അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.തിരുവനന്തപുരം: കൂനൂര് ഹെലികോപ്ടര് അപകടത്തില് (Coonoor Helicopter Crash) മരണപ്പെട്ട വ്യോമസേനയിലെ ജൂനിയര് വാറന്റ് ഓഫീസര് എ പ്രദീപിന്റെ ഭാര്യ ശ്രീലക്ഷ്മിക്ക് തൃശ്ശൂര് താലൂക്ക് ഓഫീസില് നിയമനം നല്കിയതായി റവന്യൂ മന്ത്രി കെ രാജന്. എംകോം ബിരുദധാരിയായ ശ്രീലക്ഷ്മിക്ക് ക്ലറിക്കല് തസ്തികയിലാണ് ജോലി നല്കിയിരിക്കുന്നത്. ഇതുമായി ബന്ധപ്പെട്ട സൈനികക്ഷേമ വകുപ്പിന്റെ ഉത്തരവ് ഇറങ്ങി.
ഹെലികോപ്ടര് അപകടത്തില് കൊല്ലപ്പെട്ട പ്രദീപിന്റെ ഭാര്യയ്ക്ക് ജോലി നല്കാന് അപകടം നടന്ന് ഒരാഴ്ചയ്ക്കകം തന്നെ മന്ത്രിസഭാ യോഗം തീരുമാനമെടുത്തിരുന്നു. സാധാരണ നിലയില് യുദ്ധത്തിലോ യുദ്ധസമാനമായ സാഹചര്യത്തിലോ മരണപ്പെടുന്ന സൈനികരുടെ ആശ്രിതര്ക്ക് ജോലി നല്കുന്നതിനാണ് നിയമത്തില് വ്യവസ്ഥയുള്ളത്. എന്നാല് പ്രദീപിന്റെ കാര്യത്തില് പ്രത്യേക പരിഗണന നല്കി ഭാര്യയ്ക്ക് ജോലി നല്കാന് സര്ക്കാര് തീരുമാനിക്കുകയായിരുന്നു.
