അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.ഇന്ത്യന്‍ ഭക്ഷണ, ഗ്രോസറി വിതരണ ഫ്ലാറ്റ്‌ഫോമായ സൊമാറ്റോ ഇനി പുതിയ പേരിൽ അറിയപ്പെടും. ‘എറ്റേര്‍ണല്‍’ എന്നായിരിക്കും ഇനി കമ്പനിയുടെ പുതിയ പേര്. പുതിയ ലോഗോയും ഇതിനൊപ്പം അവതരിപ്പിച്ചിട്ടുണ്ട്. വ്യാഴാഴ്ച്ച രാത്രിയാണ് കമ്പനി പുതിയ മാറ്റം പ്രഖ്യാപിച്ചത്.
സൊമാറ്റോ ഉടൻ തന്നെ എറ്റേണൽ ലിമിറ്റഡ് എന്നറിയപ്പെടുമെന്നും കമ്പനിയുടെ പേര് മാറ്റത്തിന് ബോർഡ് അംഗീകാരം നൽകിയതായും സിഇഒ ദീപീന്ദർ ഗോയലാണ് അറിയിച്ചത്. ഇത് ഒരു പേരുമാറ്റം മാത്രമല്ലെന്നും കമ്പനിയെ തന്നെ അഴിച്ചുപണിയാനുള്ള നീക്കത്തിന്റെ ഭാഗമാണ് ഇതെന്നും അദ്ദേഹം കൂട്ടിച്ചേർത്തു.
ഓഹരി ഉടമകൾ മാറ്റം അംഗീകരിച്ചുകഴിഞ്ഞാൽ, കമ്പനി അതിൻ്റെ കോർപ്പറേറ്റ് വെബ്‌സൈറ്റ് zomato.comൽ നിന്ന് eternal.comലേക്ക് മാറ്റും. ഡിസംബർ 23 ന് സൊമാറ്റോ ബിഎസ്ഇ സെൻസെക്സിൽ പ്രവേശിച്ചതിന് ആഴ്ചകൾക്ക് ശേഷമാണ് കമ്പനി മുഖം മിനുക്കുന്നത്.
രണ്ട് വര്‍ഷത്തിലധികമായി കമ്പനി ആന്തരികമായി ഉപയോഗിച്ചുവന്ന പേരാണ് ‘എറ്റേര്‍ണല്‍’. നാലു വ്യവസായ സെക്ഷനുകളായിട്ടായിരിക്കും കമ്പനി പ്രവര്‍ത്തിക്കുക. ഭക്ഷണവിതരണ വിഭാഗമായ സൊമാറ്റോ, ക്വിക്ക് കൊമേഴ്സ് യൂണിറ്റായ ബ്ലിങ്കിറ്റ്, ലൈവ് ഇവന്റ് ബിസിനസ് ഡിസ്ട്രിക്റ്റ്, കിച്ചന്‍ വിതരണയൂണിറ്റ് ഹൈപ്പര്‍പ്യുയര്‍ എന്നിങ്ങനെ നാലു വിഭാഗമായി കമ്പനി തുടരും.
സെന്‍സെക്‌സില്‍ ഇടം നേടുന്ന ഇന്ത്യയിലെ ആദ്യത്തെ സ്റ്റാര്‍ട്ടപ്പ് കമ്പനി കൂടിയാണ് സൊമാറ്റോ. കമ്പനി ഈ വർഷം പ്രവർത്തനം ആരംഭിച്ച് പതിനേഴ് വർഷം പൂർത്തിയാക്കുക കൂടിയാണ്.
