ചൈനീസ് സ്‌മാര്‍ട്ട്ഫോണ്‍ ബ്രാന്‍ഡായ വിവോ എക്സ് 200 ഫ്ലാഗ്ഷിപ്പ് സിരീസ് ഇന്ത്യയില്‍ അവതരിപ്പിച്ചതിന് പിന്നാലെ മികച്ച പ്രതികരണവുമായി എത്തുകയാണ് തെന്നിന്ത്യൻ സൂപ്പർതാരം സാമന്ത റൂത്ത് പ്രഭു. പുതിയ ഫോൺ കയ്യിൽ പിടിച്ചു നിൽക്കുന്ന ചിത്രങ്ങളാണ് താരം പങ്കുവെച്ചിരിക്കുന്നത്. വിവോ എക്സ് 200 പ്രോ ഫ്ലാഗ്‌ഷിപ്പിൽ എടുത്ത ചിത്രങ്ങളും താരം പങ്കുവെച്ചിട്ടുണ്ട്. ‘മാക്രോ അല്ലെങ്കിൽ പോർട്രെയ്റ്റിൽ എടുക്കുന്ന ഓരോ ഷോട്ടും എന്റെ കഥ പറയുന്നു, വിവോ എക്സ് 200 പ്രോ ലോകത്തെ വ്യത്യസ്തമായി കാണാൻ എന്നെ സഹായിക്കുന്നു’ എന്നാണ് പോസ്റ്റിന് താരം നൽകിയിരിക്കുന്ന അടിക്കുറിപ്പ്.
അത്യാധുനികമായ ക്യാമറ സാങ്കേതികവിദ്യകള്‍ സഹിതം പ്രീമിയം സൗകര്യങ്ങളോടെയാണ് വിവോ എക്സ്200 സിരീസ് ഇറക്കിയിരിക്കുന്നത്. ഇരു മോഡലുകളും മീഡിയടെക് ഡൈമന്‍സിറ്റി 9400 ചിപ്പില്‍ നിര്‍മിച്ചിരിക്കുന്നവയാണ്. എക്സ്200, എക്സ്200 പ്രോ എന്നീ രണ്ട് ഫ്ലാഗ്ഷിപ്പ് സ്‌മാര്‍ട്ട്‌ഫോണുകള്‍ അടങ്ങുന്നതാണ് വിവോ എക്സ്200 സിരീസ്. എന്നാല്‍ ചൈനയില്‍ അവതരിപ്പിച്ചിരുന്ന എക്സ്200 മിനി വേരിയന്‍റ് വിവോ ഇന്ത്യയിലേക്ക് കൊണ്ടുവന്നിട്ടില്ല. അടുത്ത മാസം രാജ്യത്തേക്ക് വരാനിരിക്കുന്ന വണ്‍പ്ലസ് 13ന് കടുത്ത മത്സരം ലക്ഷ്യമിട്ടാണ് എക്സ് സിരീസ് വിവോ ഇന്ത്യയില്‍ അവതരിപ്പിച്ചത്. വിവോ എക്സ്200ന്‍റെ 12 ജിബി റാം, 256 ജിബി സ്റ്റോറേജ് അടിസ്ഥാന വേരിയന്‍റിന്‍റെ വില 65,999 രൂപയാണ്. അതേസമയം വിവോ എക്സ്200 പ്രോയുടെ 16 ജിബി റാം + 512 ജിബി സ്റ്റോറേജ് ഫോണിന്‍റെ വില 94,999 രൂപയും.
വിവോ എക്സ്200 പ്രോ സവിശേഷതകള്‍
കൂടുതല്‍ പ്രീമിയം ഫീച്ചറുകള്‍ നിറഞ്ഞതാണ് വിവോ എക്സ്200 പ്രോ. ഡിസ്‌പ്ലെ സമാന അളവിലാണെങ്കിലും എല്‍ടിപിഒയിലേക്ക് അപ്‌ഗ്രേഡ‍് ചെയ്തിട്ടുണ്ട്. 1.63 എംഎം സ്ലിം ബെസ്സെല്‍സ്, 200 എംപി സ്സീസ് എപിഒ ടെലിഫോട്ടോ സെന്‍സര്‍, വിവോ വി3+ ഇമേജിംഗ് ചിപ്, 4കെ എച്ച്‌ഡിആര്‍ സിനിമാറ്റിക് പോട്രൈറ്റ് വീഡിയോ, 60fps 10-ബിറ്റ് ലോംഗ് വീഡിയോ റെക്കോര്‍ഡിംഗ്, 90 വാട്സ് ഫാസ്റ്റ് ചാര്‍ജിംഗോടെ 6,000 എംഎഎച്ച് ബാറ്ററി എന്നിവ വിവോ എക്സ്200 പ്രോയിലുണ്ട്.