അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.
ശബരിമല തീര്ത്ഥാടകര്ക്ക് അടിയന്തര വൈദ്യസഹായം ഒരുക്കാന് റാപ്പിഡ് ആക്ഷന് മെഡിക്കല് യൂണിറ്റ് ഉടന് എത്തുമെന്ന് ആരോഗ്യ മന്ത്രി വീണാ ജോര്ജ്. കനിവ് 108 ആംബുലന്സ് പദ്ധതിക്ക് കീഴിലാണ് റാപ്പിഡ് ആക്ഷന് മെഡിക്കല് യൂണിറ്റ് പ്രവര്ത്തനങ്ങള് ഏകോപിപ്പിച്ചിരിക്കുന്നത്. ഇടുങ്ങിയ പാതകളില് സഞ്ചരിക്കാന് കഴിയുന്ന ബൈക്ക് ഫീഡര് ആംബുലന്സ്, ദുര്ഘട പാതകളിലൂടെ സഞ്ചരിക്കാന് കഴിയുന്ന 4×4 റെസ്ക്യു വാന്, ഐസിയു ആംബുലന്സ് എന്നിവയാണ് ശബരിമലയ്ക്കായി സജ്ജമാക്കിയത്. ഒരു രോഗിയെ കിടത്തികൊണ്ട് പോകാന് കഴിയുന്ന തരത്തില് സജ്ജമാക്കിയ സൈഡ് കാറോടുകൂടിയ ബൈക്ക് ഫീഡര് ആംബുലന്സ് ആണ് ഇതില് പ്രധാനം. മൂന്ന് വാഹനങ്ങളിലും ഓക്സിജന് ഉള്പ്പടെയുള്ള സംവിധാനം ലഭ്യമാണ്. ശബരിമല തീര്ത്ഥാടകര്ക്ക് ഈ സേവനങ്ങള് ഏറെ സഹായകരമാകും.
മറ്റ് ആംബുലന്സുകള്ക്ക് കടന്നു ചെല്ലാന് പ്രയാസമുള്ള ഇടുങ്ങിയ വഴികളിലും തിരക്കുള്ള പ്രദേശങ്ങളിലും എത്തി രോഗികള്ക്ക് പരിചരണം നല്കി സമീപത്തുള്ള ആശുപത്രിയില് അല്ലെങ്കില് റാപിഡ് ആക്ഷന് മെഡിക്കല് യൂണിറ്റിന്റെ ഭാഗമായി സജ്ജമാക്കിയിരിക്കുന്ന കനിവ് 108 ആംബുലന്സുകളിലേക്കോ എത്തിക്കുകയാണ് ഇവയുടെ പ്രധാന പ്രവര്ത്തനം. നഴ്സായ എമര്ജന്സി മെഡിക്കല് ടെക്നീഷ്യന് ആയിരിക്കും ഈ വാഹനം പ്രവര്ത്തിപ്പിക്കുന്നത്. ഓക്സിജന് സംവിധാനം ഉള്പ്പടെ ഇതിനായി ഇതില് സജ്ജമാക്കിയിട്ടുണ്ട്.
