അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.തിരുവനന്തപുരം: പുതുപ്പള്ളി ഉപതെരഞ്ഞെടുപ്പ് കാരണം നീട്ടിവെച്ച 15ാം കേരള നിയമസഭയുടെ ഒമ്പതാം സമ്മേളനം ഇന്ന് പുനരാരംഭിക്കും. വ്യാഴാഴ്ച വരെ നാലുദിവസമാണ് സമ്മേളനം ചേരുന്നത്.
പുതുപ്പള്ളിയിലെ വമ്പൻ ഭൂരിപക്ഷത്തിന്റെ ആത്മവിശ്വാസത്തിലാണ് പ്രതിപക്ഷം സഭയിലെത്തുക. പിണറായി സർക്കാറിനെതിരായ ജനവിധിയെന്ന് ചൂണ്ടിക്കാട്ടി സഭയിൽ ആഞ്ഞടിക്കാനാണ് സാധ്യത.
Also Read :5 പതിറ്റാണ്ടിനുശേഷം പുതുപ്പള്ളിക്ക് പുതുനായകൻ; ജനമനസ്സിലേറി ചാണ്ടി ഉമ്മൻ ഇന്ന് കേരള നിയമസഭയിലേക്ക്
ചാണ്ടി ഉമ്മൻ സത്യപ്രതിജ്ഞ ചെയ്യുന്ന ദിവസം ഉമ്മൻ ചാണ്ടിയെ സി.പി.എം വേട്ടയാടിയത് ഉന്നയിക്കാൻ കിട്ടിയ അവസരം പ്രതിപക്ഷം ഉപയോഗപ്പെടുത്തിയാൽ സഭാതലം പ്രക്ഷുബ്ധമാകാനാണ് സാധ്യത. അതേസമയം, മുഖ്യമന്ത്രിയുടെ മകൾ വീണക്കെതിരായ മാസപ്പടി വിവാദം അടിയന്തരപ്രമേയമായി ഉന്നയിക്കുന്നതിൽ പ്രതിപക്ഷത്ത് ധാരണയായിട്ടില്ല. യു.ഡി.എഫ് നേതാക്കളുടെ കൂടി പേരു കൂടിയുള്ളതിനാൽ കരുതലോടെയാകും പ്രതിപക്ഷം നീങ്ങുക.
സി.പി.എമ്മിന്‍റെ എ.സി. മൊയ്തീൻ എം.എൽ.എ തിങ്കളാഴ്ച കൊച്ചിയിൽ ഇ.ഡി മുമ്പാകെ ചോദ്യം ചെയ്യലിന് ഹാജരാവുകയാണ്. കോടികളുടെ കരുവന്നൂർ ബാങ്ക് തട്ടിപ്പുമായി ബന്ധപ്പെട്ടാണ് ചോദ്യംചെയ്യൽ. ഇക്കാര്യവും ചർച്ചയാകും.
പ്രധാനമായും നിയമനിർമാണം പരിഗണിക്കാനാണ് സഭ ചേരുന്നത്. 15 ബില്ലുകളാണ് സബ്ജക്ട് കമ്മിറ്റിയുടെ പരിഗണനയിലുള്ളത്. 1960ലെ ഭൂപതിവ് നിയമ ഭേദഗതി ബില്‍, കെട്ടിട നികുതി ബിൽ ഭേദഗതി തുടങ്ങിയവയാണ് പരിഗണിക്കുന്നത്. സഭാ സമ്മേളനം രാഷ്ട്രീയ വിഷയങ്ങളിൽ ആളിക്കത്തിയാൽ നാലുദിവസം കൊണ്ട് ഇതില്‍ എത്രയെണ്ണം പരിഗണിക്കാന്‍ കഴിയുമെന്നത് വ്യക്തമല്ല.
