ന്യൂഡൽഹി: തൊഴിലുടമയോ മേലുദ്യോഗസ്ഥനോ ജോലിയുമായി ബന്ധപ്പെട്ടു ജീവനക്കാരെ ശാസിക്കുന്നതു ക്രിമിനൽ കുറ്റമല്ലെന്നു സുപ്രീംകോടതി. ഇതിനെ മനഃപൂർവമുള്ള അപമാനമായി കണക്കാക്കാനാവില്ലെന്നും കോടതി വ്യക്തമാക്കി. ശാസന ജോലിസ്ഥലത്തെ അച്ചടക്കവും ചുമതലകളുടെ നിർവഹണവുമായി ബന്ധപ്പെട്ടായിരിക്കണം. തൊഴിലുടമയോ മേലുദ്യോഗസ്ഥനോ ജീവനക്കാരുടെ ജോലിയിലെ പ്രകടനത്തെ ചോദ്യം ചെയ്യുന്നില്ലെങ്കിൽ അതു തെറ്റായ മാതൃക സൃഷ്ടിക്കുമെന്നു ജസ്റ്റിസുമാരായ സഞ്ജയ് കരോൾ, സന്ദീപ് മേത്ത എന്നിവരുടെ ബെഞ്ച് നിരീക്ഷിച്ചു. ജീവനക്കാരിയെ ശാസിച്ചതിന് സെക്കന്തരാബാദിലെ നാഷനൽ ഇൻസ്റ്റിറ്റ്യൂട്ട് ഫോർ എംപവർമെന്റ് ഓഫ് പഴ്സൻസ് വിത്ത് ഇന്റലക്ച്വൽ ഡിസെബിലിറ്റീസ് ഡയറക്ടർക്കെതിരായ കേസ് റദ്ദാക്കിയാണ് കോടതിയുടെ നിരീക്ഷണം.