അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.
ചങ്ങനാശ്ശേരി: പായിപ്പാട് യുവതിയെ ബലാത്സംഗം ചെയ്ത സംഭവത്തിൽ യുവാവ് അറസ്റ്റിൽ. തൃക്കൊടിത്താനം കിളിമല തടത്തിൽ അനീഷിനെയാണ് (38) തൃക്കൊടിത്താനം പൊലീസ് അറസ്റ്റ് ചെയ്തത്. കോടതിയിൽ ഹാജരാക്കി റിമാൻഡ് ചെയ്തു. വ്യാഴാഴ്ച പകൽ 12 മണിയോടെയായിരുന്നു സംഭവം.
ചീര വിൽക്കാനെന്ന വ്യാജേനയാണ് ഇയാൾ ഇവരുടെ വീട്ടിലെത്തിയത്. വീട്ടിൽ യുവതി തനിച്ചായിരുന്ന സമയം അതിക്രമിച്ച് വീട്ടിൽകയറി ക്രൂരമായി മർദിച്ച് അവശയാക്കി ബോധംകെടുത്തിയ ശേഷമായിരുന്നു ബലാത്സംഗം ചെയ്തത്. വിവിധ ലൈംഗിക അതിക്രമ കേസുകളിൽ പ്രതികളായവരുടെ ഫോട്ടോ യുവതിയെ കാണിച്ചതിനെ തുടർന്നാണ് പ്രതിയെ തിരിച്ചറിഞ്ഞത്. വെള്ളിയാഴ്ച നാട്ടുകാർ ചേർന്ന് ആരമല ഭാഗത്തുവെച്ച് അനീഷിനെ പിടികൂടി പൊലീസിൽ ഏൽപിക്കുകയായിരുന്നു.
ശനിയാഴ്ച യുവതി ഇയാളെ തിരിച്ചറിഞ്ഞതോടെ പ്രതിയുടെ അറസ്റ്റ് രേഖപ്പെടുത്തുകയായിരുന്നുവെന്ന് തൃക്കൊടിത്താനം എസ്.എച്ച്.ഒ ഇ. അജീബ് പറഞ്ഞു.
ശരീരമാസകലം സാരമായി പരിക്കേറ്റ യുവതി ആശുപത്രിയിൽ ചികിത്സയിലാണ്.
