അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.ലഖ്‌നൗ: അയോധ്യയിലെ രാമക്ഷേത്രത്തിന്റെ ശ്രീകോവിലിന്റെ മേല്‍ക്കൂരയ്ക്ക് ചോര്‍ച്ചയെന്ന് റിപ്പോര്‍ട്ട്. മുഖ്യപുരോഹിതന്‍ ആചാര്യ സത്യേന്ദ്ര ദാസാണ് ഇക്കാര്യം ഉന്നയിച്ചിട്ടുള്ളതെന്ന് ദേശീയ മാധ്യമങ്ങള്‍ റിപ്പോര്‍ട്ട് ചെയ്തു. അയോധ്യയിലും പരിസരങ്ങളിലും കനത്ത മഴയാണ് ഇന്നുണ്ടായത്.
“ജനുവരി 22നാണ് ക്ഷേത്രത്തിൽ പ്രാണപ്രതിഷ്ഠ നടന്നത്. എത്രയോ എൻജിനീയർമാർ ഇവിടെയുണ്ടായിരുന്നു. എന്നിട്ടും ചോരുന്നുവെന്നത് ആശ്ചര്യമാണ്. മേൽക്കൂരയിൽ നിന്നും വെള്ളം ചോർന്നൊലിക്കുന്നു. ഇങ്ങനെ സംഭവിക്കുമെന്ന് ആരും പ്രതീക്ഷിച്ചിരുന്നില്ല” -ആചാര്യ സത്യേന്ദ്ര ദാസ് വാർത്ത ഏജൻസിയായ പി.ടി.ഐയോട് പറഞ്ഞു.
“ആദ്യ മഴയിൽ തന്നെ രാംലല്ലയുടെ വിഗ്രഹം സ്ഥാപിച്ച ശ്രീകോവിലിന്റെ മേൽക്കൂര ചോർന്നൊലിക്കാൻ തുടങ്ങി. ഈ വെള്ളം ഒഴുകിപ്പോകാനുള്ള ഒരു സൗകര്യവുമില്ല. വിഷയത്തിൽ അതീവ ശ്രദ്ധചെലുത്തണം. കനത്ത മഴ പെയ്താൽ മേൽക്കൂരക്ക് താഴെ പ്രാർഥന നടത്തുന്നത് ബുദ്ധിമുട്ടാകും” -അദ്ദേഹം പറഞ്ഞു.
അതേസമയം, ക്ഷേത്ര നിർമാണത്തിലോ ഡിസൈനിലോ അപാകതയില്ലെന്ന് ക്ഷേത്ര നിർമാണ സമിതി അധ്യക്ഷൻ നൃപേന്ദ്ര മിശ്ര പറഞ്ഞു. ഒന്നാംനിലയിൽ നിന്ന് മഴവെള്ളം ഇറ്റുവീഴുന്നത് ശ്രദ്ധയിൽപെട്ടു. ഗുരുമണ്ഡപം ആകാശത്തേക്ക് തുറന്നിട്ട രീതിയിൽ നിർമിച്ചതിനാൽ ഇത് പ്രതീക്ഷിച്ചതായിരുന്നു. ശിഖരത്തിന്‍റെ നിർമാണം പൂർത്തിയാകുന്നതോടെ ഇത് മൂടും. ശ്രീകോവിലിൽ വെള്ളം ഒഴുകാനുള്ള പ്രത്യേക സംവിധാനം ഇല്ല. എല്ലാ മണ്ഡപങ്ങളും വെള്ളം ഒഴുകിപ്പോകാനുള്ള ചരിവിലാണ് നിർമിച്ചത്. തുറന്നിട്ട മണ്ഡപങ്ങളിൽ മഴത്തുള്ളികൾ വീഴുമെന്ന കാര്യം നേരത്തെ തന്നെ ചർച്ചയായിരുന്നു. എന്നാൽ, വാസ്തുശിൽപ രീതികൾ പ്രകാരം ഇവ തുറന്നിടാൻ തന്നെ തീരുമാനിക്കുകയായിരുന്നു -നൃപേന്ദ്ര മിശ്ര പറഞ്ഞു.
2024 ജനുവരി 22ന് പ്രധാനമന്ത്രി നരേന്ദ്ര മോദിയാണ് രാമക്ഷേത്രം ഉദ്ഘാടനം ചെയ്തത്. ലോക്സഭാ തെരഞ്ഞെടുപ്പിന് മുമ്പെ ധൃതിപിടിച്ച് ഉദ്ഘാടനം നടത്തുകയായിരുന്നുവെന്ന് ആക്ഷേപം ഉയർന്നിരുന്നു. ക്ഷേത്ര നിർമാണം പൂർത്തിയാകും മുമ്പായിരുന്നു ഉദ്ഘാടനം നടന്നത്.
