അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.
പാലക്കാട്: ജലനിരപ്പ് ഉയര്ന്നതിനെ തുടര്ന്ന് ആളിയാര് ഡാം രാത്രിയോടെ തുറക്കാന് സാധ്യതയെന്ന് പാലക്കാട് ജില്ലാ ഇന്ഫര്മേഷന് ഓഫീസ്. ഡാമിലെ ജലനിരപ്പ് ഇന്ന് ഉച്ചക്ക് രണ്ട് മണിയോടെ 1049.30 അടിയില് എത്തിയിരുന്നു. ഇതേ തുടര്ന്ന് ഡാമിന്റെ സ്പില്വേ ഷട്ടറുകള് തുറക്കാന് സാധ്യതയുണ്ടെന്ന് എക്സിക്യൂട്ടീവ് എന്ജിനീയര് അറിയിച്ചു. പ്രദേശവാസികള് ജാഗ്രത പാലിക്കണമെന്നും അറിയിപ്പുണ്ട്.
അതേസമയം, സംസ്ഥാനത്ത് അടുത്ത അഞ്ച് ദിവസം കൂടി ശക്തമായ മഴ ഉണ്ടാകുമെന്ന് മുന്നറിയിപ്പ്. ചക്രവാതച്ചുഴി നിലനില്ക്കുന്നതിനാല് മഴ തുടരുമെന്ന് കേന്ദ്ര കാലാവസ്ഥാ നിരീക്ഷണ കേന്ദ്രം അറിയിച്ചു. പത്തനംതിട്ട, കോട്ടയം, ഇടുക്കി, എറണാകുളം, പാലക്കാട് എന്നീ ജില്ലകളില് ഒറ്റപ്പെട്ട ഇടങ്ങളില് ഇടിയോട് കൂടിയ മഴയ്ക്ക് സാദ്ധ്യതയുണ്ട്. മണിക്കൂറില് 40 കിലോമീറ്റര് വരെ വേഗതയില് വീശിയടിക്കാവുന്ന കാറ്റിനും സാദ്ധ്യതയുള്ളതായി മുന്നറിയിപ്പ് നല്കിയിട്ടുണ്ട്.
