അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.റായ്‌പൂർ: സ്‌ഫോടക വസ്തു പൊട്ടിത്തെറിച്ച് രണ്ട് ഇൻഡോ – ടിബറ്റൻ ബോർഡർ പോലീസിലെ ജവാന്മാർക്ക് വീരമൃത്യു. ഛത്തീസ്‌ഘട്ടിലെ നാരായണപൂർ ജില്ലയിൽ നക്‌സലൈറ്റുകൾ നടത്തിയ ആക്രമണത്തിൽ ഐഇഡി പൊട്ടിത്തെറിച്ചാണ് ജവാന്മാർ വീരമൃത്യു വരിച്ചത്. ആക്രമണത്തിൽ രണ്ട് പോലീസുകാർക്കും പരിക്കേറ്റു.
അബുജ്‌മാദ് മേഖലയിലെ ഖോഡിയാർ ഗ്രാമത്തിന് സമീപം ഉച്ചയ്ക്ക് 12 നായായിരുന്നു സംഭവം. മഹാരാഷ്ട്രയിലെ സത്താറ സ്വദേശി അമർ പൻവാർ (36), കർണാടകയിലെ കടപ്പ സ്വദേശി കെ. രാജേഷ് (36) എന്നിവരാണ് വീരമൃത്യു വരിച്ചത്.
സുരക്ഷാ ഉദ്യോഗസ്ഥരുടെ സംഘങ്ങൾ നക്‌സൽ വിരുദ്ധ ഓപ്പറേഷൻ നടത്തുന്നതിനിടെയായിരുന്നു ആക്രമണമെന്ന് പൊലീസ് ഉദ്യോഗസ്ഥർ പറഞ്ഞു. ഐടിബിപി, ബോർഡർ സെക്യൂരിറ്റി ഫോഴ്സ് (ബിഎസ്എഫ്), ജില്ലാ റിസർവ് ഗാർഡ് ഓഫ് പൊലീസ് എന്നിവയിലെ ഉദ്യോഗസ്ഥരാണ് ഓർക്കാ, ഇറക്ഭട്ടി, മൊഹൻദി മേഖലകളിൽ നിന്ന് ആരംഭിച്ച ഓപ്പറേഷനിൽ പങ്കെടുത്തത്.
പട്രോളിംഗ് സംഘങ്ങൾ ഓപ്പറേഷൻ കഴിഞ്ഞ് മടങ്ങുമ്പോഴായിരുന്നു സ്‌ഫോടനം നടന്നത്. പരിക്കേറ്റ നാല് ഉദ്യോഗസ്ഥരെ ആശുപത്രിയിലേക്ക് മാറ്റിയതായി അധികൃതർ അറിയിച്ചു. പരിക്കേറ്റ പൊലീസുകാർ അപകടനില തരണം ചെയ്തതായും അധികൃതർ പറഞ്ഞു.
