അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.
കൽപ്പറ്റയിലെ രാഹുല് ഗാന്ധിയുടെ ഓഫീസിലെ ഗാന്ധി ചിത്രം തകര്ത്ത സംഭവത്തില് നാല് കോണ്ഗ്രസ് പ്രവര്ത്തകര് അറസ്റ്റിലായി. രാഹുല് ഗാന്ധിയുടെ ഓഫീസ് സ്റ്റാഫ് രതീഷ് ഉള്പ്പടെയാണ് അറസ്റ്റിലായത്.
ബഫര്സോണ് വിഷയത്തില് വയനാട് എംപി രാഹുല് ഗാന്ധി ഇടപെടുന്നില്ലെന്നാരോപിച്ച് എംപി ഓഫീസിലേക്ക് എസ്എഫ്ഐക്കാര് പ്രതിഷേധമാര്ച്ച് നടത്തിയിരുന്നു. മാര്ച്ചില് ഓഫീസിന്റെ ജനല്ചില്ലുകളും മറ്റും പ്രതിഷേധക്കാര് നശിപ്പിച്ചിരുന്നു. ഓഫീസിലെ ഗാന്ധിജിയുടെ ചിത്രവും ബഹളത്തിൽ തകര്ന്നു. സംഭവുമായി ബന്ധപ്പെട്ട് 29 എസ്എഫ്ഐ പ്രവര്ത്തകരെ റിമാന്ഡ് ചെയ്തിരുന്നു.
ഓഫീസിനകത്തേക്ക് അതിക്രമിച്ചു കയറിയെങ്കിലും ഗാന്ധിജിയുടെ ചിത്രം തകര്ത്തത് തങ്ങളല്ലെന്നായിരുന്നു എസ്എഫ്ഐക്കാർ പറഞ്ഞത്. ഗാന്ധി ചിത്രം തകര്ത്തതില് പൊലീസ് വിശദമായി അന്വേഷണം നടത്തിയതിന് പിന്നാലെയാണ് നാല് കോണ്ഗ്രസ് പ്രവര്ത്തകരെ അറസ്റ്റ് ചെയ്തത്.
