അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.ന്യൂഡൽഹി: 1983ലെ ഇന്ത്യയുടെ ക്രിക്കറ്റ് ലോകകപ്പ് വിജയകഥ പറയുന്ന ചിത്രം ’83’ന് ഡൽഹി സർക്കാർ നികുതി ഒഴിവാക്കി. കബീർ ഖാൻ സംവിധാനം ചെയ്യുന്ന സിനിമയിൽ രൺവീർ സിങ് ആണ് നായകൻ. കബീർ ഖാൻ തന്നെയാണ് തൻ്റെ ഇൻസ്റ്റഗ്രാം പ്രൊഫൈലിലൂടെ ഈ വിവരം പങ്കുവച്ചത്.
1983ലെ ലോകകപ്പ് ഫൈനലിൽ വെസ്റ്റ് ഇൻഡീസിനെ തോൽപിച്ച് കപിൽ ദേവിന്റെ നായകത്വത്തിൽ ഇന്ത്യ നേടിയ വിജയമാണ് ’83’ന്റെ പ്രമേയം. ഡിസംബർ 24ന് ഹിന്ദി, മലയാളം, തമിഴ്, തെലുങ്ക്, കന്നഡ ഭാഷകളിൽ ചിത്രം തീയറ്ററുകളിലെത്തും. ഡൽഹിയിൽ സിനിമ നികുതിരഹിതമാക്കിയതിന് മുഖ്യമന്ത്രി അരവിന്ദ് കെജ്രിവാളിനും ഉപമുഖ്യമന്ത്രി മനീഷ് സിസോദിയക്കും കബീർ ഖാൻ നന്ദി പറഞ്ഞു. ഇന്ത്യയുടെ ചരിത്ര വിജയം കൂടുതൽ കാഴ്ചക്കാരിലേക്ക് എത്താൻ ഈ നീക്കം സഹായിക്കുമെന്ന് കബീർ ഖാൻ ഇൻസ്റ്റഗ്രാമിൽ കുറിച്ചു.
ടീം ക്യാപ്റ്റൻ കപിൽ ദേവിനെ രൺവീർ സിംഗാണ് അവതരിപ്പിക്കുന്നത്. ഇതിനകം തന്നെ സിനിമയിൽ താരത്തിൻ്റെ അപ്പിയറൻസ് ഏറെ ചർച്ച ആയിക്കഴിഞ്ഞു. കപിലിൻ്റെ ഭാര്യ റോമി ഭാട്ടിയ ആയി എത്തുന്നത് ദീപിക പദുക്കോണാണ്. ഹാർഡി സന്ധു, ജീവ, തഹിർ രാജ് ഭാസിൻ, സാഖിബ് സലീം, എമ്മി വിർക്, പങ്കജ് ത്രിപാഠി, ജതിൻ സർന, ചിരാഗ് പാട്ടീൽ, ദിൻകർ ശർമ്മ, നിഷാന്ത് ദഹിയ, സാഹിൽ ഖട്ടാർ, ആദിനാഥ് കോത്താരി, ധൈര്യ കർവ, ആർ ബദ്രി തുടങ്ങിയവരാണ് സിനിമയിലെ മറ്റ് താരങ്ങൾ.
