അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.
തിരുവനന്തപുരം: ഡോക്ടർ വന്ദനദാസിന്റെ കൊലപാതകത്തിൽ സമരം ചെയ്യുന്ന ഡോക്ടർമാരുമായി മുഖ്യമന്ത്രി പിണറായി വിജയൻ ചർച്ച നടത്തും. നാളെ 10.30ന് മുഖ്യമന്ത്രിയുടെ ഓഫീസിലാണ് ചർച്ച. അതേസമയം വന്ദനയുടെ കൊലപാതകത്തിൽ പ്രതിഷേധം തുടരുമെന്ന് ഐ.എം.എ അറിയിച്ചു.
ഡോക്ടർമാരുടെ സമരം തുടരുമെന്ന് ഇന്ത്യൻ മെഡിക്കൽ അസോസിയേഷനും (ഐഎംഎ) കെജിഎംഒഎയും ഇഎസ്ഐ ഡോക്ടർമാരുടെ സംഘടനയായ കെജിഐഎംഒയും അറിയിച്ചിരുന്നു. സമരം തുടർന്നാലും ഐസിയു, കാഷ്വൽറ്റി, ലേബർ റൂം എന്നിവയിലെ സേവനം മുടക്കില്ല.
സർക്കാരുമായുള്ള ചർച്ചയിലാണ് ഡോക്ടർമാർ സമരം തുടരുമെന്ന് അറിയിച്ചത്. ഡോക്ടർമാരുടെ സുരക്ഷിതത്വം ഉറപ്പാക്കാൻ മുഖ്യമന്ത്രി ഇടപെടണമെന്നും ചട്ടം ഓർഡിനൻസ് ആയി പുറത്തിറക്കണമെന്നും ആവശ്യമുയർന്നു. വിഷയം മുഖ്യമന്ത്രി പിണറായി വിജയനെ ധരിപ്പിക്കാമെന്ന് ചീഫ് സെക്രട്ടറി വി.പി ജോയ് ഉറപ്പ് നൽകി.
ഡോക്ടർമാരുടെ സുരക്ഷ ഉറപ്പുവരുത്തിയുള്ള നിയമത്തിന് വന്ദനയുടെ പേര് നൽകി നീതി നടപ്പാക്കണമെന്നും ഐ.എം.എ ആവശ്യപ്പെട്ടു. ഡോക്ടർ വന്ദനയുടെ മരണത്തിൽ പ്രതിഷേധിച്ച് സംസ്ഥാന വ്യാപകമായി ഡോക്ടർമാർ മിന്നൽ പണിമുടക്ക് നടത്തി. സമരം നാളെ രാവിലെ എട്ടു മണിവരെയാണ്. തുടരെ ഉണ്ടാകുന്ന അക്രമസംഭവങ്ങളും ആരോഗ്യമന്ത്രിയുടെ പ്രതികരണവും ഡോക്ടർമാരെ പ്രകോപിപ്പിച്ചിട്ടുണ്ട്. ഇനിയും സഹിച്ചു നിൽക്കാനാവില്ലെന്നു ഐ.എം.എ വ്യക്തമാക്കി.
കൊട്ടാരക്കര താലൂക്ക് ആശുപത്രിയിൽ ഡോ.വന്ദനാ ദാസിനെ കൊലപ്പെടുത്തിയതിൽ വൻ പ്രതിഷേധമാണ് ഡോക്ടർമാരുടെ നേതൃത്വത്തിൽ ബുധനാഴ്ച സംസ്ഥാനത്ത് അരങ്ങേറിയത്. പോസ്റ്റ്മോർട്ടം നടന്ന തിരുവനന്തപുരം മെഡിക്കൽ കോളജിനു മുന്നിൽ മെഡിക്കൽ വിദ്യാർഥികൾ ഉൾപ്പെടെയുള്ളവർ പോസ്റ്റ്മോർട്ടം നടപടികൾ കഴിയുന്നതു വരെ കുത്തിയിരുന്ന് പ്രതിഷേധിച്ചു.
വൈകിട്ട് നാലു മണിക്ക് പാളയം രക്തസാക്ഷി മണ്ഡപത്തിൽനിന്ന് പ്രകടനമായി വിവിധ മെഡിക്കൽ കോളജുകളിലെ മെഡിക്കൽ വിദ്യാർഥികൾ, ഹൗസ് സർജൻസ്, ജൂനിയർ ഡോക്ടർമാർ, പിജി വിദ്യാർഥികൾ, വിവിധ സംഘടനകളിൽ പ്രവർത്തിക്കുന്ന ഡോക്ടമാർ എന്നിവർ ഉൾപ്പെടെ ആയിരത്തോളം പേർ പ്രകടനമായി സെക്രട്ടറിയേറ്റിനു മുന്നിലെത്തി റോഡ് ഉപരോധിച്ചും പ്രതിഷേധിച്ചു.
