ആശങ്ക ശക്തം; ഗസ്സയില്‍ താൽക്കാലിക വെടിനിർത്തലിന്​ സാധ്യതയെന്ന് റിപ്പോർട്ട്; ആന്‍റണി ബ്ലിങ്കന്‍ ഇന്ന്​ ഇസ്രായേലിൽ

ഗസ്സ സിറ്റി: യുദ്ധം വ്യാപിച്ചേക്കുമെന്ന ആശങ്ക ശക്തമായതോടെ താൽക്കാലിക വെടിനിർത്തലിന്​ ​ ഇസ്രായേൽ ഒരുങ്ങുന്നതായി റിപ്പോർട്ട്​. യു.എസ്​ സ്​റ്റേറ്റ്​ സെക്രട്ടറി ആൻറണി ബ്ലിങ്കന്‍ ഇന്ന്​ ഇസ്രായേലിൽ എത്താനിരിക്കെ, ഗസ്സയിലേക്ക്​ കൂടുതൽ സഹായം എത്തിക്കുന്ന കാര്യത്തിലും തീരുമാനം ഉണ്ടാകും. ലബനാൻ അതിർത്തിയിൽ ആക്രമണം കൂടുതൽ ശക്തമായിരിക്കെ, ഹിസ്​ബുല്ല നേതാവ്​ ഹസൻ നസ്​റുല്ല ഇന്ന്​ വൈകീട്ട്​ സുപ്രധാന പ്രഖ്യാപനം നടത്തും. അതേസമയം, ഗസ്സ നഗരത്തെ പൂർണമായും വളഞ്ഞതായി ഇസ്രായേൽ സൈന്യം അവകാശപ്പെട്ടു.

അമേരിക്കയുടെ ​അഭ്യർഥന മാനിച്ച്​ ഇസ്രായേൽ പ്രധാനമന്ത്രി നെതന്യാഹു ഗസ്സയിൽ താൽക്കാലിക വെടിനിർത്തലിന്​ അനുമതി നൽകിയേക്കുമെന്ന്​ ഇസ്രായേലി ബ്രോഡ്​കാസ്​റ്റിങ്​ കോർപറേഷൻ സൂചിപ്പിക്കുന്നു. ഗസ്സയിൽ നിരവധി ആശുപത്രികളുടെ പ്രവർത്തനം നിർത്തിയിരിക്കെ, ഗസ്സയിലേക്ക്​ ഇന്ധനം എത്തിക്കാൻ ഇ​സ്രായേലിനെ അമേരിക്ക പ്രേരിപ്പിച്ചേക്കും . ഇസ്രായേലിൽ എത്തുന്ന ആൻറണി ബ്ലിങ്കന്‍ ജോർദാൻ നേതാക്കളുമായും ചർച്ച നടത്തും. ഗസ്സയിൽ തുടരുന്ന കുരുതി അമേരിക്കൻ അനുകൂല രാജ്യങ്ങളെയും മാറിച്ചിന്തിക്കാൻ പ്രേരിപ്പിക്കുന്നുണ്ട്​.

അതിനിടെ, ഗസ്സ നഗരം പൂർണമായും വളഞ്ഞതായി ഇസ്രായേൽ സൈന്യം അവകാശപ്പെടുന്നുണ്ട്. ജെനിൻ ക്യാമ്പ്​ പരിസരത്ത്​ ഹമാസും ഇസ്രായേൽ സ്​പെഷ്യൽ ഫോഴ്​സും തമ്മിലുള്ള ഏറ്റുമുട്ടൽ ഇന്ന്​ വെളുപ്പിനും തുടർന്നു​. ബന്ദികളുടെ മോചനവും ഹമാസിനെ അമർച്ച ചെയ്യലും ലക്ഷ്യമിട്ടുള്ള സൈനിക നീക്കം കൃത്യമായ ദിശയിലാണ്​ മുന്നോട്ടുപോകുന്നതെന്ന്​ ഇസ്രായേൽ പ്രതിരോധമന്ത്രി പറഞ്ഞു. എന്നാൽ, അജയ്യമായ പ്രതിരോധം തുടരുമെന്നും ഇസ്രായേലിന്‍റെ കുരുതിക്ക്​ പകരംചോദിക്കുമെന്നും ഹമാസ് വ്യക്തമാക്കി​. കരയുദ്ധത്തിൽ ഇതിനകം 20 സൈനികർ കൊല്ലപ്പെട്ടതായി ഇസ്രായേൽ സ്​ഥിരീകരിച്ചു.

read also സാങ്കേതിക സർവകലാശാല അഭിഭാഷകന് അനുവദിച്ചത് 92 ലക്ഷം രൂപ; വെളിപ്പെടുത്തലുമായി മന്ത്രി ആർ. ബിന്ദു

ഗസ്സ ആക്രമണം തുടർന്നാൽ യുദ്ധവ്യാപ്​തി ഉറപ്പാണെന്ന്​ പടിഞ്ഞാറൻ രാജ്യങ്ങൾ ഇസ്രായേലിന്​ മുന്നറിയിപ്പ്​ നൽകി. ഇസ്രായേൽ നഗരമായ കിർയത്​ ഷ്​മോനക്കു നേരെ ഇന്ന​ലെ ലബനാനിൽ നിന്നുള്ള ഹമാസിന്‍റെ മിസൈല്‍ ആക്രമണം നടന്നു. 12 മിസൈലുകൾ പ്രദേശത്ത്​ പതിച്ചു. രണ്ട്​ ഇസ്രായേലികൾക്ക്​ പരിക്കുണ്ട്​. ലബനാൻ ഷെബഫാമിലെ വടക്കൻ ​സൈനിക പോസ്​റ്റുകൾക്കുനേരെ ഹിസ്​ബുല്ലയും ആക്രമണം നടത്തി.

ഹിസ്​ബുല്ല നേതാവ്​ ഹസൻ നസ്​റുല്ലയുടെ ഇന്ന്​ നടക്കുന്ന പ്രഖ്യാപനം യുദ്ധഗതിയെ മാറ്റിമറിച്ചേക്കും. ഗസ്സക്കപ്പുറത്തേക്ക്​ യുദ്ധം വ്യാപിക്കാതിരിക്കാൻ എല്ലാ നടപടിയും സ്വീകരിക്കുമെന്നാണ്​ പെൻറഗൺ പറയുന്നത്. ഇസ്രായേലിൽ നിന്ന്​ അംബാസഡറെ തിരിച്ചുവിളിച്ചതായി ബഹ്​റൈൻ പാർലമെന്‍റ് അറിയിച്ചു. എന്നാൽ, തങ്ങൾക്ക്​ ഇക്കാര്യത്തിൽ വിവരമൊന്നുമില്ലെന്നാണ്​ ഇസ്രായേലിന്‍റെ പ്രതികരണം.

അന്വേഷണം വാർത്തകൾ വാട്സ്ആപ്പിലൂടെ ലഭിക്കാൻ ക്ലിക്ക് ചെയ്യു