ഇന്ത്യയ്ക്ക് തോല്‍വി; പരമ്പര സ്വന്തമാക്കി ഓസ്‌ട്രേലിയ

സിഡ്‌നി: ഓസ്ട്രേലിയക്കെതിരെ ഇന്ത്യക്ക് തുടർച്ചയായ രണ്ടാം തോൽവി. പരമ്പരയിലെ രണ്ടാം മത്സരത്തിലും ഇന്ത്യയെ തകര്‍ത്ത് ഓസീസ് പരമ്പര (2-0) ജയം സ്വന്തമാക്കി. ഓസ്ട്രേലിയ മുന്നോട്ടുവച്ച 390 റൺസ് എന്ന കൂറ്റൻ വിജയലക്ഷ്യം പിന്തുടർന്നിറങ്ങിയ ഇന്ത്യക്ക് നിശ്ചിത 50 ഓവറിൽ 9 വിക്കറ്റ് നഷ്ടത്തിൽ 338 റൺസെടുക്കാനേ സാധിച്ചുള്ളൂ. ഇന്ത്യക്കായി വിരാട് കോലി 89 റൺസെടുത്ത് ടോപ്പ് സ്കോററായി. ലോകേഷ് രാഹുൽ 76 റൺസെടുത്തു.

കൂറ്റൻ വിജയലക്ഷ്യം പിന്തുടർന്നിറങ്ങിയ ഇന്ത്യക്ക് ഓപ്പണർമാർ ചേർന്ന് ഭേദപ്പെട്ട തുടക്കം നൽകി. ആദ്യ വിക്കറ്റിൽ 58 റൺസാണ് മായങ്ക്-ധവാൻ സഖ്യം കൂട്ടിച്ചേർത്തത്. ധവാനെ (30) സ്റ്റാർക്കിൻ്റെ കൈകളിലെത്തിച്ച ഹേസൽവുഡ് ആണ് ഓസീസിന് ആദ്യ ബ്രേക്ക്ത്രൂ സമ്മാനിച്ചത്. ഏറെ വൈകാതെ മായങ്കും (28) മടങ്ങി. മായങ്കിനെ കമ്മിൻസിൻ്റെ പന്തിൽ അലക്സ് കാരി പിടികൂടുകയായിരുന്നു.

പിന്നാലെ ക്രീസില്‍ ഒന്നിച്ച ക്യാപ്റ്റന്‍ വിരാട് കോലിയും ശ്രേയസ് അയ്യരും നാലാം വിക്കറ്റില്‍ 93 റണ്‍സ് കൂട്ടിച്ചേര്‍ത്തു. 36 പന്തില്‍ നിന്ന് അഞ്ചു ഫോറുകളടക്കം 38 റണ്‍സെടുത്ത അയ്യരെ സ്റ്റീവ് സ്മിത്ത് തകര്‍പ്പനൊരു ക്യാച്ചിലൂടെ പുറത്താക്കുകയായിരുന്നു.

നാലാം വിക്കറ്റില്‍ കെ.എല്‍ രാഹുലിനെ കൂട്ടുപിടിച്ച് കോലി 72 റണ്‍സിന്റെ കൂട്ടുകെട്ടുണ്ടാക്കി. 87 പന്തില്‍ നിന്ന് രണ്ടു സിക്സും ഏഴു ഫോറുമായി സെഞ്ചുറിയിലേക്ക് കുതിക്കുകയായിരുന്ന കോലിയെ ഹെന്റിക്വസ് ഡൈവിങ് ക്യാച്ചിലൂടെ പുറത്താക്കുകയായിരുന്നു.

അഞ്ചാം വിക്കറ്റില്‍ രാഹുല്‍ – ഹാര്‍ദിക് പാണ്ഡ്യ സഖ്യം 63 റണ്‍സ് ചേര്‍ത്തു. 66 പന്തില്‍ നിന്ന് അഞ്ചു സിക്‌സും നാലു ഫോറുമടക്കം 76 റണ്‍സെടുത്ത രാഹുല്‍ 44-ാം ഓവറിലാണ് പുറത്തായത്.

ഹാര്‍ദിക് പാണ്ഡ്യ (28), രവീന്ദ്ര ജഡേജ (24), മുഹമ്മദ് ഷമി (1), ബുംറ (0) എന്നിവരാണ് പുറത്തായ മറ്റ് ഇന്ത്യന്‍ താരങ്ങള്‍.

ഓസീസിനായി പാറ്റ് കമ്മിന്‍സ് മൂന്നു വിക്കറ്റ് വീഴ്ത്തി. ജോഷ് ഹെയ്‌സല്‍വുഡ്, ആദം സാംപ എന്നിവര്‍ രണ്ടു വിക്കറ്റ് വീതം വീഴ്ത്തി.

നേരത്തെ, ടോസ് നേടി ബാറ്റിംഗ് തിരഞ്ഞെടുത്ത ഓസീസ് നിശ്ചിത 50 ഓവറിൽ 4 വിക്കറ്റ് നഷ്ടത്തിലാണ് 389 റൺസെടുത്തത്. സ്റ്റീവ് സ്മിത്തിന്‍റെ തുടര്‍ച്ചയായ രണ്ടാം സെഞ്ചുറിയുടെയും(64 പന്തില്‍ 104), ഡേവിഡ് വാര്‍ണര്‍(77 പന്തില്‍ 83), ആരോണ്‍ ഫിഞ്ച്(69 പന്തില്‍ 60), ലാബുഷെയ്ന്‍(61 പന്തില്‍ 70), മാക്സ്‌വെല്‍(29 പന്തില്‍ 63) എന്നിവരുടെ അര്‍ധസെഞ്ചുറികളുടെയും മികവിലാണ് കൂറ്റന്‍ സ്കോര്‍ ഉയര്‍ത്തിയത്.

ഏഴു ബൗളര്‍മാരാണ് ഇന്ത്യയ്ക്കായി ഇന്ന് പന്തെറിഞ്ഞത്. ഷമി ഒമ്പത് ഓവറില്‍ 73 റണ്‍സ് വഴങ്ങിയാണ് ഒരു വിക്കറ്റെടുത്തത്. 10 ഓവര്‍ എറിഞ്ഞ ബുംറ 79 റണ്‍സ് വിട്ടുകൊടുത്ത് ഒരു വിക്കറ്റ് സ്വന്തമാക്കി. ഏഴ് ഓവര്‍ എറിഞ്ഞ നവ്ദീപ് സെയ്നി വഴങ്ങിയത് 70 റണ്‍സാണ്. ഒമ്പത് ഓവര്‍ എറിഞ്ഞ ചാഹല്‍ 71 റണ്‍സും വിട്ടുകൊടുത്തു.