മഹാരാജ് (4) എന്നിവരെ ആവേശ് പുറത്താക്കിയതോടെ പ്രോട്ടീസ് 8 വിക്കറ്റ് നഷ്ടത്തിൽ 73 റൺസ് എന്ന നിലയിലേക്ക് വീണു. എട്ടാം നമ്പറിൽ ആൻഡൈൽ പെഹ്‌ലുക്ക്‌വായോ (33) നടത്തിയ ചെറുത്തുനിൽപാണ് ദക്ഷിണാഫ്രിക്കയെ 100 കടത്തിയത്. പെഹ്‌ലുക്ക്‌വായോയെ പുറത്താക്കി അർഷ്ദീപ് അഞ്ച് വിക്കറ്റ് നേട്ടം തികച്ചു. നന്ദ്രേ ബർഗറിനെ (7) വീഴ്ത്തി കുൽദീപ് യാദവ് ഇന്നിംഗ്സ് അവസാനിപ്പിക്കുകയും ചെയ്തു.

അന്വേഷണം വാർത്തകൾ വാട്സ്ആപ്പിലൂടെ ലഭിക്കാൻ ക്ലിക്ക് ചെയ്യു