അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.ഹൈദരാബാദ്: വിവാദമായ ഫോണ്‍ ചോര്‍ത്തല്‍ കേസില്‍ തെലങ്കാനയിലെ മുന്‍ ഇന്റലിജന്‍സ് ബ്യൂറോ(ഐബി) മേധാവി ടി. പ്രഭാകര്‍ റാവു അടക്കമുള്ള പ്രതികള്‍ക്കെതിരേ പോലീസ് ലുക്കൗട്ട് നോട്ടീസ് പുറപ്പെടുവിച്ചു. തെലങ്കാനയിലെ മുന്‍ ഐബി മേധാവിയായ പ്രഭാകര്‍ റാവു ഫോണ്‍ ചോര്‍ത്തല്‍ കേസിലെ ഒന്നാംപ്രതിയാണ്. പ്രഭാകര്‍ റാവു ഇപ്പോള്‍ അമേരിക്കയിലാണെന്നാണ് റിപ്പോര്‍ട്ട്.
ബിആര്‍എസ് നേതാവ് കെ ചന്ദ്രശേഖര്‍ റാവുവിന്റെ നേതൃത്വത്തിലുള്ള സര്‍ക്കാരിന്റെ കാലത്താണ് ഫോണ്‍ ചോര്‍ത്തല്‍ നടന്നത്. പ്രതിപക്ഷ നേതാക്കളടക്കമുള്ളവരുടെ ഫോണുകളാണ് ചോര്‍ത്തിയത്. റാവുവിന്റെ ഹൈദരാബാദിലെ വീട്ടിലും തെലുങ്കു ടിവി ചാനല്‍ മേധാവി ശ്രാവന്‍ റാവുവിന്റെ വസതിയിലും അടുത്തിടെ റെയ്ഡ് നടത്തിയിരുന്നു. ശ്രാവണ്‍ റാവു രാജ്യം വിട്ടതായാണ് വിവരം. കേസിലെ മറ്റൊരു പ്രതിയായ സിറ്റി ടാസ്‌ക് ഫോഴ്‌സിലുണ്ടായിരുന്ന രാധാകൃഷ്ണ റാവുവിനെതിരെയും ലുക്കൗട്ട് നോട്ടീസ് പുറപ്പെടുവിച്ചു.
ഫോണ്‍ ചോര്‍ത്തലുമായി ബന്ധപ്പെട്ട തെലങ്കാന പൊലീസിലെ മറ്റ് ഉദ്യോഗസ്ഥരെ കണ്ടെത്തുന്നതിന് അന്വേഷണം ഊര്‍ജിതമാക്കിയിരിക്കയാണ് അന്വേഷണ സംഘം. അഡീഷണല്‍ എസ്.പിമാരായ ഭുജന്‍ഗ റാവു, തിരുപ്പതണ്ണ, ഡെപ്യൂട്ടി എസ്.പി പ്രണീത് റാവു എന്നിവരെ അറസ്റ്റ് ചെയ്തിട്ടുണ്ട്.
നിലവിലെ മുഖ്യമന്ത്രിയായ രേവന്ത് റെഡ്ഡി ഉള്‍പ്പടെയുള്ള പ്രമുഖ നേതാക്കളുടെയും വ്യവസായ പ്രമുഖര്‍, തെലുങ്കു താരങ്ങള്‍ എന്നിവരുടെയും ഫോണുകളാണ് ചോര്‍ത്തിയത്. രഹസ്യമായി നിരീക്ഷിച്ചെന്നും ഇവരില്‍ പലരെയും പിന്നീട് ഭീഷണിപ്പെടുത്തിയതായും അന്വേഷണ സംഘം കണ്ടെത്തിയിരുന്നു.
ടിവി ചാനല്‍ ഉടമയായ ശ്രാവണ്‍ റാവുവാണ് അനധികൃത ഫോണ്‍ചോര്‍ത്തലിന് സഹായം ചെയ്തുനല്‍കിയതെന്നാണ് ആരോപണം. ഇതിനായി ഇസ്രേയലില്‍നിന്നുള്ള ഉപകരണം സ്ഥാപിക്കാന്‍ ഉള്‍പ്പെടെ ശ്രാവണ്‍റാവു സഹായിച്ചു. ഒരു സ്‌കൂളിലാണ് ഇത്തരം ഉപകരണങ്ങള്‍ സ്ഥാപിച്ചിരുന്നതെന്നും റിപ്പോര്‍ട്ടുകളില്‍ പറയുന്നു.
നേരത്തെ അറസ്റ്റിലായ പ്രതികള്‍ ഫോണ്‍ചോര്‍ത്തല്‍ ഉള്‍പ്പെടെയുള്ള കുറ്റങ്ങള്‍ സമ്മതിച്ചതായാണ് അന്വേഷണസംഘം പറയുന്നത്. ഐബി മേധാവിയായിരുന്ന പ്രഭാകര്‍ റാവുവിന്റെ ഉത്തരവനുസരിച്ചാണ് എല്ലാ തെളിവുകളും നശിപ്പിച്ചതെന്നാണ് പ്രതികളുടെ മൊഴി. കഴിഞ്ഞ വര്‍ഷം നിയമസഭാ തെരഞ്ഞെടുപ്പില്‍ കോണ്‍ഗ്രസ് വിജയിച്ചതിന്റെ പിറ്റേദിവസമാണ് പ്രഭാകര്‍ റാവു തെളിവുകള്‍ നശിപ്പിക്കാന്‍ ഉത്തരവിട്ടതെന്നും റിപ്പോര്‍ട്ടുകളിലുണ്ട്.
