ബംഗാളി നടിയുടെ പരാതിയിൽ രജിസ്റ്റർ ചെയ്ത ലൈംഗികാതിക്രമ കേസ് റദ്ദാക്കണമെന്ന് ആവശ്യപ്പെട്ട് സംവിധായകൻ രഞ്ജിത്ത് ഹൈക്കോടതിയിൽ ഹർജി നൽകി. നടി പരാതി നൽകാൻ വൈകിയതിനാൽ കേസ് നിലനിൽക്കില്ലെന്നാണ് രഞ്ജിത്തിന്റെ വാദം. 2009 ൽ നടന്ന സംഭവത്തിന് നടി 2024 ഓഗസ്റ്റ് 26നാണ് പരാതി നൽകിയതെന്നും അതിനാൽ തനിക്കെതിരെ പരാതിയിൽ പറയുന്ന ആരോപണങ്ങൾ നിലനിൽക്കില്ലെന്നുമാണ് രഞ്ജിത്ത് പറയുന്നത്.
2009-ൽ ‘പാലേരി മാണിക്യം’ സിനിമയുടെ ഓഡിഷന് ബംഗാളി നടിയെ എറണാകുളത്തേക്ക് വിളിച്ചുവരുത്തി ഹോട്ടൽ മുറിയിൽ വച്ച് സംവിധായകൻ രഞ്ജിത്ത് പീഡിപ്പിച്ചെന്നായിരുന്നു പരാതി. അനുമതിയില്ലാതെ തന്നെ സ്പർശിച്ചെന്ന് കാണിച്ച് നടി പരാതി നൽകുകയായിരുന്നു. സ്ത്രീയുടെ അന്തസ്സിന് ക്ഷതമേല്പിക്കുന്ന പ്രവൃത്തിയുണ്ടായി എന്നതടക്കമുള്ള വകുപ്പുകൾ ഉൾപ്പെടുത്തിയെടുത്ത കേസുകൾ റദ്ദാക്കണമെന്നാണ് ഇപ്പോൾ രഞ്ജിത്ത് ഹർജിയിൽ ആവശ്യപ്പെടുന്നത്. നടി പരാതി ഉന്നയിച്ചതിന് പിന്നാലെ താൻ ഇരയാണെന്നായിരുന്നു രഞ്ജിത്തിന്റെ പ്രതികരണം. ഇതേ തുടർന്ന് നടി നിയമപരമായി മുന്നോട്ടുപോവുകയായിരുന്നു.
പ്ലസ്ടുവിൽ പഠിക്കവെ ബാവൂട്ടിയുടെ നാമത്തിൽ എന്ന പടത്തിന്റെ ലൊക്കേഷനിൽ വച്ചാണ് സംവിധായകനെ പരിചയപ്പെടുന്നത്. പിന്നീട് പാലേരി മാണിക്യം സിനിമയിൽ അഭിനയിക്കാൻ വിളിച്ചുവരുത്തിയ ശേഷം സിനിമയുടെ കാര്യങ്ങൾ ചർച്ച ചെയ്യാനായി രഞ്ജിത്ത് താമസിക്കുന്ന കൊച്ചി കടവന്ത്രയിലെ ഫ്ലാറ്റിലേക്ക് വരാൻ ആവശ്യപ്പെട്ടു. ചർച്ചയ്ക്കിടെ രഞ്ജിത്ത് തന്റെ കയ്യിൽ കയറിപ്പിടിച്ചു. പിന്നീട് ശരീരത്തിന്റെ മറ്റ് ഭാഗങ്ങളിൽ സ്പർശിച്ചുവെന്നും അവിടെ നിന്ന് ഇറങ്ങിയ താൻ സിനിമയിൽ അഭിനയിക്കാതെ തിരിച്ചുപോയെന്നും നടി പറഞ്ഞിരുന്നു. ഹേമ കമ്മിറ്റി റിപ്പോർട്ടിന് പിന്നാലെയായിരുന്നു ബംഗാളി നടി വെളിപ്പെടുത്തലുമായി എത്തിയത്. നടി കഴിഞ്ഞ വർഷം നൽകിയ പരാതിയിൽ പോലീസ് എറണാകുളം അഡീഷണൽ ചീഫ് ജുഡീഷ്യൽ മജിസ്‌ട്രേറ്റ് കോടതിയിൽ അന്തിമ റിപ്പോർട്ടും ഫയൽ ചെയ്തിരുന്നു. 2009-ൽ നടന്നതായി പറയുന്ന സംഭവത്തിൽ 2024 ഓഗസ്റ്റ് 26-നാണ് പരാതി നൽകിയത്. കാലതാമസം ഉണ്ടായതിനാൽ തുടർനടപടിയെടുക്കാൻ നിയമപരമായ തടസ്സമുണ്ടായിരുന്നു. ഇത് കണക്കിലെടുക്കാതെയാണ് മജിസ്‌ട്രേറ്റ് കോടതി തുടർനടപടി സ്വീകരിച്ചതെന്നാണ് ഹർജിയിൽ പറയുന്നത്.