അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.ബ്യൂണസ് അയേഴ്സിലെ തെരുവുകളിൽ നിന്ന് ഫുട്ബോൾ ലോകത്തില് തന്നെ കിരീടം വയ്ക്കാത്ത രാജാവായി വാഴ്ത്തപ്പെട്ട ഡിയേഗോ മറഡോണയെന്ന ഇതിഹാസം ഓര്മ്മയായിരിക്കുന്നു. 1977 മുതല് ഒന്നര പതിറ്റാണ്ടിലേറെ കാലം പുല്മൈതാനത്ത് കാലുകൊണ്ട് മാത്രമല്ല ‘കൈ’കൊണ്ടും ചരിത്രം രചിച്ച ദൈവമാണ് മറഡോണ. അസാമാന്യ വേഗവും ഡ്രിബിളിങ് പാടവവും പന്തിനെ യഥേഷ്ടം ചൊല്പ്പടിക്ക് നിര്ത്താനുള്ള കഴിവും കൊണ്ട് ദൈവ സമാനമായ പ്രതിഭ.
1960 ഒക്ടോബറില് അര്ജന്റീനയിലെ ബ്യൂണസ് അയേഴ്സിലെ വില്ല ഫിയോറിത്തോ പ്രവിശ്യയിലെ ലാനസിലാണ് മറഡോണയുടെ ജനനം. ഡോണ് ഡീഗോ- ഡാല്മ സാല്വദോറ ഫ്രാങ്കോ ദമ്പതികളുടെ എട്ടു മക്കളില് അഞ്ചാമനായിരുന്നു ഡീഗോ അര്മാന്ഡോ മറഡോണ. റോമന് കാത്തലിക് കുടുംബമായിരുന്നു അദ്ദേഹത്തിന്റേത്. മറഡോണയുടെ പേരിലെ അര്മാന്ഡോ എന്ന ഭാഗത്തിന്റെ അര്ത്ഥം സൈന്യത്തിലെ അംഗം എന്നായിരുന്നു.
ദാരിദ്ര്യം നിറഞ്ഞതായിരുന്നു മറഡോണയുടെ കുട്ടിക്കാലം. ഫാക്ടറി ജീവനക്കാരനായിരുന്ന അച്ഛന് ഡോണിന് മൂന്ന് ആണ്കുട്ടികളും അഞ്ചു പെണ്കുട്ടികളും അടങ്ങുന്ന ആ കുടുംബം പുലര്ത്താന് സാധിച്ചിരുന്നില്ല. ഫുട്ബോളുമായുള്ള കുഞ്ഞു മറഡോണയുടെ ബന്ധം ആരംഭിക്കുന്നത് അവന്റെ മൂന്നാം പിറന്നാളിന് കസിനായ ബെറ്റോ സരാറ്റെയില് നിന്ന് ഒരു പന്ത് സമ്മാനമായി ലഭിച്ചതോടെയാണ്. ആ പന്ത് മറ്റാരും എടുക്കാതിരിക്കാന് കുഞ്ഞ് മറഡോണ അത് ഉടുപ്പിനുള്ളില് വച്ചാണ് കിടന്നുറങ്ങാറ് പോലും.
ഒമ്പതാം വയസില് തന്നെ ആ പ്രദേശത്തെ നല്ല ഫുട്ബോള് കാളിക്കാരനെന്ന് മറഡോണ പേരെടുത്തു. ആ പ്രദേശത്തെ ഫുട്ബോള് ടീമായിരുന്ന ‘ലിറ്റില് ഒനിയനി’ലേക്ക് അവന് തിരഞ്ഞെടുക്കപ്പെട്ടു. കുഞ്ഞന് മറഡോണ ടീമിലെത്തിയ ശേഷം തുടര്ച്ചയായ 140 മത്സരങ്ങളാണ് ലിറ്റില് ഒനിയന് ജയിച്ചുകയറിയത്. തന്നേക്കാള് പ്രായം കൂടിയവരുടെ കൂടെ കളിക്കുന്ന കുട്ടിയുടെ അസാമാന്യമായ കഴിവ് ശ്രദ്ധയില്പ്പെട്ട ബണസ് ഐറിസിലെ ഒരു ന്യൂസ് ഔട്ട്ലെറ്റ് അവനെ കുറിച്ച് ഒരു ലേഖനം പ്രസിദ്ധീകരിച്ചു. പക്ഷേ അന്ന് അവര് മറഡോണയുടെ പേര് തെറ്റിച്ചാണ് കൊടുത്തത്. കാറഡോണ എന്ന്. എന്നിരുന്നാലും അതോടെ അവന്റെ തലവര മാറി.
12-ാം വയസില് ലിറ്റില് ഒനിയന്സില് നിന്ന് മറഡോണയെ ലോസ് സെബോല്ലിറ്റാസ് ക്ലബ്ബ് റാഞ്ചി. അവിടെ നിന്ന് അര്ജന്റിനോസ് ജൂനിയേഴ്സ് ടീമിലേക്ക്. അങ്ങനെ 1976-ല് 16 വയസ് തികയാന് 10 ദിവസങ്ങള് മാത്രം ബാക്കിനില്ക്കെ മറഡോണ പ്രൊഫഷണല് ഫുട്ബോളില് അരങ്ങേറ്റം കുറിച്ചു. 2003 വരെ അര്ജന്റീനയില് പ്രൊഫഷണല് ലീഗില് കളിക്കുന്ന ഏറ്റവും പ്രായം കുറഞ്ഞ താരം എന്ന ബഹുമതി മറഡോണയുടെ പേരിലായിരുന്നു. 1976 മുതല് 1981 വരെയുള്ള കാലയളവില് അര്ജന്റിനോസ് ജൂനിയേഴ്സിനായി 166 മത്സരങ്ങള് കളിച്ച താരം 111 ഗോളുകളും സ്വന്തം പേരിലാക്കി. ഒന്നാം ഡിവിഷനില് 19-ാം സ്ഥാനത്തായിരുന്ന ക്ലബ്ബ് മറഡോണയുടെ വരവോടെ 1980-ല് രണ്ടാം സ്ഥാനത്തേക്ക് കുതിച്ചെത്തി.
പിന്നീട് 1977-ല് തന്റെ 16-ാം വയസില് ദേശീയ ടീമിന്റെ നീലക്കുപ്പായം മറഡോണയെ തേടിയെത്തി. 1977 ഫെബ്രുവരി 27-ന് ഹംഗറിക്കെതിരേയായിരുന്നു അദ്ദേഹത്തിന്റെ അരങ്ങേറ്റ മത്സരം. പക്ഷേ പ്രായം കുറഞ്ഞ താരമെന്ന കാരണത്താല് 1978-ലെ അര്ജന്റീനയുടെ ലോകകപ്പ് ടീമില് അദ്ദേഹത്തിന് ഇടംകിട്ടിയില്ല. 1979 ജൂണ് രണ്ടിന് സ്കോട്ട്ലന്ഡിനെതിരെ നടന്ന മത്സരത്തില് രാജ്യത്തിനായുള്ള ആദ്യ ഗോള് മറഡോണ കുറിച്ചു.
അതേ വര്ഷം തന്നെ അദ്ദേഹം യൂത്ത് ചാമ്പ്യന്ഷിപ്പിനുള്ള അര്ജന്റീന ടീമിനെ നയിച്ചു. ടൂര്ണമെന്റിലെ മികച്ച താരത്തിനുള്ള ഗോള്ഡന് ബോള് നേടിയ മറഡോണ, അര്ജന്റീനയെ ജേതാക്കളാക്കിയ ശേഷം കപ്പുമായാണ് മടങ്ങിയെത്തിയത്. 1986 ലോകകപ്പിലെയും മികച്ച താരത്തിനുള്ള ഗോള്ഡന് ബോള് മറഡോണയ്ക്കായിരുന്നു. യൂത്ത് ലോകകപ്പിലും സീനിയര് ലോകകപ്പിലും ഗോള്ഡന് ബോള് നേടിയിട്ടുള്ള ഏക താരവും അദ്ദേഹമാണ്.
1984 നവംബര് ഏഴിനാണ് മറഡോണയുടെ ജീവിതത്തിലെ ഏറ്റവും വലിയ മാറ്റം നടക്കുന്നത്. ദീര്ഘനാളത്തെ പ്രണയത്തിനൊടുവില് ക്ലോഡിയ വില്ലഫെയ്നെ താരം ജീവിതത്തിലേക്ക് കൂട്ടി. 1987 ഏപ്രില് രണ്ടിന് ഇരുവര്ക്കും ആദ്യ കുട്ടി ജനിച്ചു. ഡാല്മ നെരിയ. 1989 മേയ് 16-നായിരുന്നു രണ്ടാമത്തെ മകള് ജിയാനിന്ന ഡിനോരയുടെ ജനനം. എന്നാല് മയക്കുമരുന്നിന്റെ ഉപയോഗവും മറ്റ് ബന്ധങ്ങളും താരത്തിന്റെയും ക്ലോഡിയയുടെയും ജീവിതത്തില് വിള്ളലുകള് വീഴ്ത്തി. 15 വര്ഷക്കാലത്തെ ദാമ്പത്യത്തിനു ശേഷം 2004-ല് ഇരുവരും വേര്പിരിഞ്ഞു. ഡിവോഴ്സ് നടപടികള്ക്കിടെയാണ് തനിക്ക് മറ്റൊരു ബന്ധത്തില് ഒരു മകനുണ്ടെന്ന് മറഡോണ വെളിപ്പെടുത്തുന്നത്.
1984 മുതല് 1991 വരെ ഇറ്റാലിയന് ക്ലബ്ബായ നാപ്പോളിക്ക് വേണ്ടി കളിച്ച മറഡോണ 188 മത്സരങ്ങളില് നിന്ന് 81 തവണ സ്കോര് ചെയ്തു. മറഡോണയുടെ ഫുട്ബോള് ജീവിതത്തിന്റെ സുവര്ണ കാലവും ക്ലബ്ബിന്റെ ചരിത്രത്തിലെ സുവര്ണ കാലവും ഇതായിരുന്നു. 1986-87, 1989-90 സീസണുകളില് ക്ലബ്ബ് സീരിസ് കിരീടത്തില് മുത്തമിട്ടു. 1988-89 സീസണില് യുവേഫ സൂപ്പര് കപ്പിലും മറഡോണ നാപ്പോളിയെ കിരീടത്തിലേക്ക് നയിച്ചു. പക്ഷേ തുടര്ന്ന് ക്ലബ്ബുമായി അഭിപ്രായ ഭിന്നത രൂപപ്പെട്ടു.
ഇതിനിടെ 1986-ല് തന്റെ രണ്ടാം ലോകകപ്പില് അര്ജന്റീനയെ ഏതാണ്ട് ഒറ്റയ്ക്കു തന്നെ മറഡോണ കിരീടത്തിലേക്ക് നയിച്ചു. ഈ ലോകകപ്പില് ഇംഗ്ലണ്ടിനെതിരേ നടന്ന ക്വാര്ട്ടര് ഫൈനലില് നേടിയ രണ്ടു ഗോളുകളും (ദൈവത്തിന്റെ കൈ, നൂറ്റാണ്ടിന്റെ ഗോള്) ചരിത്രത്തില് ഇടംനേടി. ഫൈനലില് പശ്ചിമ ജര്മനിയെ തോല്പ്പിച്ച് കീരിടവുമായാണ് മറഡോണയുടെ ടീം മടങ്ങിയെത്തിയത്. 1990 ഇറ്റലി ലോകകപ്പിലും മറഡോണ തന്നെയായിരുന്നു ടീമിന്റെ ക്യാപ്റ്റന്. ചാമ്പ്യന്മാരായ അര്ജന്റീനയെ ആദ്യ മത്സരത്തില് പക്ഷേ കാമറൂണ് അട്ടിമറിച്ചു. കഷ്ടിച്ച് ഫൈനല് വരെ എത്തിയ ടീം പശ്ചിമ ജര്മനിയോട് തോറ്റു.
രാജ്യത്തിനായി നാലു ലോകകപ്പുകള് കളിച്ച മറഡോണ 21 മത്സരങ്ങളില് നിന്ന് എട്ടു ഗോളുകള് സ്വന്തം പേരില് കുറിച്ചു. അര്ജന്റീനയ്ക്കായി 91 മത്സരങ്ങളില് നിന്ന് 34 തവണ അദ്ദേഹം സ്കോര് ചെയ്തു. പിന്നീട് 1991 മാര്ച്ച് 17-ന് ഒരു ഫുട്ബോള് മത്സരത്തിന് ശേഷം നടന്ന പരിശോധനയില് താരം കൊക്കെയ്ന് ഉപയോഗിച്ചതായി കണ്ടെത്തി. ഇതേത്തുടര്ന്ന് 15 മാസത്തെ വിലക്ക് നേരിട്ടു. 1994-ല് പത്രക്കാരെ എയര് ഗണ് ഉപയോഗിച്ച് വെടിവെച്ചതായിരുന്നു അടുത്ത വിവാദം. ഇതിന്റെ പേരില് നിയമനടപടിയും നേരിട്ടു. 1994 അമേരിക്ക ലോകകപ്പില് രണ്ടു കളികളില് മാത്രമേ അദ്ദേഹത്തിന് കളിക്കാന് സാധിച്ചുള്ളൂ. ഗ്രീസുമായുള്ള കളിക്കു ശേഷം നടത്തിയ പരിശോധനയില് എഫെഡ്രിന് എന്ന മരുന്ന് ഉപയോഗിച്ചതായി കണ്ടെത്തിയതിനെ തുടര്ന്ന് ടൂര്ണമെന്റില് നിന്ന് പുറത്താക്കിയതാണ് കാരണം.
1996ലാണ് മറഡോണ മയക്കുമരുന്ന് ഉപയോഗത്തിന് ഒരു സ്വിസ് ഡ്രഗ് ക്ലിനിക്കില് ചികിത്സയ്ക്ക് വിധേയനാകുന്നത്. വീണ്ടും ഉത്തേജക മരുന്ന് പരിശോധനയില് പരാജയപ്പെട്ടതോടെ 1997-ലെ പിറന്നാള് ദിനത്തില് അദ്ദേഹം ഫുട്ബോള് കരിയര് അവസാനിപ്പിച്ചു. എങ്കിലും മയക്കുമരുന്നിന്റെ ഉപയോഗം അദ്ദേഹത്തിന്റെ ആരോഗ്യസ്ഥിതി വളഷാക്കി. അതേസമയം, 2000ത്തില് ഫിഫ നടത്തിയ വോട്ടെടുപ്പില് 1986 ലോകകപ്പില് ഇംഗ്ലണ്ടിനെതിരേ മറഡോണ നേടിയ രണ്ടാമത്തെ ഗോള് നൂറ്റാണ്ടിന്റെ ഗോളായി തെരഞ്ഞെടുത്തു.
പിന്നീട് 2005ല് നൈറ്റ് ഓഫ് ടെന് എന്ന പരിപാടിയുടെ അവതാരകനായി മറഡോണയെത്തി. പെലെ ആയിരുന്നു ആദ്യ അതിഥി. തുടര്ന്ന് മൈക്ക് ടൈസന്, സിദാന്, റൊണാള്ഡീഞ്ഞോ, ക്രെസ്പോ ഫിഡെല് കാസ്ട്രോ തുടങ്ങിയ പ്രമുഖര് പരിപാടിയില് പങ്കെടുത്തു. 2008-ല് അദ്ദേഹത്തെ അര്ജന്റീന ദേശീയ ടീമിന്റെ പരിശീലകനായി നിയമിച്ചു. 2010 ലോകകപ്പില് ക്വാര്ട്ടര് ഫൈനലില് ജര്മനിയോട് തോറ്റ് അര്ജന്റീന ടീം പുറത്തായതോടെ മാറഡോണയുമായുള്ള കരാര് അര്ജന്റീന ഫുട്ബോള് ഫെഡറേഷന് പുതുക്കിയില്ല. പിന്നീട് അല് വാസല്, ഡിപോര്ട്ടിവോ റിയെസ്ട്ര, ഫുജെയ്റ, ഡൊറാഡോസ് ഡെ സിനാലോ, ജിംനാസിയ ഡെ ലാ പ്ലാറ്റ ടീമുകളുടെ പരിശീലകനായി പ്രവര്ത്തിച്ചു.
ഹൃദയാഘാതത്തെ തുടര്ന്ന് ടിഗ്രെയിലെ സ്വവസതിയലായിരുന്നു അദ്ദേഹത്തിന്റെ അന്ത്യം. ഈ മാസം തലച്ചോറില് രക്തം കട്ടപിടിച്ചതിനെ തുടര്ന്ന് അടിയന്തിര ശസ്ത്രക്രിയയ്ക്കു വിധേയനാക്കിയിരുന്നു. ഇതോടൊപ്പം വിത്ത്ഡ്രോവല് സിംപ്റ്റംസും ഉണ്ടായിരുന്നു. ഒരിക്കൽക്കൂടി ഇംഗ്ലണ്ടിനെതിരെ കൈകൊണ്ടു ഗോളടിക്കാൻ മോഹമുണ്ടെന്ന് പറഞ്ഞുവച്ചാണ് വിശ്വ ഫുട്ബോളിന്റെ പ്രതിപുരുഷന് യാത്രയാവുന്നത്.
