അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.അബൂദബി: ഇന്ത്യയുടെയും യു.എ.ഇയുടെയും കലാ സംസ്‌കാരിക പൈതൃകം സമ്മേളിക്കുന്ന യു.എ.ഇ ഇന്ത്യ ഫെസ്റ്റ് സീസണ്‍-12 ഡിസംബര്‍ 1, 2, 3 തീയതികളില്‍ നടക്കും. അബൂദബി ഇന്ത്യ സോഷ്യല്‍ ആന്‍ഡ് കള്‍ചറല്‍ സെന്റര്‍ (ഐ.എസ്.സി) ഒരുക്കുന്ന ഉത്സവത്തോടനുബന്ധിച്ച് ദേശീയദിനാഘോഷ പരിപാടികളും അരങ്ങേറും. പരിപാടികളില്‍ 35,000 പേര്‍ പങ്കെടുക്കുമെന്നാണ് പ്രതീക്ഷിക്കുന്നതെന്ന് ഐ.എസ്.സി ഭാരവാഹികള്‍ വാര്‍ത്തസമ്മേളനത്തില്‍ പറഞ്ഞു. 10 ദിര്‍ഹത്തിന്റെ പ്രവേശന കൂപ്പണ്‍ നറുക്കെടുപ്പിൽ മെഗാ വിജയിക്ക് ജാക് എസ്-3 കാര്‍ സമ്മാനിക്കും. 20 പേര്‍ക്ക് ആകര്‍ഷക സമ്മാനങ്ങളുമുണ്ട്. സമാപന സമ്മേളനത്തില്‍ ലുലു ഗ്രൂപ് ചെയര്‍മാന്‍ എം.എ. യൂസുഫലി മുഖ്യാതിഥിയാകും.
ഡിസംബര്‍ രണ്ടിന് ഗായകരായ ഹരിചരണിന്റെയും രക്ഷിത സുരേഷിന്റെയും നേതൃത്വത്തില്‍ സംഗീത സന്ധ്യ അരങ്ങേറും. വ്യത്യസ്ത കലാപരിപാടികള്‍, ഭക്ഷ്യമേള, വസ്ത്ര ആഭരണ വിപണി, പുസ്തകമേള, പെര്‍ഫ്യൂംസ്, ട്രാവല്‍ ടൂറിസം, റിയല്‍ എസ്റ്റേറ്റ്, ധനകാര്യ സ്ഥാപനങ്ങള്‍ തുടങ്ങിയവയുടെ വിവിധ സ്റ്റാളുകള്‍ എന്നിവയും ഒരുക്കും. ലുലു ഗ്രൂപ്പിന്റെ സ്റ്റാളുകളും കുട്ടികള്‍ക്കായി പ്രത്യേക വിനോദ പരിപാടികളും ഇത്തവണയുണ്ടാകും. സ്വദേശി കലാകാരന്മാരുടെ തനത് ആഘോഷ പരിപാടികളും അരങ്ങേറും. ദിവസേന വൈകീട്ട് 5 മുതല്‍ അര്‍ധരാത്രി 12 വരെയാണ് ഉത്സവം. വാര്‍ത്തസമ്മേളനത്തില്‍ പ്രസിഡന്റ് ജോണ്‍ പി. വര്‍ഗീസ്, ജനറല്‍ സെക്രട്ടറി വി. പ്രദീപ്കുമാര്‍, ട്രഷറര്‍ ദിലീപ്കുമാര്‍, വൈസ് പ്രസിഡന്റ് റെജി സി. ഉലഹന്നാന്‍, ആര്‍ട്‌സ് സെക്രട്ടറി കെ.കെ. അനില്‍കുമാര്‍, ഷൈജു മോഹന്‍ദാസ്(ലുലു എക്‌സ്‌ചേഞ്ച്), വിനീഷ് ഗണേഷ് ബാബു, ഷറീന്‍ ഫെര്‍ണാണ്ടസ് എന്നിവര്‍ പങ്കെടുത്തു.
അന്വേഷണം വാർത്തകൾ വാട്സ്ആപ്പിലൂടെ ലഭിക്കാൻ ക്ലിക്ക് ചെയ്യു
