ന്യൂഡല്‍ഹി: സുപ്രീംകോടതിയിലെ എല്ലാ കേസുകളുടെയും തത്സമയ സംപ്രേഷണത്തിന് വഴിയൊരുങ്ങി. 16 കോടതിമുറികളിലും നടക്കുന്ന കേസുകളുടെ തത്സമയ സംപ്രേഷണം യൂട്യൂബിന് പകരം സുപ്രീംകോടതിയുടെ പ്രത്യേക ആപ്ലിക്കേഷനിലൂടെയാണ് നടത്തുക.
ചീഫ് ജസ്റ്റിസ് ഡി.വൈ. ചന്ദ്രചൂഡിന്റെ നിര്‍ദേശപ്രകാരം വെള്ളിയാഴ്ച നടത്തിയ ട്രയല്‍റണ്‍ വിജയകരമായതിന്റെ അടിസ്ഥാനത്തിലാണ് തത്സമയ സംപ്രേഷണം ഏർപ്പെടുത്തുന്നത്.
നിലവില്‍ സുപ്രീംകോടതിയില്‍ ഭരണഘടനാ ബെഞ്ചിന്റെ കേസുകളുടെയും പൊതുതാല്‍പര്യമുള്ള കേസുകളുടേയും തത്സമയ സംപ്രേഷണമാണ് അനുവദിച്ചിട്ടുള്ളത്. എന്നാല്‍ ഇത് മാറ്റി സുപ്രീംകോടതിയിലെ 16 കോടതി മുറികളിലും നടക്കുന്ന എല്ലാ കേസുകളുടേയും തത്സമയ സംപ്രേഷണം നടത്തുന്നതിനുള്ള നടപടികളാണ് ഇപ്പോള്‍ ആരംഭിച്ചിരിക്കുന്നത്. ഗുജറാത്ത് ഹൈക്കോടതിയാണ് രാജ്യത്ത് ആദ്യമായി മുഴുവന്‍ കോടതി നടപടികളും തത്സമയം സംപ്രേഷണം ചെയ്തത്.