അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.തൃശ്ശൂർ: പുതുക്കാട് (Puthukkad Train Derailed) ഗുഡ്സ് ട്രെയിൻ പാളം തെറ്റിയതിനെത്തുടർന്ന് ട്രെയിൻ ഗതാഗതം തടസ്സപ്പെടുന്നു. ഇരു വശത്തേക്കുമുള്ള ഗതാഗതം തല്ക്കാലം നിർത്തിവെച്ചിരിക്കുകയാണ്. ഇതേതുടർന്ന് പല ട്രെയിനുകളും റദ്ദാക്കി. റൂട്ടിൽ നിരവധി ട്രെയിനുകൾ വൈകിയോടുകയാണ്. ട്രെയിൻ പാളത്തിൽ നിന്ന് മാറ്റാനുള്ള നടപടി തുടങ്ങിയിട്ടുണ്ട്.
നാല് പാസഞ്ചറുകളാണ് റദ്ദാക്കിയത്. എറണാകുളം – ഗുരുവായൂർ, എറണാകുളം – പാലക്കാട്, നിലമ്പൂർ – കോട്ടയം, എറണാകുളം – ഷൊർണ്ണൂർ പാസഞ്ചറുകളാണ് റദ്ദാക്കിയത്. കേരള എക്സ്പ്രസ് ഒറ്റപ്പാലത്ത് പിടിച്ചിട്ടിരിക്കുകയാണ്. ബംഗളൂരു-എറണാകുളം ഇന്റർസിറ്റി എക്സ്പ്രസും പിടിച്ചിട്ടിരിക്കുകയാണ്. കോഴിക്കോട്- തിരുവനന്തപുരം ജനശതാബ്ദി ഷൊർണൂരിൽ നിർത്തിയിടും.
പുതുക്കാട് റയിൽവെ സ്റ്റേഷന് സമീപം തെക്കേ തുറവ് ഗേറ്റിന് അടുത്താണ് അപകടം ഉണ്ടായത്. ഇരുമ്പനത്തേക്ക് പോകുന്ന ചരക്ക് തീവണ്ടിയാണ് ഉച്ചയക്ക് രണ്ട് മണിയോടെ അപകടത്തിൽപ്പെട്ടത്. അറ്റകുറ്റ പണി നടക്കുന്ന സ്ഥലമായതിനാൽ വളരെ മെല്ലെയാണ് ട്രെയിൻ പോയിരുന്നത്. ബോഗികളിൽ ചരക്കുണ്ടായിരുന്നില്ല. ഇതും അപകടത്തിന്റെ വ്യാപ്തി കുറച്ചു.
തടസപ്പെട്ട ട്രെയിൻ ഗതാഗതത്തിന് പകരമായി കൂടുതൽ ബസ് സർവ്വീസുകൾ കെഎസ്ആർടിസി നടത്തുമെന്ന് ഗതാഗതമന്ത്രി ആന്റണി രാജു അറിയിച്ചു. നിലവിൽ തൃശ്ശൂരിൽ നിന്നും തിരുവനന്തപുരത്തേക്ക് അഞ്ചും, എറണാകുളത്ത് നിന്നും ആറും, ആലപ്പുഴയിൽ നിന്നും ആറും അധിക ബസുകൾ സർവ്വീസ് നടത്തിയിട്ടുണ്ട്.
അടിയന്തിരമായി ബസ് സർവ്വീസുകൾ ആവശ്യമുണ്ടെങ്കിൽ കെഎസ്ആർടിസിയുടെ കൺട്രോൽ റൂമിൽ ബന്ധപ്പെടാവുന്നതാണ്. (+91 471-2463799, +91 9447071021, 1800 599 4011)
