അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.ലഖ്നൗ: ഉത്തർപ്രദേശിൽ ഓടുന്ന ട്രെയിനിൽനിന്ന് ചാടിയ യാത്രക്കാർക്ക് പരിക്ക്. ഉത്തർപ്രദേശിൽ മൊറാദാബാദ് ഡിവിഷനു കീഴിലുള്ള ബിൽപൂർ സ്റ്റേഷന് സമീപം, ഹൗറ-അമൃത്സർ മെയിലിലാണ് സംഭവം. ട്രെയിനിന്റെ ജനറൽ കോച്ചിൽ തീപിടിച്ചെന്ന അഭ്യൂഹം പരന്നതിനു പിന്നാലെയാണ് യാത്രക്കാർ പരിഭ്രാന്തരായി പുറത്തേക്ക് ചാടിയത്.
സംഭവത്തിൽ രണ്ട് സ്ത്രീകൾ ഉൾപ്പെടെ ആറ് യാത്രക്കാരെ ആശുപത്രിയിൽ പ്രവേശിപ്പിച്ചതായി റെയിൽവേ പോലീസ് (ജിആർപി) ഉദ്യോഗസ്ഥർ പറഞ്ഞു. ട്രെയിനിന് തീപിടിച്ചെന്ന അഭ്യൂഹം പരന്നതോടെ യാത്രക്കാർ പരിഭ്രാന്തരായി പുറത്തേക്ക് ചാടുകയായിരുന്നുവെന്ന് ജിആർപി സ്റ്റേഷൻ ഇൻചാർജ് രെഹാൻ ഖാൻ പറഞ്ഞതായി പിടിഐ റിപ്പോർട്ട് ചെയ്തു.
പരിക്കേറ്റ അൻവാരി (26), അക്താരി (45), കുൽദീപ് (26), റൂബി ലാൽ (50), ശിവ് ശരൺ (40), ചന്ദ്രപാൽ (35) എന്നിവരെ ഷാജഹാൻപുർ മെഡിക്കൽ കോളേജ് ആശുപത്രിയിൽ പ്രവേശിപ്പിച്ചു.
യാത്രക്കാരിൽ ആരോ ഒരാൾ ‘ഫയര്‍ എസ്റ്റിംഗ്വിഷര്‍’ അനാവശ്യമായി പ്രവർത്തിപ്പിച്ചതാണ് പരിഭ്രാന്തി പരക്കാൻ കാരണമായതെന്ന് സംശയിക്കുന്നതായി റെയിൽവേ ഉദ്യോഗസ്ഥർ പറഞ്ഞു. ട്രെയിൻ ബിൽപൂർ സ്റ്റേഷനിലെത്തിയതോടെയാണ് തീപിടിച്ചെന്ന വാർത്ത പരന്നത്. യാത്രക്കാരിലൊരാൾ ചെയിൻ വലിക്കുകയും ചിലർ ഓടുന്ന ട്രെയിനിൽ നിന്ന് താഴേക്ക് ചാടുകയുമായിരുന്നെന്ന് ജി.ആർ.പി സ്റ്റേഷൻ ഇൻചാർജ് രെഹാൻ ഖാൻ പി.ടി.ഐയോട് പറഞ്ഞു.
ചെയിൻ വലിച്ചെങ്കിലും ട്രയിൻ നിൽക്കാതെ നീങ്ങിക്കൊണ്ടേയിരിക്കുകയാണെന്ന് കരുതി പരിഭ്രാന്തരായാണ് യാത്രക്കാർ പുറത്തേക്ക് ചാടിയതെന്നാണ് ഉദ്യോഗസ്ഥർ പറയുന്നത്. 12 യാത്രക്കാർക്ക് പരിക്കേറ്റിട്ടുണ്ടെന്ന് നേരത്തെ റെയിൽവേ വക്താവ് കുൽതാർ സിങ് അറിയിച്ചിരുന്നു. സംഭവത്തിൽ റെയിൽവേ പൊലീസ് അന്വേഷണം ആരംഭിച്ചു.
