അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.അഡീഷണല്‍ ചീഫ് സെക്രട്ടറി എ ജയതിലക് ഐഎഎസിനെതിരെ നിലപാട് കടുപ്പിച്ച് കളക്ടര്‍ ബ്രോ എന്നറിയപ്പെടുന്ന എന്‍ പ്രശാന്ത്. ജനിച്ച് വീണതേ ഐഎഎസ് ആവും എന്ന് കരുതിയിട്ടല്ലെന്നും ജോലിയും കരിയറും തീര്‍ക്കാന്‍ മാത്രം ആരും കേരളത്തില്‍ ഇല്ലെന്നും എന്‍ പ്രശാന്ത് ഐഎഎസ് പറയുന്നു. എ ജയതിലകിനെതിരെ ഫേസ്ബുക്കില്‍ എഴുതിയ കുറിപ്പിന് വന്ന കമന്റിന് മറുപടിയായാണ് അദ്ദേഹത്തിന്റെ വിശദീകരണം.
അഡീഷണല്‍ ചീഫ് സെക്രട്ടറി ഡോ. എ ജയതിലകിന്റെ ഫോട്ടോ സഹിതമാണ് ഇന്ന് രാവിലെ പ്രശാന്ത് ഫേസ്ബുക്കില്‍ പോസ്റ്റിട്ടത്. ‘തനിക്കെതിരെ റിപ്പോര്‍ട്ടുകള്‍ തയ്യാറാക്കി മാതൃഭൂമിക്ക് സമര്‍പ്പിക്കുന്ന അവരുടെ സ്പെഷ്യല്‍ റിപ്പോര്‍ട്ടര്‍ ഡോ. ജയതിലക് ഐഎഎസ് എന്ന സീനിയര്‍ ഉദ്യോഗസ്ഥനെക്കുറിച്ച് പൊതുജനം അറിയേണ്ട ചില വസ്തുതകള്‍ അറിയിക്കാന്‍ താന്‍ നിര്‍ബന്ധിതനായിരിക്കുകയാണ്’ എന്ന കുറിപ്പോടെയായിരുന്നു ഇത്.
‘നിങ്ങള്‍ ഒരു സര്‍ക്കാര്‍ ഉദ്യോഗസ്ഥനാണ്. സംസാരിക്കുന്നതും എഴുതുന്നതും ഒക്കെ നല്ലോണം ആലോചിച്ചു ചെയ്യൂ. ജോലിയും കരിയറും ഒക്കെ ഇല്ലാതാക്കാന്‍ കഴിയുന്ന ഒരു വിഭാഗം തലക്കുമുകളില്‍ ഉണ്ടെന്നു മറന്നു പോകരുത്. സമാധാനമായി ചിന്തിച്ചു പക്വതയോടെ വേണ്ടത് ചെയ്യൂ’ എന്നായിരുന്നു പോസ്റ്റിന് കീഴില്‍വന്ന കമന്റ്. ഇതിന് താഴെ ‘പഠിച്ചതാകട്ടെ നിയമമാണ്. ഓണക്കിറ്റില്‍ ഫ്രീ ആയി കിട്ടിയതല്ല, പഠിച്ച് എഴുതി കിട്ടിയ ജോലിയാണ്. ജോലിയും കരിയറും തീര്‍ക്കാന്‍ മാത്രം ആരും കേരളത്തില്‍ ഇല്ല എന്നാണെന്റെ ഒരിത്’ എന്ന് പ്രശാന്ത് മറുപടി നല്‍കി.
‘സര്‍ക്കാര്‍ തീരുമാനങ്ങള്‍ക്കും സര്‍ക്കാര്‍ നയങ്ങള്‍ക്കും എതിരെ സംസാരിക്കാനാണ് ചട്ടങ്ങളില്‍ വിലക്ക്. മഞ്ഞപ്പത്രത്തില്‍ പാര്‍ട്ട് ടൈം റിപ്പോര്‍ട്ടറായി ജോലി ചെയ്യുന്ന ഉന്നത ഉദ്യോഗസ്ഥനെക്കുറിച്ച് പൊസ്റ്റിടുന്നതിന് വിലക്കില്ല. ഡോ. ജയതിലക് റിപ്പോര്‍ട്ടറായി പാര്‍ട്ട് ടൈം ജോലി നോക്കുന്നത് ചട്ട ലംഘനമാണെന്നാണ് വിവരമുള്ളവര്‍ പറയുന്നത്. ഇങ്ങനെ വലിയ വലിയ പാര്‍ട്ട് ടൈം കക്ഷികള്‍ ഉണ്ടത്രെ. പണ്ട് ഡോ. ജയതിലക് കോഴിക്കോട് കളക്ടര്‍ ആയിരുന്ന കാലം മുതല്‍ക്കുള്ള മാതൃഭൂമിയുമായുള്ള ഒത്തുകളിയും അഡ്ജസ്റ്റ്മെന്റും റവന്യു വകുപ്പില്‍ ഏവര്‍ക്കും അറിയാം’ -പ്രശാന്ത് പറയുന്നു.
‘അയാള്‍ (ജയതിലക്) പോയി ആത്മഹത്യ ചെയ്താല്‍ സാറേ സാര്‍ അകത്ത് പോകും. അഴിമതി വിളിച്ച് പറയാന്‍ ആള്‍ക്കാര്‍ക്ക് പേടി ആണ് ഇപ്പോള്‍. പോയി തൂങ്ങി ചത്താല്‍ പറയുന്നവര് അകത്ത് പോകും’ എന്ന് ഒരാള്‍ ചൂണ്ടിക്കാട്ടിയപ്പോള്‍ ‘റിപ്പോര്‍ട്ടര്‍ ജയതിലക് അത്ര ലോലഹൃദയനോ’ എന്ന് പ്രശാന്ത് മറുപടി നല്‍കി.
‘പ്രശ്നങ്ങള്‍ പറഞ്ഞു തീര്‍ക്കാന്‍ നിങ്ങള്‍ ഐഎഎസുകാര്‍ക്ക് അസോസിയേഷന്‍ ഒന്നും ഇല്ലേ സോഷ്യല്‍ മീഡിയയില്‍ ഇങ്ങനെ പരസ്പരം വിഴുപ്പലക്കാന്‍ തുടങ്ങിയാല്‍ ഇതെവിടെ ചെന്ന് നില്‍ക്കും’ എന്ന് മറ്റൊരാള്‍ ചോദ്യമുന്നയിച്ചപ്പോള്‍ ‘മാതൃഭൂമി എന്ന മഞ്ഞപ്പത്രത്തില്‍ പാര്‍ട്ട് ടൈം റിപ്പോര്‍ട്ടറായി ജോലി ചെയ്യുന്ന ഉന്നത ഉദ്യോഗസ്ഥനെക്കുറിച്ച് പോസ്റ്റിടുന്നത് വിഴുപ്പലക്കലാണൊ ജനങ്ങള്‍ സത്യം അറിയുന്നതില്‍ ആര്‍ക്കാണ് ബുദ്ധിമുട്ട്’ -എന്നായിരുന്നു പ്രശാന്തിന്റെ മറുചോദ്യം.
