കോട്ടയം: ഏറ്റുമാനൂരിൽ നവകേരള സദസ് നടക്കുന്ന വേദിയുടെ ചുറ്റുമുള്ള കടകൾ അടച്ചിടണമെന്ന് പോലീസ് നൽകിയ നിർദേശം പിൻവലിച്ചു. കടകൾ തുറന്ന് പ്രവര്‍ത്തിക്കുന്നതിൽ പ്രശ്നമില്ലെന്നാണ് പുതിയ അറിയിപ്പ്.
പോലീസ് കടയുടമകൾക്ക് നൽകിയ നോട്ടീസ് വാർത്തയായ സാഹചര്യത്തിലാണ് നിർദേശം പിൻവലിച്ചത്. നവ കേരള സദസ്സ് നടക്കുമ്പോൾ ഉണ്ടാകാൻ സാധ്യതയുള്ള ഗതാഗതക്കുരുക്ക് ഒഴിവാക്കാനെന്ന വിശദീകരണത്തോടെയാണ് കടകൾ തുറക്കരുതെന്ന് ആദ്യം പൊലീസ് ഉത്തരവിട്ടത്.
ബുധനാഴ്ച രാവിലെ ആറു മുതൽ പരിപാടി തീരുന്നതു വരെ അടച്ചിടാനാണ് പോലീസ് വ്യാപാരികൾക്ക് നൽകിയ നിർദേശം. കോവിൽ പാടം റോഡ്, പാലാ റോഡ് എന്നിവിടങ്ങളിലെ വ്യാപാരികൾക്കാണ് പോലീസ് നോട്ടീസ് നൽകിയത്.
കടകൾ അടച്ചില്ലെങ്കിൽ ഉണ്ടാകുന്ന ക്രമസമാധാന പ്രശ്നങ്ങൾക്ക് കടയുടമകൾ ഉത്തരവാദികളായിരിക്കുമെന്ന് നോട്ടീസിൽ പൊലീസ് പറഞ്ഞിരുന്നു.
അന്വേഷണം വാർത്തകൾ വാട്സ്ആപ്പിലൂടെ ലഭിക്കാൻ ക്ലിക്ക് ചെയ്യു