അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.ചരിത്ര പഠനം അറിവ് വര്‍ധിപ്പിക്കാന്‍ വേണ്ടി മാത്രമുള്ളതല്ല. അത് വ്യക്തിത്വം ഉണ്ടാക്കാനും സമൂഹത്തിന് ഗുണമുള്ള പൗരനാക്കാനും സഹായിക്കുന്ന ഘടകമാണ്. അങ്ങനെ ചരിത്രബോധത്തോടെയുള്ള തലമുറയെ വാര്‍ത്തെടുക്കാനും കഴിയും. അതാണ് ഇന്ത്യയ്ക്ക് ഇന്ന് ആവശ്യം. രാജ്യത്തെ ഓരോ പ്രദേശങ്ങള്‍ക്കും ചരിത്രമുണ്ട്. ഓരോ കെട്ടിടങ്ങള്‍ക്കും ചരിത്രമുണ്ട്. സഹനത്തിന്റെയും സംരക്ഷണയുടേയും രക്തസാക്ഷിത്വങ്ങളുടേയും മുറിവുണങ്ങാത്ത കഥകള്‍. അവയൊക്കെ വെറും കഥകള്‍ മാത്രമല്ല, ഇന്ത്യയുടെ പോരാട്ടത്തിന്റെ ചരിത്രം കൂടിയാണ്.
ആ ചരിത്രത്തെയാണ് ഇന്നിന്റെ കാലത്തെ ഭരണകര്‍ത്താക്കള്‍ നിഷ്‌ക്കാസനം ചെയ്തു കൊണ്ടിരിക്കുന്നത്. ചരിത്രം പഠിച്ച് ഒരു വിദ്യാര്‍ത്ഥിയും വളര്‍ന്നു കൂടാ എന്നചിന്തയില്‍. അതുകൊണ്ടാണ് പാഠ്യപദ്ധതി പരിഷ്‌ക്കരിക്കുന്നു എന്ന വ്യാജേന നടക്കുന്ന തിരുത്തലുകള്‍. പുതിയ അധികാരത്തിന്റെ ചിഹ്ന്‌നങ്ങളെ മുഴപ്പിച്ചു കാട്ടാനുള്ള വ്യഗ്രതയും നാളത്തെ ചരിത്രമായി മാറിയേക്കാം എന്ന് ഭയപ്പെടുന്നതില്‍ തെറ്റില്ല. പാഠപുസ്തകത്തില്‍ നിന്ന് ചരിത്രത്തെ എടുത്ത് മാറ്റി കുട്ടികളിലേക്ക് വ്യാജചരിത്രത്തെ കുത്തിവയ്ക്കുന്നു. അങ്ങനെ ചരിത്രത്തെ പതിയെ പതിയെ പാഠപുസ്തകത്തില്‍ നിന്നും ഭാവിതലമുറയുടെ ഉള്ളില്‍ നിന്നും നീക്കം ചെയ്തുകൊണ്ടിരിക്കുകയാണ് നാഷണല്‍ കൗണ്‍സില്‍ ഓഫ് എജ്യുക്കേഷണല്‍ റിസര്‍ച്ച് ആന്‍ഡ് ട്രെയിനിംഗ് (എന്‍.സി.ഇ.ആര്‍.ടി).
അത് ബി.ജെ.പി എന്ന രാഷ്്രീയ പാര്‍ട്ടിക്കും ആര്‍.എസ്.എസ് എന്ന സംഘടനയ്ക്കും അനുകൂലമായി ഭവിക്കുന്നുണ്ടെന്നത് സത്യമാണ്. അയോധ്യയിലെ ബാബറി മസ്ജിദ് തകര്‍ക്കല്‍, ഗുജറാത്ത് കലാപത്തിലെ മുസ്ലീം കൂട്ടക്കൊല, ഹിന്ദുത്വവാദം, മണിപ്പൂര്‍ ഇന്ത്യയുമായുള്ള ലയനം തുടങ്ങിയ വിഷയങ്ങളെക്കുറിച്ചുള്ള പരാമര്‍ശങ്ങള്‍ ഒഴിവാക്കിക്കൊണ്ട് എന്‍.സി.ഇ.ആര്‍.ടി പാഠപുസ്തകങ്ങള്‍ പരിഷ്‌കരിച്ചു കഴിഞ്ഞിരിക്കുന്നു. മാറ്റങ്ങളില്‍ ചരിത്രസംഭവങ്ങള്‍ ഒഴിവാക്കുന്നതും രാഷ്ട്രീയ നിലപാടുകള്‍ വ്യക്തമാക്കുന്നതും ഉള്‍പ്പെടുന്നു. അപ്‌ഡേറ്റുകള്‍ പതിവാണെന്നും പുതിയ പാഠ്യപദ്ധതി ചട്ടക്കൂടുകളുമായി ബന്ധമില്ലാത്തതാണെന്നും എന്‍.സി.ഇ.ആര്‍.ടി ഉദ്യോഗസ്ഥര്‍ അവകാശപ്പെടുന്നുണ്ടെങ്കിലും മോദി സര്‍ക്കാരിന്റെ സ്വാധീനം അതില്‍ കടന്നുകൂടിയിട്ടുണ്ടെന്നത് മൂടിവെക്കാനാകാത്തതാണ്.
ജനാധിപത്യത്തെയും ബഹുസ്വരതയെയും പ്രതിപാദിക്കുന്ന അധ്യായങ്ങള്‍, ജനകീയ സമരങ്ങളെയും പ്രസ്ഥാനങ്ങളെയും കുറിച്ച് വിവരിക്കുന്ന ഭാഗങ്ങള്‍, സ്വാതന്ത്ര്യത്തിന് ശേഷമുള്ള ഇന്ത്യന്‍ രാഷ്ട്രീയം, അടിയന്തരാവസ്ഥ, സമൂഹത്തില്‍ ദളിതര്‍ നേരിടുന്ന വിവേചനം എന്നിവയെല്ലാം പല ഘട്ടങ്ങളിലായി പാഠപുസ്തകത്തില്‍ നിന്ന് ഒഴിവാക്കപ്പെട്ടിട്ടുണ്ട്. ഒന്‍പത്, പത്ത് ക്ലാസുകളിലെ പാഠപുസ്തകങ്ങളില്‍ നിന്നും പരിണാമ സിദ്ധാന്തം ഒഴിവാക്കുന്നതിനുള്ള എന്‍.സി.ഇ.ആര്‍.ടി നീക്കത്തിനെതിരെ ശാസ്ത്രജ്ഞരും അധ്യാപകരും രംഗത്തെത്തിയിരുന്നു. പരിണാമ സിദ്ധാന്തത്തെ പാഠപുസ്തകങ്ങളില്‍ നിന്ന് ഒഴിവാക്കരുതെന്നാവശ്യപ്പെട്ട് 1800-ഓളം ശാസ്ത്രജ്ഞരും അധ്യാപകരുമാണ് എന്‍.സി.ഇ.ആര്‍.ടിക്ക് കത്തെഴുതിയിരുന്നത്.
ശാസ്ത്രത്തിന്റെ അടിസ്ഥാന കണ്ടെത്തല്‍ കുട്ടികള്‍ പഠിച്ചില്ലെങ്കില്‍ വിദ്യാര്‍ഥികള്‍ക്ക് അവരുടെ ചിന്താ പ്രക്രിയകളില്‍ ഗുരുതരമായ വൈകല്യമുണ്ടാകുമെന്ന് ശാസ്ത്ര സമൂഹം കരുതുന്നതായി കത്തില്‍ പറഞ്ഞിരുന്നു. പത്താം ക്ലാസിലെ പാഠപുസ്തകങ്ങളിലെ ഉള്ളടക്കത്തിന്റെ പട്ടികയില്‍ ‘പൈതൃകവും പരിണാമവും’ എന്ന തലക്കെട്ടിലെ പരിണാമം ഒഴിവാക്കി 9-ാം അദ്ധ്യായം ‘പാരമ്പര്യം’ എന്ന് മാത്രമാക്കിയിട്ടുണ്ട്. ആറാം ക്ലാസ്സിലെ ചരിത്ര പാഠപുസ്തകം തിരുത്തിയതാണ് എന്‍.സി.ഇ.ആര്‍.ടിയുടെ ഏറ്റവും പുതിയ പരിഷ്‌ക്കരണം. ഹാരപ്പന്‍ സംസ്‌ക്കാരത്തെ ‘സിന്ധു-സരസ്വതി നാഗരികത’ എന്നാണ് എന്‍.സി.ഇ.ആര്‍.ടി തിരുത്തിയത്. ‘എക്‌സ്‌പ്ലോറിംഗ് സൊസൈറ്റി: ഇന്ത്യ ആന്‍ഡ് ബിയോണ്ട്’ എന്ന പേരില്‍ പുസ്തകമിറങ്ങിയിട്ട് കുറച്ചു ദിവസങ്ങളേ ആയുള്ളൂ.
സരസ്വതി നദിയെക്കുറിച്ചും യൂണിറ്റ് ഉപശീര്‍ഷകത്തില്‍ പരാമര്‍ശിക്കുന്നുണ്ട്. ഹാരപ്പന്‍ നഗരങ്ങളുടെ തകര്‍ച്ചയ്ക്ക് പിന്നില്‍ സരസ്വതി നദി വറ്റിവരണ്ടതാണെന്നും പാഠപുസ്തകത്തില്‍ പറയുന്നു. എന്നാല്‍ പഴയ പാഠപുസ്തകങ്ങളില്‍ സരസ്വതി നദി വറ്റിവരണ്ടതായി പരാമര്‍ശിക്കുന്നില്ല. ചരിത്രത്തെ വര്‍ഗീയ വല്‍ക്കരിക്കുന്നതിനും കാവി പുതപ്പിച്ച് മറയ്ക്കുന്നതിനുമുള്ള ശ്രമങ്ങള്‍ സംഘപരിവാറും ബി.ജെ.പിയും എല്ലാകാലത്തും നടത്തിയിട്ടുണ്ട്. ഗാന്ധിജിയെത്തന്നെ ചരിത്രത്തില്‍ നിന്ന് മറയ്ക്കാനാഗ്രഹിക്കുന്ന അദ്ദേഹത്തിന്റെ കൊലയാളിയെ ആരാധിക്കുന്ന ബി.ജെ.പിക്ക് വര്‍ഗീയത പ്രചരിപ്പിക്കാനല്ലാതെ മറ്റെന്തിന് കഴിയും എന്ന ചോദ്യത്തിനും ഇവിടെ പ്രസക്തിയുണ്ട്.
സംഘപരിവാറിനുവേണ്ടി എന്‍.സി.ഇ.ആര്‍.ടി പാഠപുസ്തകം തിരുത്തുന്നത് പുതിയ പരിപാടിയല്ല. ഭിന്നിപ്പിന്റെ രാഷ്ട്രീയത്തെ വളര്‍ന്നുവരുന്ന തലമുറയ്ക്ക് പകരുകയാണിവരുടെ ലക്ഷ്യം. ‘രാഷ്ട്രപിതാവിനു’ പകരം ‘രാഷ്ട്ര പുരുഷ്’ വന്നുകൂടായ്കയില്ല. മഹാത്മാഗാന്ധി മാറി നാഥുറാം വിനായക് ഗോഡ്‌സെ ആയിക്കൂടെന്നില്ല. അത് പഠിക്കുന്ന വിദ്യാര്‍ത്ഥിക്ക് ഇക്കാലമത്രയും വില്ലനായ ഗോഡ്‌സെ നല്ലവനാകുന്ന കാഴ്ച വിദൂരമല്ലാതെ കാണാനാകും.
ഇതാണോ ചരിത്രം. ഇങ്ങനെയാണോ ചരിത്രത്തെ എഴുതേണ്ടത് എന്ന് ചിന്തിക്കുന്നവര്‍ നിശബ്ദരായിപ്പോകും. ചരിത്രം വളച്ചൊടിക്കാന്‍ ആദ്യമവര്‍ രാഷ്ട്രീയ ആധിപത്യം സ്ഥാപിക്കും. അതിനു ശേഷം വിദ്യാഭ്യാസത്തില്‍ കൈവെയ്ക്കും. തുടര്‍ന്ന് അവരുടെ ചരിത്രത്തെ വിദ്യാര്‍ത്ഥികളുടെ പാഠപുസ്തകങ്ങളില്‍ കുട്ടിത്തിരുകും.
ഇതിനപ്പുറം ചരിത്രത്തെ ചരിത്രമായി പഠിപ്പിക്കുന്നില്ല ഇവിടെ. പതിയെയുണ്ടാകുന്ന മാറ്റം കാഴ്ചയ്ക്ക് കൗതുകമാണ് പകരുക. എന്നാല്‍, വേഗത്തിലുള്ള ചരിത്ര മാറ്റമാണ് ബാബറി മസ്ദ്ജിദിന്റെ തകര്‍ച്ചയിലൂടെ നടന്നത്. ഇങ്ങനെ അപനിര്‍മ്മാണത്തിന്റെ രീതി ശാസ്ത്രത്തിലൂന്നിയുള്ള ചരിത്ര പുനര്‍ നിര്‍മ്മാണവും, വായനയും തുടര്‍ന്നു കൊണ്ടേയിരിക്കുകയാണ്.
CONTENT HIGHLIGHTS; Will Godse be ‘Rashtra Purush’?: Is NCRET rewriting history?
