അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.ഗാസ : ഗസ്സയില്‍ ആശുപത്രികള്‍ക്ക് നേരെയടക്കമുള്ള ആക്രമണം തുടരുകയാണ് ഇസ്രായേല്‍ സേന. ഔദ ആശുപത്രിയില്‍ ഇരച്ചുകയറിയ സൈന്യം നിരവധി പേരെ കൊലപ്പെടുത്തി.അബദ്ധത്തില്‍ നടത്തിയ ആക്രമണത്തില്‍ 20 സൈനികര്‍ കൊല്ലപ്പെട്ടെന്ന് ഇസ്രായേല്‍ അറിയിച്ചു. യു.എൻ പൊതുസഭാ യോഗം ഇന്ന് ചേരും.
ബ്രിട്ടൻ, ജര്‍മനി ഉള്‍പ്പെടെയുള്ള രാജ്യങ്ങള്‍ വെടിനിര്‍ത്തലിനെ പിന്തുണച്ച്‌ രംഗത്തു വന്നതോടെ ഇസ്രായേലും അമേരിക്കയും കൂടുതല്‍ ഒറ്റപ്പെട്ടു. ഇന്ന് രാത്രി ചേരുന്ന യു.എൻ പൊതുസഭാ യോഗം ഗസ്സയില്‍ സഹായം ഉറപ്പാക്കാൻ അടിയന്ത വെടിനിര്‍ത്തല്‍ വേണമെന്ന ആവശ്യം ശക്തമായി ഉന്നയിക്കും. ബന്ദികളുടെ കൈമാറ്റത്തിന് മധ്യസ്ഥ രാജ്യങ്ങളുടെ പുതിയ നിര്‍ദേശം പരിഗണിക്കാൻ ഇസ്രായേല്‍ സന്നദ്ധത അറിയിച്ചതായി റിപ്പോര്‍ട്ടുണ്ട്. എന്നാല്‍ ആഭ്യന്തര സമ്മര്‍ദം മറികടക്കാനുള്ള ഇസ്രായേല്‍ തന്ത്രം മാത്രമാണ് ചര്‍ച്ചാ സന്നദ്ധതയെന്ന് ഹമാസ്.
ചെങ്കടലില്‍ യെമൻ ഹൂത്തികള്‍ അയച്ച മിസൈലേറ്റ് നോര്‍വീജിയൻ പതാക വഹിച്ച കപ്പലിന് തകര്‍ച്ച സംഭവിച്ചതായി പെന്റഗണ്‍. ഇസ്രായേലിലേക്കുള്ള എല്ലാ കപ്പലുകളും ആക്രമിക്കുമെന്ന മുന്നറിയിപ്പില്‍ മാറ്റമില്ലെന്ന് ഹൂത്തി വിഭാഗം. യുദ്ധത്തില്‍ വൈറ്റ് ഫോസ്പറസ് ഉപയോഗിച്ചതിനും തടവുകാരെ അടിവസ്ത്രം മാത്രം ധരിപ്പിച്ചു പ്രദര്‍ശിപ്പിച്ചതിനും ഇസ്രായേലിനോട് വിശദീകരണം തേടിയതായി അമേരിക്ക.
യു.എസ് ദേശീയ സുരക്ഷാ ഉപദേഷ്ടാവ് ജെയ്ക് സള്ളിവൻ നാളെ ഇസ്രായേലിലെത്തും.ഗസ്സയില്‍ ഇസ്രായേലിന്റെ കൊടും ക്രൂരത തുടരുകയാണ്. മരണം 18,205 ആയി. പരിക്കേറ്റവരുടെ എണ്ണം അര ലക്ഷം കടന്നു. ഖാൻ യൂനുസ്, ജബാലിയ, ശുജാഇയ ഉള്‍പ്പെടെ ഗസ്സയിലെ വിവിധ ഭാഗങ്ങളില്‍ രൂക്ഷമായ ഏറ്റുമുട്ടല്‍ തുടരുന്നു. ഓഫീസര്‍മാര്‍ ഉള്‍പ്പെടെ നിരവധി സൈനികരെ വധിച്ചതായി അല്‍ഖസ്സാം ബ്രിഗേഡ്. ജെനിൻ അഭയാര്‍ഥി ക്യാമ്പ് ഉള്‍പ്പെടെ വെസ്റ്റ് ബാങ്കിൻ്റെ വിവിധ ഭാഗങ്ങളില്‍ ഫലസ്തീൻ വംശജര്‍ക്കെതിരെ ഇസ്രായേല്‍ സേന ഇന്നും ആക്രമണം തുടര്‍ന്നു.
