അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.കൊച്ചി: അന്വേഷണ ഉദ്യോഗസ്ഥരെ അപായപ്പെടുത്താന് ഗൂഢാലോചന നടത്തിയെന്ന കേസില് ദിലീപിനും കൂട്ടാളികള്ക്കും ഹൈക്കോടതി മുന്കൂര് ജാമ്യം അനുവദിച്ചത് അഞ്ചു വ്യവസ്ഥകളില്. ജാമ്യ വ്യവസ്ഥകള് ലംഘിച്ചാല് പ്രതികളെ അറസ്റ്റ് ചെയ്യാന് പ്രോസിക്യൂഷന് കോടതിയെ സമീപിക്കാമെന്ന് ജസ്റ്റിസ് പി ഗോപിനാഥ് വിധിയില് വ്യക്തമാക്കി.
അന്വേഷണവുമായി സഹകരിക്കണമെന്ന കര്ശന നിര്ദേശം കോടതി ദിലീപിന് നല്കിയിട്ടുണ്ട്. അന്വേഷണവുമായി സഹകരിക്കാത്തപക്ഷം പ്രോസിക്യൂഷന് അറസ്റ്റ് നടപടികള്ക്കു വേണ്ടി കോടതിയെ സമീപിക്കാവുന്നതാണ്. സാക്ഷികളെ സ്വാധീനിക്കാന് പാടില്ലെന്നും പ്രതികള് ഒരുലക്ഷം രൂപയുടെ രണ്ട് ആള് ജാമ്യം എടുക്കണമെന്നും കോടതി നിര്ദേശിച്ചു. മാത്രമല്ല, പ്രതികള് പാസ്പോര്ട്ട് കോടതിയില് സമര്പ്പിക്കുകയും വേണം.
സംവിധായകന് ബാലചന്ദ്രകുമാറിൻ്റെ വെളിപ്പെടുത്തലിൻ്റെ അടിസ്ഥാനത്തില് രജിസ്റ്റര് ചെയ്ത കേസില് ദിലീപ് ആയിരുന്നു ഒന്നാം പ്രതി. സഹോദരന് അനൂപ്, സഹോദരീഭര്ത്താവ് ടി എന് സുരാജ്, ഡ്രൈവര് അപ്പുവെന്ന കൃഷ്ണപ്രസാദ്, സുഹൃത്തായ ബൈജു ചെങ്ങമനാട്, മറ്റൊരു സുഹൃത്തും ഹോട്ടലുടമയുമായ ആലുവ സ്വദേശി ശരത് എന്നിവരുടെ മുന്കൂര് ജാമ്യഹര്ജികളാണ് കോടതിയുടെ പരിഗണനയിലുണ്ടായിരുന്നത്.
