അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.
ജയ്പുർ: മഹാരാഷ്ട്രക്ക് പിന്നാലെ രാജസ്ഥാനിലും കോവിഡ് വൈറസിന്റെ വകഭേദമായ ഒമിക്രോൺ സ്ഥിരീകരിച്ചു. രാജസ്ഥാനിൽ ഒരു കുടുംബത്തിലെ ഒമ്പത് പേർക്കാണ് രോഗം സ്ഥിരീകരിച്ചത്. ഇവർ ദക്ഷിണാഫ്രിക്ക സന്ദർശിച്ചിരുന്നു. ഇതോടെ രാജ്യത്ത് ഒമിക്രോൺ കേസുകൾ 21 ആയി.
രാജസ്ഥാനിലെ ജയ്പുരിലാണ് രോഗം സ്ഥിരീകരിച്ചത്. ദക്ഷിണാഫ്രിക്കയിൽനിന്നും നവംബർ 15ന് എത്തിയതാണ് ഇവർ.
ഇന്ന് മഹാരാഷ്ട്രയിൽ ഏഴ് പേർക്കും ഡൽഹിയിൽ ഒരാൾക്കും ഒമിക്രോണ് സ്ഥിരീകരിച്ചിരുന്നു. മഹാരാഷ്ട്രയിൽ ഇതുവരെ എട്ട് പേർക്കാണ് ഒമിക്രോണ് സ്ഥിരീകരിച്ചിരിക്കുന്നത്. ഇന്ന് രോഗം സ്ഥിരീകരിച്ച നാല് പേർ വിദേശത്തുനിന്നും എത്തിയവരാണ്. മൂന്ന് പേർ ഇവരുമായി സന്പർക്കത്തിൽ ഏർപ്പെട്ടവരാണെന്നും മഹാരാഷ്ട്ര ആരോഗ്യവകുപ്പ് അറിയിച്ചു.
രാജ്യത്ത് കർണാടകയിലാണ് ആദ്യം ഒമിക്രോണ് സ്ഥിരീകരിക്കുന്നത്. കർണാടകയിൽ രണ്ട് പേർക്കാണ് രോഗം സ്ഥിരീകരിച്ചത്. പിന്നാലെ ഗുജറാത്തിലും മഹാരാഷ്ട്രയിലും ഓരോരുത്തർക്ക് വീതം രോഗം സ്ഥിരീകരിച്ചിരുന്നു.
