മുളച്ച ഉരുളക്കിഴങ്ങ് കഴിക്കല്ലേ പണികിട്ടും; പക്ഷെ ഇതുകൊണ്ട് മറ്റൊരു ഉപയോ​ഗം ഉണ്ട്

മുളച്ച ഉരുളക്കിഴങ്ങ് കഴിക്കുന്നത് വിഷത്തിന് തുല്യമാണ്. സൊളാനൈൻ, ചാക്കോനൈൻ എന്നീ ആൽക്കലോയ്ഡുകൾ മുളച്ച ഉരുളക്കിഴങ്ങിൽ അടങ്ങിയിട്ടുണ്ട്. ഇവ നാഡീവ്യൂഹത്തെ തകരാറിലാക്കുന്നതുകൊണ്ട് മുളച്ചുവന്ന ഉരുളക്കിഴങ്ങ് കറികളിൽ ഉപയോഗിക്കരുത്. ദഹനപ്രശ്നങ്ങൾ, ഉയർന്ന രക്ത സമ്മർദം, ശരീരത്തിന് തളർച്ച, പനി എന്നിവ മുളച്ച ഉരുളക്കിഴങ്ങ് കഴിക്കുന്നതിലൂടെ ഉണ്ടാകും. എന്നാൽ ഇവ വീട്ടിൽ കൃഷി ചെയ്യാനുപയോഗിക്കാം. മുളച്ച ഉരുളക്കിഴങ്ങും പച്ചനിറമുള്ള ഉരുളക്കിഴങ്ങും ഉപയോ​ഗിച്ച് വീട്ടാവശ്യത്തിനുള്ള ഉരുളക്കിഴങ്ങ് സ്വയം കൃഷിചെയ്യാം. മുളച്ച ഉരുളക്കിഴങ്ങ് നാല് കഷണങ്ങളാക്കണം. ഓരോ കഷ്ണത്തിലും ഒരു മുളയെങ്കിലും ഉണ്ടാകണം. നേരിട്ട് മണ്ണിൽ തന്നെ ഉരുളക്കിഴങ്ങ് നടാം. ചാണകപ്പൊടി, വേപ്പിൻ പിണ്ണാക്ക് എന്നിവ അടിവളമായി ഉപയോഗിക്കണം. മുള മുകളിലേക്ക് വരുന്ന രീതിയിലാണ് കിഴങ്ങുകഷ്ണങ്ങൾ മണ്ണിൽ നടേണ്ടത്.

ആഗസ്റ്റ്, സെപ്റ്റംബർ, ഒക്റ്റോബർ എന്നീ മാസങ്ങളാണ് ഉരുളക്കിഴങ്ങ് നടാൻ അനുയോജ്യം. നട്ട് 30 ദിവസം കഴിഞ്ഞാലും 70 ദിവസം കഴിഞ്ഞാലും ചുവട്ടിൽ മണ്ണ് കൂട്ടി വളമിട്ടുകൊടുക്കണം. ഉരുളക്കിഴങ്ങ് കൃഷിക്ക് ധാരാളം വെള്ളം ആവശ്യമാണ്. കീടങ്ങളെ അകറ്റാൻ വേപ്പിൻപിണ്ണാക്കും നല്ലതാണ്. രണ്ടാഴ്ച കൂടുമ്പോൾ ചാണകവും ചാരവും ചേർത്തുകൊടുക്കാം. വേപ്പെണ്ണ മിശ്രിതം ഇലകളിൽ തളിച്ചാൽ പുഴുശല്യം ഉണ്ടാകില്ല. 80 മുതൽ 120 ദിവസങ്ങൾ കഴിയുമ്പോൾ ഉരുളക്കിഴങ്ങ് വിളവെടുക്കാം.