അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.ന്യൂഡൽഹി: സംരക്ഷിത വനമേഖലകളുടെ അതിര്ത്തിയില് നിന്നും ഒരു കിലോമീറ്റര് പരിസ്ഥിതി ലോല മേഖല നിര്ബന്ധമായും വേണമെന്ന് സുപ്രീം കോടതി. ഈ മേഖലയില് ഒരു തരത്തിലുള്ള വികസന-നിര്മാണ പ്രവര്ത്തനങ്ങള്ക്കും അനുമതിയില്ലെന്ന് കോടതി വ്യക്തമാക്കി. വനസംരക്ഷണവുമായി ബന്ധപ്പെട്ട ടി.എന് ഗോദവര്മന് തിരുമുല്പാടിന്റെ ഹര്ജിയിലാണ് സുപ്രീം കോടതിയുടെ നിര്ദേശം.
നിലവില് ഈ മേഖലയില് നടക്കുന്ന വികസന പ്രവര്ത്തനങ്ങള് അതാതു സംസ്ഥാനങ്ങളിലെ ചീഫ് ഫോറസ്റ്റ് കണ്സര്വേറ്ററുടെ അനുമതിയോടു കൂടി മാത്രമേ തുടരാന് കഴിയുവെന്നും സുപ്രീം കോടതി ഉത്തരവില് പറയുന്നു. സംരക്ഷിത വനമേഖലയുടെ അനുബന്ധ പരിസ്ഥിതലോല പ്രദേശങ്ങളില് നിലവിലുള്ള നിര്മിതികളെക്കുറിച്ച് മൂന്നു മാസത്തിനകം സംസ്ഥാനങ്ങളിലെ ചീഫ് വൈല്ഡ് ലൈഫ് കണ്സര്വേറ്റര്മാര് റിപ്പോര്ട്ട് നല്കണമെന്നും കോടതി നിര്ദേശം നൽകി.
നിലവില് ഇത്തരം പ്രദേശങ്ങളില് ഒരു കിലോമീറ്ററില് അധികം ബഫര് സോണ് ഉണ്ടെങ്കില് അതേപടി തന്നെ തുടരണമെന്നും കോടതി വ്യക്തമാക്കി.
