അച്ഛന്‍റെ കാമുകിയെ ചായക്കടയിലിട്ട് കുത്തിക്കൊലപ്പെടുത്തി മകൻ. 16 കാരനായ മകനാണ് അച്ഛന്‍റെ മുന്നിലിട്ട് 24കാരിയായ കാമുകിയെ കൊലപ്പെടുത്തിയത്. വെസ്റ്റ് ബെംഗാളിലാണ് സംഭവം. ഇഎം ബൈപാസ് റോഡിലുള്ള ചായക്കടയിൽ വച്ച് വ്യാഴാഴ്ച രാത്രി ഒൻപതു മണിയോടെയാണ് കൊലപാതകം നടന്നത്. സംഭവത്തിൽ 16 കാരനേയും മാതാവിനേയും കൂടെയുണ്ടായിരുന്ന 22 കാരനെയും പൊലീസ് അറസ്റ്റ് ചെയ്തു.
അച്ഛന് 24 കാരിയുമായി ബന്ധമുള്ളത് അറിഞ്ഞ മകൻ കാറിന്‍റെ ജിപിഎസ് പിന്തുടർന്നാണ് ഇരുവരുമുള്ള ചായക്കടയിൽ എത്തിയതെന്ന് പൊലീസ് പറഞ്ഞു. ചായക്കടയിലെത്തിയ 16 കാരനും മാതാവും കണ്ടത് കാമുകിക്കൊപ്പം ഇരിക്കുന്ന അച്ഛനെയാണ്. ഇതോടെ പ്രകോപിതനായ മകൻ അച്ഛന്‍റെ കാമുകിയെ മൂർച്ചയേറിയ ആയുധമുപയോഗിച്ച് കൊലപ്പെടുത്തുകയായിരുന്നുവെന്ന് പൊലീസ് പറഞ്ഞു.
അച്ഛന്‍റെ അവിഹിത ബന്ധം മനസിലായതോടെ പതിനാറുകാരനും അമ്മയും ചേർന്ന് കൊലപാതകത്തിന് പദ്ധതിയിട്ടിരുന്നുവെന്ന് പൊലീസ് പറഞ്ഞു. പ്രതിക്ക് പ്രായപൂർത്തിയാകാത്തതിനാൽ ആരുടേയും പേരുവിരങ്ങൾ വെളിപ്പെടുത്താനാകില്ലെന്നും പൊലീസ് വ്യക്തമാക്കി. അതേസമയം സംഭവത്തിന് പിന്നാലെ 16 കാരന്‍റെ പിതാവ് രക്ഷപ്പെട്ടെന്നും ഇയാൾക്കായി അന്വേഷണം നടത്തി വരികയാണെന്നും പൊലീസ് പറഞ്ഞു.