വെള്ള ചോറിനു പകരം ഈ ചോറ് കഴിച്ചാലോ? ബി പി കുറയ്ക്കാൻ ഇവ നിങ്ങളെ സഹായിക്കും

ചോറ് 50 ശതമാനം ഇന്ത്യക്കാർക്കും അവരുടെ ഭക്ഷണക്രമത്തിന്റെ ഒരു പ്രധാന ഭാഗമാണ്. എന്നിരുന്നാലും ചോറ് അതിന്റെ യഥാർത്ഥ രൂപത്തിൽ വെളുത്തതല്ല. തവിട്ട് അഥവാ ചുവന്ന അരി, തവിട് കളഞ്ഞ് മിനുസപ്പെടുത്തുന്ന പ്രക്രിയയിലൂടെയാണ് വെളുത്ത അരി ഉത്പാദിപ്പിക്കുന്നത്. വിറ്റാമിനുകളും ധാതുക്കളും അടങ്ങിയ അരിയുടെ തവിട് അല്ലെങ്കിൽ പുറം പാളി ചുവന്ന അരിയിൽ അടങ്ങിയിട്ടുണ്ട്. അതിനാൽ വെളുത്ത അരി എന്നത് പോഷകങ്ങളിൽ ഭൂരിഭാഗവും നീക്കം ചെയ്യപ്പെട്ട ചുവന്ന അരിയാണ്. അതുകൊണ്ട് തന്നെ ഇതിന് ആരോഗ്യ ഗുണങ്ങളും കുറവായിരിക്കും.

പ്രമേഹ സാധ്യത കുറയ്ക്കുന്നു

നാരുകളുടെ അളവും മറ്റ് അവശ്യ പോഷകങ്ങളും ചുവന്ന അരിയിൽ കൂടുതലാണ്. വെളുത്ത അരി അഥവാ പച്ചരിയേക്കാൾ കുറഞ്ഞ ഗ്ലൈസെമിക് സൂചികയാണ് ഇതിന് ഉള്ളത്. ഗ്ലൈസെമിക് സൂചിക ഉയർന്നാൽ രക്തത്തിലെ ഗ്ലൂക്കോസിന്റെ അളവ് കൂടാനുള്ള സാധ്യത കൂടുതലാണ്. രക്തത്തിലെ ഗ്ലൂക്കോസിന്റെ അളവ് വർദ്ധിക്കുന്നത് പ്രമേഹത്തിലേക്ക് നയിക്കുന്നു. അതിനാൽ, ചുവന്ന അരി കൊണ്ടുള്ള ചോറ് കഴിക്കുന്നത് അത്തരം അപകടസാധ്യതകൾ കുറയ്ക്കുന്നു.

കൊളസ്ട്രോൾ കുറയ്ക്കുന്നു

ചുവന്ന അരിയിൽ അവശ്യ അമിനോ ആസിഡുകളായ ഗാമാ-അമിനോബ്യൂട്ടിക് ആസിഡ് (ഗാബ) അടങ്ങിയിട്ടുണ്ട്, ഇത് രക്തത്തിലെ കൊളസ്ട്രോളിന്റെ അളവ് ഉയരുന്നത് തടയുന്നു. അതുകൊണ്ട് തന്നെ ഈ അരി കഴിക്കുന്നവരിൽ എൽഡിഎൽ അല്ലെങ്കിൽ മോശം കൊളസ്ട്രോൾ കുറയുന്നു.

ശരീരഭാരം വർദ്ധിക്കുന്നത് തടയുന്നു

ഉയർന്ന നാരുകൾ ഉള്ളതിനാൽ ചുവന്ന അരി ദഹനം ചെയ്യപ്പെടുവാൻ കൂടുതൽ സമയമെടുക്കും. ഇത് വിശപ്പിന്റെ ആവൃത്തി കുറയ്ക്കുകയും എണ്ണമയമുള്ള അല്ലെങ്കിൽ പഞ്ചസാര നിറഞ്ഞ ഭക്ഷണങ്ങളോടുള്ള ആസക്തി നിയന്ത്രിച്ച്, അതിൽ നിന്ന് അധിക ഭാരം ഉണ്ടാകുന്നതിനുള്ള സാധ്യത തടയുകയും ചെയ്യുന്നു. ശരീരഭാരം ടൈപ്പ് 2 പ്രമേഹത്തിന്റെ വളർച്ചയെ പ്രോത്സാഹിപ്പിക്കുന്നു. പ്രമേഹ രോഗികളായവർക്ക് ഹൃദ്രോഗമുണ്ടാകാനുള്ള സാധ്യത കൂടുതലാണ് എന്നത് ഇതോടൊപ്പം കൂട്ടി വായിക്കേണ്ടതാണ്.

 ഹൃദയാരോഗ്യത്തെ സംരക്ഷിക്കുന്നു

ഹൃദയത്തിന്റെയും രക്തക്കുഴലുകളുടെയും ആരോഗ്യം മെച്ചപ്പെടുത്താൻ ചുവന്ന അരി സഹായിക്കുമെന്ന് പഠനങ്ങൾ കണ്ടെത്തിയിട്ടുണ്ട്. ബി വിറ്റാമിനുകളായ ബി 1 (തയാമിൻ), മഗ്നീഷ്യം എന്നിവ ഇവയിൽ ധാരാളം അടങ്ങിയിട്ടുണ്ട്. ഇവ രണ്ടിന്റെയും കുറവ് ഹൃദയാഘാതം, ഹൃദയസ്തംഭനം എന്നിവയുമായി ബന്ധപ്പെട്ടിരിക്കുന്നു.

കാൻസർ തടയുന്നു

ചുവന്ന അരിയിൽ ഇനോസിറ്റോൾ ഹെക്സാഫോസ്ഫേറ്റ് അഥവാ ഐപി 6 എന്ന പ്രകൃതിദത്ത സംയുക്തം അടങ്ങിയിരിക്കുന്നു. സ്തനാർബുദം, കരൾ, വൻകുടൽ എന്നിവയെ ബാധിക്കുന്ന കാൻസർ, രക്താർബുദം എന്നിവയുടെ ചികിത്സയിൽ ഇത് ഉപയോഗിക്കുന്നു. ചുവന്ന അരിയിൽ അടങ്ങിയിട്ടുള്ള നാരുകളുടെ ഉയർന്ന ശതമാനം സ്തന, വൻകുടൽ കാൻസറുകൾക്കെതിരെ സംരക്ഷണം നൽകുന്നുവെന്ന് പഠനങ്ങൾ തെളിയിച്ചിട്ടുണ്ട്. ചുവന്ന അരിയിൽ അടങ്ങിയിരിക്കുന്ന പോളിഫെനോളുകൾക്ക് ആന്റിഓക്‌സിഡന്റ് ഗുണങ്ങളുണ്ട്, ഇത് കോശങ്ങൾക്ക് ഓക്സിഡേറ്റീവ് നാശമുണ്ടാക്കുന്നത് തടയുകയും ചെയ്യുന്നു.