പലപ്പോഴും കടകളിൽ നിന്ന് കസ് കസിന് പകരം ചിയാ വിത്തുകൾ മാറി വാങ്ങിയിട്ടുള്ളവരായിരിക്കും നമ്മളിൽ പലരും. കാഴ്ചയിൽ ഒരുപോലെയുള്ള കുഞ്ഞൻ തരികൾ ആണെങ്കിലും ഇവ രണ്ടും രണ്ടാണ്. നമ്മുടെ നാട്ടിലെ ഭക്ഷണങ്ങളിൽ, പ്രത്യേകിച്ച് ബിരിയാണി, ഡെസേട്ട്, കറികളിലൊക്കെ ഉപയോഗിക്കുന്ന സുലഭമായി ലഭിക്കുന്ന പോപ്പി സീഡ്‌സാണ് കസ് കസ്. തുളസിയുടെ ഒരു വകഭേദമായ ഒസിമം ബാസിലിക്കം എന്ന ബേസില്‍ ചെടിയില്‍ നിന്നാണ്‌ കസ്‌കസ്‌ ഉണ്ടാക്കുന്നത്‌. മധ്യ, ദക്ഷിണ മെക്‌സിക്കോയിലും ഗ്വാട്ടിമാലയിലും ഉത്ഭവിച്ച സാല്‍വിയ ഹിസ്‌പാനിക്ക എന്ന ചെടിയില്‍ നിന്നാണ്‌ ചിയ വിത്തുകള്‍ ഉണ്ടാക്കുന്നത്‌. ഓവല്‍ രൂപത്തിലുള്ള ഈ ചെറുവിത്തുകള്‍ കറുപ്പ്‌, വെളുപ്പ്‌, ഗ്രേ നിറങ്ങളിലുണ്ടാകും.
കസ് കസിൽ ഫോസ്ഫറസ്, പ്രോട്ടീൻ, കാൽസ്യം, അയേൺ, തയാമീൻ, റൈബോഫ്‌ളേവിൻ, മഗ്നീഷ്യം, സിങ്ക് , വൈറ്റമിൻ എ, ബി കോംപ്ലക്സ്, ഇ, കെ എന്നിവ അടങ്ങിയിട്ടുണ്ട്. ഇതിലെ നാരുകൾ ദഹനപ്രക്രിയ സുഗമമാക്കുന്നു ഒപ്പം തടിയും വയറും കുറയ്ക്കുന്നു. കലോറി വളരെ കുറവാണ്. 2 ടീസ്പൂൺ കസ് കസ് ഒരു ഗ്ലാസ് വെള്ളത്തിൽ ഇട്ടുവച്ച് രാവിലെ കഴിക്കാം. പ്രമേഹവും കൊളസ്‌ട്രോളും കുറയ്ക്കാൻ ഏറെ ഫലപ്രദമാണ്. രക്തധമനികളിൽ കൊഴുപ്പടിയാതെ സംരക്ഷിക്കും. ഇതിലെ സിങ്ക് രോഗപ്രതിരോധശേഷി നൽകും. ആന്റി ബാക്ടീരിയൽ, വൈറൽ ഗുണങ്ങളുള്ളതുമാണ് ഈ ചെറിയ വിത്തുകൾ മുടിയുടെ ആരോഗ്യത്തെയും സംരക്ഷിക്കും.
ഫൈബറും കാത്സ്യവും സിങ്കും അയേണും മറ്റ് ആന്റി ഓക്‌സിഡന്റുകളും ധാരാളമടങ്ങിയ ഇവ ശരീരത്തിന്റെ മൊത്തത്തിലുള്ള ആരോഗ്യത്തിന് ഗുണം ചെയ്യുന്നതാണ് ചിയാ വിത്തുകൾ. ഫൈബര്‍ ധാരാളം അടങ്ങിയിരിക്കുന്നതിനാല്‍ ഇത് കഴിക്കുന്നത് ദഹനം മെച്ചപ്പെടുത്താനും മലബന്ധത്തെ അകറ്റുകയും ചെയ്യും. ദിവസം രണ്ടു സ്പൂണ്‍ ചിയ വിത്ത് വരെ കഴിക്കാം. പ്രോട്ടീന്‍, കാര്‍ബോഹൈഡ്രേറ്റ്‌സ്, ആരോഗ്യകരമായ കൊഴുപ്പ്, നാരുകള്‍ എന്നിവ ഇതിലുണ്ട്. ഒമേഗ 3 ഫാറ്റി ആസിഡുകളുടെ മികച്ച സ്രോതസാണ് ചിയ സീഡ്‌സ്. അതിനാല്‍ ഇവ ഡയറ്റിലുള്‍പ്പെടുത്തുന്നത് ഹൃദയത്തിന്റെ ആരോഗ്യം സംരക്ഷിക്കാന്‍ നല്ലതാണ്. തലച്ചോറിന്റെ ആരോഗ്യത്തിനും പ്രവര്‍ത്തനം മെച്ചപ്പെടുത്താനും ഇവ ഗുണകരമാണ്.