അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.തിരുവനന്തപുരം: ലോകത്തിലെ ഏറ്റവും വലിയ പഴവും കേരളത്തിൻ്റെ സംസ്ഥാന ഫലവുമായ ചക്കയുടെ പ്രചരണാർത്ഥം സെൻ്റർ ഫോർ ഇന്നൊവേഷൻ ഇൻ സയൻസ് ആൻഡ് സോഷ്യൽ ആക്ഷൻ (സിസ്സ ) യുടെ നേതൃത്വത്തിൽ കേരളത്തിലെ ചക്ക കര്ഷകരുടെയും ചക്ക പ്രേമികളുടെയും കൂട്ടായ്മയും പ്രശസ്ത ചക്ക പ്രചാരകരായ ചക്കക്കൂട്ടവും ചേർന്ന് സംഘടിപ്പിക്കുന്ന അനന്തപുരി ചക്ക മഹോല്സവത്തിന് ജൂണ് 30-ന് പുത്തരിക്കണ്ടം നായനാർ പാർക്കിൽ തുടക്കമാകും.
മേളയുടെ പോസ്റ്ററും ടൈറ്റിലും പ്രചരണ പരിപാടികളും ഗായകൻ എം.ജി ശ്രീകുമാർ അദ്ദേഹത്തിൻ്റെ വസതിയിലെ “വൈറൽ പ്ലാവിൻ്റെ ” മുന്നിൽ വച്ച് സിസ്സ ജനറൽ സെക്രട്ടറി ഡോ.സി സുരേഷ് കുമാറിൻ്റെ സാന്നിധ്യത്തിൽ നിർവഹിച്ചു.
ജൂലൈ ഒമ്പതുവരെ പത്തുദിവസം നീണ്ടുനില്ക്കുന്ന മേളയില് കേരളത്തിനകത്തും പുറത്തുമുള്ള വിവിധയിനം ചക്കകളുടെയും ചക്ക വിഭവങ്ങളുടെയും പ്രദര്ശനവും വില്പ്പനയുമാണ് ഒരുക്കുന്നത്. മേളയുടെ ഉദ്ഘാടനം 30ന് ഡപ്യൂട്ടി മേയർ പി കെ രാജു നിർവഹിക്കും.”നല്ലഭക്ഷണം, നല്ല ആരോഗ്യം, നല്ലജീവിതം, നമുക്കും വരും തലമുറയ്ക്കും” എന്ന സന്ദേശമുയര്ത്തിയാണ് ഇക്കുറി മേള സംഘടിപ്പിച്ചിരിക്കുന്നത്.
തേന് വരിക്ക, ചെമ്പരത്തി വരിക്ക, നാടന് വരിക്ക, മുള്ളന് ചക്ക, കൂഴച്ചക്ക, കൊട്ട് വരിക്ക തുടങ്ങി വ്യത്യസ്ത വലിപ്പത്തിലും രുചിയിലുമുള്ള ചക്കകള് ചക്കമഹോല്സവത്തില് അണിനിരക്കും. 100ല്പ്പരം രുചിയേറുന്ന ചക്ക വിഭവങ്ങള് മാത്രമുള്ള ഫുഡ്കോര്ട്ട് മേളയുടെ മറ്റൊരു പ്രത്യേകതയാണ്. ഇതോടൊപ്പം നഗരമാകെ പ്ലാവ് എന്ന ആശയം മുൻനിർത്തി ഓരോ വീട്ടിലും ഒരു പ്ലാവിൻ തൈ നടുക എന്ന ലക്ഷ്യത്തോടെ മുപ്പതിൽപരം വ്യത്യസ്തയിനം പ്ലാവിന് തൈകൾ കുറഞ്ഞ വിലയ്ക്ക് ലഭ്യമാക്കുന്നു. ജൈവോല്പ്പന്നങ്ങളുടെ പ്രദര്ശനവും വിപണനവും മേളയിലൊരുക്കിയിട്ടുണ്ട്. വിദേശത്ത് നിന്ന് ഇറക്കുമതി ചെയ്ത ചക്കവിഭവങ്ങളും മേളയില് അണിനിരക്കും.
വരിക്ക ചക്ക കൊണ്ട് ഉണ്ടാക്കിയ പത്തുകൂട്ടം തൊടുകറികള് ഉള്പ്പെടെയുള്ള ‘ചക്ക ഊണ്’ മേളയുടെ പ്രത്യേകതയാണ്. ചക്ക സാമ്പാര്, ചക്ക പുളിശ്ശേരി, ചക്ക പരിപ്പുകറി, ചക്ക പെരട്ട്, ചക്കച്ചില്ലി, ചക്ക ചമ്മന്തി, ചക്കവരട്ടി, ചക്ക ഉപ്പേരി എന്നിവയ്ക്ക് പുറമേ ഊണിനുള്ള മറ്റ് വിഭവങ്ങള്ക്കും ചക്ക രുചിയുണ്ടാകും. ഊണിനൊപ്പം ചക്ക പായസവുമുണ്ട്.
വൈകുന്നേരം ചായക്കൊപ്പം കഴിക്കാനുള്ള ചക്ക മസാലദോശ, ചക്ക പഴംപൊരി, ചക്ക ബജി, ചക്ക മിക്സ്ചര്, ചക്ക അട, ചക്ക കോട്ടപ്പം, ചക്ക ചിപ്സ്, ചക്ക ഉള്ളിവട, ചക്ക മഞ്ചൂരി, ചക്ക മോതകം, ചക്ക മധുരചില്ലി, ചക്ക കട്ലറ്റ് എന്നിവയുടെ വില്പ്പനയും പ്രദര്ശനവുമുണ്ടാകും. ചക്ക കൊണ്ടുണ്ടാക്കിയ കറികളും മേളയിലുണ്ട്. ചക്ക സ്ക്വാഷുകള്, ചക്ക ജാമുകള് എന്നിവയുടെ വില്പ്പനയും പാചക പരിശീലനവും പ്രദര്ശനത്തിലുണ്ട്.
വിവിധ ദിവസങ്ങളിലായി മന്ത്രിമാര്, രാഷ്ട്രീയ നേതാക്കള്, സാമൂഹികസാംസ്കാരിക രംഗത്തെ പ്രമുഖര്, സിനിമാതാരങ്ങള് എന്നിവര് മേള സന്ദര്ശിക്കും. അനന്തപുരി ചക്ക മഹോല്സവത്തില് എത്തുന്നവര്ക്ക് രുചിയുള്ള ചക്കപ്പഴം ഫ്രീയായി കഴിക്കാനും അവസരം. കോവിഡിന് മുമ്പായി കനകക്കുന്നില് നടന്ന ചക്ക മഹോല്സവത്തിന്റെ വിജയത്തെ തുടര്ന്നാണ് ഈ വര്ഷവും മേള സംഘടിപ്പിച്ചിരിക്കുന്നത്. എല്ലാദിവസവും രാവിലെ 11 മുതല് രാത്രി ഒമ്പതു വരെയാണ് പ്രദര്ശനം.
അന്വേഷണം വാർത്തകൾ വാട്സ്ആപ്പിലൂടെ ലഭിക്കാൻ ക്ലിക്ക് ചെയ്യു,
നിങ്ങൾ അറിയാൻ ആഗ്രഹിക്കുന്ന വാർത്തകൾ നിങ്ങളുടെ Facebook Feed ൽ Anweshanam
നിങ്ങൾ അറിയാൻ ആഗ്രഹിക്കുന്ന വാർത്തകൾ നിങ്ങളുടെ ടെലിഗ്രാമിൽ അന്വേഷണം
