ജനപ്രിയതാരങ്ങളായ ബേസിൽ ജോസഫ്, സൗബിൻ ഷാഹിർ എന്നിവർ കേന്ദ്രകഥാപാത്രമായി എത്തുന്നു, ഹിറ്റ്‌മേക്കറായ അൻവർ റഷീദ് നിർമ്മിക്കുന്നു എന്നിങ്ങനെ ആദ്യം മുതൽ ഏറെ പ്രതീക്ഷകൾ തന്ന ചിത്രമാണ് പ്രാവിൻകൂട് ഷാപ്പ്. ചിത്രം മികച്ച മേക്കിങ്ങിലൂടെയും കഥപറച്ചിലിലൂടെയും പ്രേക്ഷകരെ പിടിച്ചിരുത്തുന്നു എന്നാണ് ആദ്യ പ്രതികരണങ്ങൾ. വീണ്ടുമൊരു ഹിറ്റ് സിനിമയുമായി ബേസിൽ ജോസഫ് തിയേറ്ററിൽ എത്തിയിരിക്കുകയാണ് എന്നും അഭിപ്രായങ്ങളുണ്ട്.
പ്രേമലുവിന് ശേഷം വിഷ്ണു വിജയ് വീണ്ടും മ്യൂസിക് കൊണ്ടും ഞെട്ടിച്ചിട്ടുണ്ടെന്നും ചിത്രത്തിന്റെ എഡിറ്റിംഗ് നന്നായിട്ടുണ്ടെന്നും പ്രതികരണങ്ങൾ വരുന്നുണ്ട്. സൗബിൻ ഷാഹിർ, ചെമ്പൻ വിനോദ്, ചാന്ദിനി എന്നിവർ മികച്ച പ്രകടനമാണ് കാഴ്ചവെച്ചിരിക്കുന്നതെന്നും സിനിമയുടെ ട്വിസ്റ്റുകൾ വർക്ക് ആയെന്നും ചിത്രം കണ്ടിറങ്ങുന്നവർ സോഷ്യൽ മീഡിയയിൽ കുറിക്കുന്നു. ആദ്യ പകുതിയേക്കാൾ രണ്ടാം പകുതി ഒരുപടി മുന്നിൽ നിൽക്കുന്നെന്നും അഭിപ്രായങ്ങളുണ്ട്. 2025 ഒരു ഹിറ്റിലൂടെ ബേസിൽ ജോസഫ് ആരംഭിച്ചിരിക്കുകയാണ് എന്നാണ് ആദ്യ പ്രതികരണങ്ങൾ സൂചിപ്പിക്കുന്നത്.
എന്നാൽ ചിത്രത്തിൽ പലയിടത്തും ഡാർക്ക് ഹ്യൂമർ കൊണ്ടുവരാൻ ബോധപൂർവ്വം ശ്രമിച്ചിട്ടുണ്ടെങ്കിലും അതത്ര ഏശുന്നില്ല. മാത്രമല്ല, പലയിടത്തും ആ ഡാർക്ക് ഹ്യൂമർ ട്രീറ്റ്‌മെന്റ് അരോചകമായി തോന്നുന്നു എന്നും അഭിപ്രയങ്ങളുണ്ട്. ഒരു മരണത്തെ ആ ഷാപ്പിലുള്ളവർ ഡീൽ ചെയ്യുന്ന രീതിയൊക്കെ വളരെ ആർട്ടിഫിഷ്യലും വിചിത്രവുമായി അനുഭവപ്പെട്ടു. ആ വൈചിത്ര്യത്തെ ന്യായീകരിക്കാവുന്ന രീതിയിലുള്ള വെടിക്കോപ്പൊന്നും ചിത്രം കരുതിവയ്ക്കുന്നുമില്ല എന്നും ചിലർ പറയുന്നു.
മലയാള സിനിമയിലെ യുവസംഗീതസംവിധായകരിൽ ഏറെ ശ്രദ്ധേയനായ വിഷ്ണു വിജയ് ഈണമിട്ട മനോഹരമായ നാല് ഗാനങ്ങളാണ് സിനിമയിലുള്ളത്. കഴിഞ്ഞ വർഷത്തെ സൂപ്പർ ഹിറ്റ് സിനിമയായ പ്രേമലുവിന്‍റെ ഗാനങ്ങളൊരുക്കിയ വിഷ്ണുവിന്‍റെ ഈ വർഷത്തെ ആദ്യ സിനിമയാണ് പ്രാവിൻകൂട് ഷാപ്പ്. അൻവർ റഷീദ് എന്‍റർടൈയ്ൻമെന്‍റ്സിന്‍റെ ബാനറിൽ അൻവർ റഷീദ് നിർമ്മിച്ച് നവാഗതനായ ശ്രീരാജ് ശ്രീനിവാസൻ സംവിധാനം ചെയ്യുന്ന ചിത്രം എറണാകുളത്തും തൃശൂരുമായാണ് ചിത്രീകരിച്ചിരിക്കുന്നത്. ഡാർക്ക് ഹ്യൂമർ ജോണറിൽ ഒരുങ്ങുന്ന ചിത്രത്തിൽ ചാന്ദ്നി ശ്രീധരൻ, ശിവജിത് പത്മനാഭൻ, ശബരീഷ് വർമ്മ, നിയാസ് ബക്കർ, രേവതി, വിജോ അമരാവതി, രാംകുമാർ, സന്ദീപ്, പ്രതാപൻ കെ.എസ് തുടങ്ങിയവർ മറ്റു കഥാപാത്രങ്ങളെ അവതരിപ്പിക്കുന്നു.
ലോകമാകെ തരംഗമായി മാറിയ ‘മഞ്ഞുമ്മൽ ബോയ്‌സി’ന്‍റെ വലിയ വിജയത്തിനു ശേഷം ഷൈജു ഖാലിദ് ഛായാഗ്രഹണം നിർവ്വഹിക്കുന്ന ചിത്രം കൂടിയാണിത്. ഫഹദ് ഫാസില്‍ നായകനായി ജിത്തു മാധവന്‍ സംവിധാനം ചെയ്ത ‘ആവേശ’ത്തിനു ശേഷം എ&എ എന്‍റർടൈയ്ൻമെന്‍റ്സാണ് ‘പ്രാവിന്‍കൂട് ഷാപ്പ്’ പ്രദര്‍ശനത്തിനെത്തിക്കുന്നത്.
CONTENT HIGHLIGHT: pravinkoodu shappu response after first show