അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.അച്ഛന് ഭക്ഷണത്തിൽ വിഷം ചേർത്ത് കൊടുത്ത് കൊലപ്പെടുത്തിയ കേസിൽ ജാമ്യത്തിലിറങ്ങിയ ആയുർവേദ ഡോക്ടർ നേപ്പാളിൽ കുളത്തിൽ മരിച്ചു. എടക്കുളം അമ്മാനത്ത് പരേതരായ ശശിധരന്റെയും ബിന്ദുവിന്റെയും മകൻ മയൂർനാഥാണ് (26) മരിച്ചത്. ഒരു വർഷം മുൻപാണ് ഇയാൾ അച്ഛനു പ്രാതലിൽ വിഷം നൽകി കൊലപ്പെടുത്തിയത്.
കേസിൽ ഇയാളെ പോലീസ് അറസ്റ്റ് ചെയ്തിരുന്നു. ചെറുപ്പം മുതൽ അച്ഛനോട് തോന്നിയ വൈരാഗ്യമായിരുന്നു കൊലപാതകത്തിലേക്ക് യുവാവിനെ നയിച്ചത്. ജാമ്യത്തിലിറങ്ങിയ യുവാവിനെ ചികിത്സയ്ക്കായി ബന്ധുക്കൾ മലപ്പുറം ജില്ലയിൽ ഒരു സ്വകാര്യ ആയുർവേദ ചികിത്സാ കേന്ദ്രത്തിൽ പ്രവേശിപ്പിച്ചിരുന്നു. ഇവിടെ നിന്ന് ഒരാഴ്ച മുൻപ് ആരോടും പറയാതെ രക്ഷപ്പെട്ടു. യുവാവ് അപസ്മാര രോഗിയായിരുന്നു.
നേപ്പാളിൽ താമസിച്ചിരുന്ന കേന്ദ്രത്തിലെ കുളത്തിൽ മയൂർനാഥ് കുളിക്കാനിറങ്ങിയപ്പോൾ മുങ്ങിമരിച്ചതായാണു ബന്ധുക്കൾക്കു ലഭിച്ച വിവരം. യുവാവിന്റെ ബാഗിൽ നിന്നു കണ്ടെടുത്ത ഫോൺ നമ്പറിൽ പൊലീസ് വിവരം അറിയിക്കുകയായിരുന്നു. നേപ്പാളിലെത്തിയ ബന്ധുക്കൾ മൃതദേഹം തിരിച്ചറിഞ്ഞു. മൃതദേഹം അവിടെ സംസ്കരിച്ചു.
കൊല്ലപ്പെട്ട ശശീന്ദ്രന്‍റെ ആദ്യ ഭാര്യയിലെ മകനാണ് മയൂർനാഥ്. 25 വയസ്സുകാരനായ ഇയാൾ ആയുർവേദ ഡോക്ടർ ആണ്. വീട്ടിൽ ഉണ്ടാക്കിയ ഭക്ഷണം കഴിച്ച ശേഷം ശശീന്ദ്രനും രണ്ടാം ഭാര്യക്കും ഇവരുടെ പറമ്പിൽ ജോലിക്ക് എത്തിയിരുന്ന തൊഴിലാളിക്കും ദേഹാസ്വാസ്ഥ്യം അനുഭവപ്പെടുകയും ആശുപത്രിയിൽ പ്രവേശിപ്പിക്കുകയും ആയിരുന്നു. ഇവരിൽ ശശീന്ദ്രൻ മാത്രമാണ് മരണപ്പെട്ടത്.
ഓൺലൈനായി വാങ്ങിയ രാസവസ്തുക്കൾ ഭക്ഷണത്തിൽ കലർത്തി നൽകിയാണ് മയൂർനാഥ് പിതാവിനെ കൊലപ്പെടുത്തിയിരുന്നത്. ആദ്യം ഭക്ഷ്യവിഷബാധയാണെന്ന് കരുതിയിരുന്ന മരണം പോലീസിന്റെ വിദഗ്ധ അന്വേഷണത്തിൽ കൊലപാതകം ആണെന്ന് തെളിയുകയായിരുന്നു.
