അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.വിശ്വഹിന്ദു പരിഷത്തിന്റെ ചടങ്ങിൽ വിവാദ പ്രസംഗം നടത്തിയ അലഹാബാദ് ഹൈക്കോടതി ജഡ്ജി ശേഖർ കുമാർ യാദവിനെതിരെ രാജ്യസഭയിൽ പ്രതിപക്ഷം ഇന്ന് ഇംപീച്ച്മെന്റ് നോട്ടിസ് നൽകും. രാജ്യസഭാ സെക്രട്ടറി ജനറലിനാണ് പ്രതിപക്ഷം പ്രമേയം കൈമാറുക. ദിഗ് വിജയ് സിംഗ്, കപിൽ സിബൽ എന്നിവർ അവതരിപ്പിക്കുന്ന പ്രമേയത്തിൽ വിവിധ പ്രതിപക്ഷ പാർട്ടികളിലെ എംപിമാർ ഒപ്പിട്ടു.
കഴിഞ്ഞ ദിവസം പ്രയാഗ്‌രാജിൽ വിശ്വഹിന്ദു പരിഷത്ത് നടത്തിയ പരിപാടിയിലാണ് ജസ്‌റ്റിസ് എസ്‌കെ യാദവ് വിവാദ പ്രസംഗം നടത്തിയത്. ഏകീകൃത സിവിൽ കോഡിനെ കുറിച്ച് സംഘടിപ്പിച്ച പരിപാടിയിലാണ് എസ്‌കെ യാദവിന്റെ പ്രകോപനമാരായ പ്രസംഗം നടന്നത്. നിയമം ശരിക്കും ഭൂരിപക്ഷത്തിനനുസരിച്ചാണ് പ്രവർത്തിക്കുന്നത്. ബഹുഭാര്യാത്വവും മുത്തലാഖ് ചൊല്ലലും ഒക്കെ നിരോധിക്കേണ്ടത് ആവശ്യമാണെന്നുമായിരുന്നു ജഡ്ജി ശേഖർ കുമാർ യാദവ് പറഞ്ഞത്. ഇത്തരം കാര്യങ്ങൾ ഒരിക്കലും അംഗീകരിക്കാൻ കഴിയില്ലെന്നും ശേഖർ കുമാർ യാദവ് പറഞ്ഞു. പരാമർശത്തിൽ വിവിധ കോണുകളിൽ നിന്ന് പ്രതിഷേധം ശക്തമാവുന്നുണ്ട്.
മറ്റ് സമുദായങ്ങൾ ഇതേ സംസ്‌കാരവും പാരമ്പര്യവും പിന്തുടരുമെന്ന് ഹിന്ദുക്കൾ പ്രതീക്ഷിക്കുന്നില്ലെന്നും എന്നാൽ ഈ രാജ്യത്തിന്റെ സംസ്‌കാരത്തെയും മഹത് വ്യക്തികളെയും ഈ നാടിന്റെ ദൈവത്തെയും അനാദരിക്കരുതെന്നാണ് പ്രതീക്ഷിക്കുന്നതെന്നും ശേഖർ കുമാർ യാദവ് പറഞ്ഞു. രാജ്യവ്യാപകമായി എകീകൃത സിവിൽ കോഡ് വരുമെന്ന കാര്യത്തിലും പ്രതീക്ഷ പങ്കുവെച്ചു.
