അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.
ന്യൂഡല്ഹി: കര്ഷകരുടെ ആവശ്യങ്ങള് കേന്ദ്ര സര്ക്കാര് പൂര്ണ്ണമായും നിറവേറ്റുന്നതുവരെ പ്രക്ഷോഭം അവസാനിപ്പിക്കില്ലെന്ന് ഭാരതീയ കിസാന് യൂണിയന് നേതാവ് രാകേഷ് ടികായത്ത്. ആവശ്യങ്ങള് അംഗീകരിച്ചെന്നും പ്രതിഷേധം അവസാനിപ്പിക്കണമെന്നും സര്ക്കാര് നിര്ദേശിച്ചിട്ടുണ്ട്. എന്നാല് നിര്ദേശങ്ങളില് ഒരു വ്യക്തതയുമില്ലെന്ന് ടികായത്ത് പറഞ്ഞു.
കര്ഷകരുടെ ആശങ്കകള് സംബന്ധിച്ച് കര്ഷക സംഘടനകള് നാളെ രണ്ടു മണിക്ക് യോഗം ചേരും. കര്ഷകര് എങ്ങോട്ടേക്കും നിലവില് പോകാന് ഉദ്ദേശിക്കുന്നില്ല. നിര്ദേശങ്ങളില് പലതും കേന്ദ്ര സര്ക്കാര് ഒരു വര്ഷമായി പറയുന്ന കാര്യങ്ങള് തന്നെയാണ്. എന്നാല് എല്ലാം പരിഹരിക്കുന്നത് വരെ ആരും വീട്ടിലേക്ക് മടങ്ങുന്നില്ലെന്നും അദ്ദേഹം വ്യക്തമാക്കി.
കാര്ഷിക നിയമം പിന്വലിച്ചതിന് പിന്നാലെ കര്ഷകരുടെ മറ്റു ആവശ്യങ്ങള് അംഗീകരിക്കാമെന്ന് അറിയിച്ച് കേന്ദ്ര സര്ക്കാര് ഇന്ന് കര്ഷക നേതാക്കള്ക്ക് കത്ത് നല്കിയിരുന്നു.
കര്ഷകരുടെ ആവശ്യങ്ങള്
1. സമഗ്രമായ ഉല്പാദനച്ചെലവ് അടിസ്ഥാനമാക്കിയുള്ള എംഎസ്പി എല്ലാ കാര്ഷിക ഉല്പന്നങ്ങള്ക്കും എല്ലാ കര്ഷകര്ക്കും നിയമപരമായ അവകാശമാക്കണം.
2. കേന്ദ്രം മുന്നോട്ടുവെച്ച കരട് വൈദ്യുതി നിയമ ഭേദഗതി ബില് 2020/2021 പിന്വലിക്കുക.
3. ഡല്ഹിയിലും സമീപ പ്രദേശങ്ങളിലും കര്ഷകരെ ശിക്ഷിക്കുന്നതിനുള്ള എയര് ക്വാളിറ്റി മാനേജ്മെന്റ് കമ്മീഷനിലെ വ്യവസ്ഥകള് നീക്കംചെയ്യുക
4. ഡല്ഹി, ഹരിയാണ, ചണ്ഡീഗഢ്, ഉത്തര്പ്രദേശ് തുടങ്ങിയ സംസ്ഥാനങ്ങളില് ഈ പ്രക്ഷോഭത്തിനിടെ രജിസ്റ്റര് ചെയ്ത ആയിരക്കണക്കിന് കര്ഷകര്ക്കെതിരെയുള്ള കേസുകള് ഉടന് പിന്വലിക്കുക.
5. ലഖിംപൂര് ഖേരി സംഘര്ഷവുമായി ബന്ധപ്പെട്ട് ആരോപണവിധേയനായ കേന്ദ്ര ആഭ്യന്തര സഹമന്ത്രി അജയ് മിശ്രയെ കേന്ദ്രമന്ത്രിസഭയില് നിന്ന് പുറത്താക്കുകയും അറസ്റ്റ് ചെയ്യുകയും ചെയ്യുക.
6. പ്രക്ഷോഭത്തില് 700 കര്ഷകര്ക്ക് ജീവന് നഷ്ടപ്പെട്ടു. ഇവരുടെ കുടുംബങ്ങള്ക്ക് നഷ്ടപരിഹാരം നല്കി പുനരധിവസിപ്പിക്കണം. മരിച്ച കര്ഷകരുടെ സ്മരണയ്ക്കായി സ്മാരകം നിര്മിക്കാന് സിംഘു അതിര്ത്തിയില് ഭൂമി നല്കണം.
