അത്യാവശ്യ കാര്യത്തിന് സമയം കയ്യിൽപിടിച്ച് പുറത്തിറങ്ങുമ്പോൾ ആകും ട്രാഫിക് ബ്ലോക്ക്. ഒരിക്കലെങ്കിലും ബ്ലോക്കിൽ കിടന്ന് ബുദ്ധിമുട്ട് അനുഭവിച്ചിട്ടുള്ളവരായിരിക്കും നമ്മളിൽ പലരും. രണ്ടോ മൂന്നോ മണിക്കൂർ വരെ ബ്ലോക്ക് നീണ്ടുപോയാൽ തന്നെ നമ്മുടെ ക്ഷമ നശിക്കും. എന്നാൽ ആ ബ്ലോക്ക് 12 ദിവസം നീണ്ടു പോയാലോ ? ചിന്തിക്കാൻ പോലും കഴിയില്ല അല്ലേ ! എന്നാൽ അത്തരത്തിൽ ഒരു സംഭവം യഥാർഥത്തിൽ നടന്നു കഴിഞ്ഞു. ആ ബ്ലോക്ക് സംഭവിച്ചത് ചൈനയിലാണ്. 2010ൽ ചൈനീസ് ദേശീയ പാത 110ൽ ആണ് ഈ ബ്ലോക്ക് ഉടലെടുത്തത്. ഹെബെയ്, ഇന്നർ മംഗോളിയ മേഖല എന്നിവിടങ്ങളിലായിലായിരുന്നു ഈ വമ്പൻ ബ്ലോക്ക്. ആയിരക്കണക്കിനു വാഹനങ്ങൾ ഇതിനുള്ളിൽ കുടുങ്ങി.100 കിലോമീറ്ററോളം നീളത്തിലാണ് ബ്ലോക്കിലായി വാഹനങ്ങൾ അനങ്ങാതെ കിടന്നത്.
അപകടങ്ങളും പ്രകൃതിദുരന്തങ്ങളും അടക്കം സാധാരണഗതിയിൽ ട്രാഫിക് ബ്ലോക്കുകൾക്ക് പല കാരണങ്ങളുണ്ട്. എന്നാൽ ചൈനയിലെ ഈ വമ്പൻ ബ്ലോക്കിന് ഇതൊന്നുമായിരുന്നില്ല കാരണം. കുറച്ചു സമയത്തിനുള്ളിൽ ഒരുപാട് വാഹനങ്ങൾ റോഡിലേക്കു കയറിയതാണ് ഇതിനു പിന്നിലെ കാരണമായത്. ബെയ്‌ജിങ്ങിലേക്ക് കൺസ്ട്രക്ഷൻ സാമഗ്രികൾ കയറ്റി വന്ന ട്രക്കുകൾ ഈ ബ്ലോക്കിന്റെ സ്‌ഥിതി രൂക്ഷമാക്കി.
കടുത്ത ബ്ലോക്കിൽപെട്ട വാഹനങ്ങൾ മുന്നോട്ടുനീങ്ങാനാകാതെ പ്രതിസന്ധിയിലായി. ഒരു ദിവസത്തിൽ ഒരു കിലോമീറ്റർ എന്ന വളരെച്ചെറിയ തോതിലാണ് വാഹനങ്ങൾ നീങ്ങിയതെന്ന് പിന്നീട് ഈ സംഭവത്തെപ്പറ്റി ഗവേഷണം നടത്തിയ വിദഗ്‌ധർ കണ്ടെത്തി. വാഹനത്തിൽ കുടുങ്ങിയവരുടെ ക്ഷമ ശരിക്കും പരീക്ഷിക്കപ്പെട്ടു ഈ സംഭവത്തിൽ. ആളുകൾ തങ്ങളുടെ വാഹനങ്ങളെ താൽക്കാലിക താമസയിടങ്ങളാക്കി മാറ്റുന്ന കാഴ്ചവരെ അന്നുണ്ടായി. ആ മേഖലയിലെ ചില തദ്ദേശീയ കച്ചവടക്കാർ അവസരം ശരിക്കും ഉപയോഗിച്ചു. വിപണിയിലുള്ളതിന്റെ പല മടങ്ങ് വിലയിൽ ഇവർ യാത്രക്കാർക്ക് ഇൻസ്‌റ്റന്റ് നൂഡിൽസും കുപ്പിവെള്ളവും മറ്റു ഭക്ഷണപ്പൊതികളുമൊക്കെ വിൽക്കാൻ തുടങ്ങി. വിപണിയിൽ 1 യുവാൻ വിലയുള്ള കുപ്പിവെള്ളം ബ്ലോക്കിൽപെട്ടവർക്ക് വിറ്റത് 15 യുവാനാണ് എന്നത് ഈ വിപണി മെച്ചപ്പെടുത്തലിന്റെ മികച്ച ഉദാഹരണം. 12 ദിവസങ്ങളായതോടെ അധികാരികളുടെ ഇടപെടലുകളും ഗതാഗത നിയന്ത്രണവും ശക്‌തമായി. ഒടുവിൽ ബ്ലോക്ക് മാറുകയും ചെയ്തു.