അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.
പറവൂർ ചേന്ദമംഗലം ജംഗ്ഷനിലുള്ള മിയാമി റെസ്റ്റോറന്റിൽ അതിക്രമിച്ചു കയറി റെസ്റ്റോറന്റുടമ സന്തോഷിനെ കൊലപ്പെടുത്തിയ കേസിലെ ഒന്നാംപ്രതി പറവൂർ വെടിമറ സ്വദേശി അനൂപിനെ എറണാകുളം ആറാം അഡീഷണൽ സേഷൻസ് കോടതി ജീവപര്യന്തം തടവിന് ശിക്ഷിച്ചു.2006-ലാണ് കേസിനാസ്പദമായ സംഭവം.
രണ്ടാം പ്രതിയായ സബീർ എന്നയാൾ സന്തോഷ് നടത്തി വന്നിരുന്ന പറവൂർ ചേന്ദമംഗലം ജംഗ്ഷനിലെ മിയാമി റസ്റ്റോറന്റിൽ രാവിലെ എത്തി ചായ ആവശ്യപ്പെടുകയും, ചായ കുടിച്ചതിനു ശേഷം രണ്ടു രൂപ കൊടുക്കുകയും ചെയ്തു . ചായയുടെ വില രണ്ടര രൂപയാണെന്നും 50 പൈസ കൂടി വേണം എന്നും പറഞ്ഞ സന്തോഷിനോട് സബീർ തട്ടി കയറുകയും 100 രൂപ നോട്ട് മേശയിലേക്ക് എറിഞ്ഞു കൊടുത്തതിന് ശേഷം അവിടെ നിന്ന് പോയി. കുറച്ചു കഴിഞ്ഞു സുഹൃത്തുകളായ അനൂപ്, ഷിനോജ്, സുരേഷ്, എന്നിവരെയും കൂട്ടി സംഭവസ്ഥലത്തെത്തി സന്തോഷിനെ ആക്രമിച്ചു കുത്തി കൊലപ്പെടുത്തുകയായിരുന്നു.
കേസിലെ രണ്ടു മുതൽ നാലു വരെയുള്ള പ്രതികളായ സബീർ, ഷിനോജ്, സുരേഷ് എന്നിവർ നേരത്തെ കോടതി മുമ്പാകെ വിചാരണ നേരിട്ടുള്ളതാണ്. രണ്ടും മൂന്നും പ്രതികൾ മനപ്പൂർവ്വമുള്ള നരഹത്യ കുറ്റം ചെയ്തതായി അപ്പോൾ തെളിഞ്ഞതിനാൽ അവരെ ഏഴു വർഷം കഠിന തടവിനു കോടതി ശിക്ഷിച്ചിരുന്നു. നാലാം പ്രതി സുരേഷിനെ നിരപരാധിയായി കണ്ട് വിട്ടയച്ചു. ആദ്യവിചാരണ സമയത്ത് ഒന്നാംപ്രതി അനൂപ് ഒളിവിൽ ആയിരുന്നതിനാൽ അയാൾക്കെതിരെയുള്ള കേസ് വേർപെടുത്തിയാണ് അന്ന് വിചാരണ നടത്തിയത്.
ഒളിവിൽ പോയതിനുശേഷം എൻ ഐ എ കേസിൽ അനൂപ് പ്രതിയാക്കപ്പെടുകയും അറസ്റ്റ് ചെയ്യപ്പെടുകയും ആയിരുന്നു. പിന്നീട് പ്രൊഡക്ഷൻ വാറന്റ് പ്രകാരം ഹാജരാക്കപ്പെട്ട അനൂപ് ജാമ്യത്തിൽ ഇറങ്ങി ഈ കേസിൽ വിചാരണ നേരിടുകയായിരുന്നു. സന്തോഷിന്റെ മരണത്തിനുകാരണമായ മുറിവേൽപ്പിച്ച അനൂപ് കൊലക്കുറ്റം ചെയ്‌തയായി കണ്ടെത്തിയ കോടതി 302 IPC പ്രകാരം അനൂപിനെ ജീവപര്യന്തം തടവിന് ശിക്ഷിച്ചു. കൂടാതെ കടയിൽ അതിക്രമിച്ചു കയറി കുറ്റകൃത്യം ചെയ്‌തതിന് ഏഴു വർഷം തടവും 50, 000 /- രൂപ പിഴയും, പിഴ അടയ്ക്കാത്ത പക്ഷം ആറുമാസം തടവും, സന്തോഷിന്റെ തൊഴിലാളിയായിരുന്ന ശിവദാസിനെ മർദിച്ചതിന് 1000/- രൂപ പിഴയും, പിഴയടക്കാത്ത പക്ഷം ഒരുമാസം തടവിനും കോടതി അനൂപിനെ ശിക്ഷിച്ചു. എറണാകുളം ആറാം അഡിഷണൽ സെഷൻസ് ജഡ്ജ് പ്രദീപ്‌ കുമാർ സി. ആണ് ശിക്ഷാവിധി പ്രസ്താവിച്ചത്.
