അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.
മുംബൈ: പഴം ഇറക്കുമതിയുടെ മറവിൽ ദക്ഷിണാഫ്രിക്കയിൽ നിന്ന് ലഹരി വസ്തുക്കൾ കടത്തിയ കേസിൽ മലയാളി അറസ്റ്റിൽ. 1476 കോടി രൂപയുടെ ലഹരി വസ്തുക്കളാണ് ഇയാൾ കടത്തിയത്. മുംബൈ വാസിയിലെ യമ്മിറ്റോ ഇന്റർനാഷനൽ ഫുഡ്സ് മാനേജിങ് ഡയറക്ടറും എറണാകുളം കാലടി സ്വദേശിയുമായ വിജിൻ വർഗീസിനെയാണ് അറസ്റ്റ് ചെയ്തത്. മറ്റൊരു പ്രതി മോർ ഫ്രഷ് എക്സ്പോർട്സ് ഉടമ തച്ചാപറമ്പൻ മൻസൂറിനായി അന്വേഷണം ആരംഭിച്ചു.198 കിലോ മെത്താഫെറ്റാമിനും ഒമ്പത് കിലോ കൊക്കെയ്നുമാണ് ഇവർ മുംബൈ തുറമുഖം വഴി കപ്പലില്‍ കടത്തിയത്. ഇവ ട്രക്കിൽ കൊണ്ടുപോകുന്നതിനിടെയാണ് പിടികൂടിയത്.
ഓറഞ്ചിനിടയിൽ ഒളിപ്പിച്ച നിലയിലായിരുന്നു ലഹരി വസ്തുക്കൾ. രാജ്യത്തെ ഏറ്റവും വലിയ ലഹരിവേട്ടകളിൽ ഒന്നാണ് ഇതെന്ന് ഡി.ആർ.ഐ അറിയിച്ചു. സ്ഥാപനത്തിന്റെ വെയർഹൗസും ശീതീകരണികളും കാലടിയിലാണ്. കോവിഡ് സമയത്ത്, മൻസൂർ മുഖേന വിജിൻ ദുബൈയിലേക്ക് മാസ്ക് കയറ്റുമതി ചെയ്തിരുന്നു. ഇതിന്‍റെ മറവിലും ലഹരിക്കടത്ത് നടന്നോയെന്ന് അന്വേഷിക്കുന്നുണ്ട്. പിന്നീട് മൻസൂറിന്റെ സഹായത്തോടെ ദക്ഷിണാഫ്രിക്കയിൽനിന്ന് ഓറഞ്ച് ഇറക്കുമതി ചെയ്ത് മികച്ച ലാഭം നേടി. ഇതോടെ പരസ്പര ധാരണയോടെ വിജിനും മൻസൂറും ഇത് തുടർന്നു.
