അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.വനിതാ അണ്ടര്‍ 23 ഏകദിന ടൂര്‍ണ്ണമെന്റില്‍ കേരളത്തിന് സൗരാഷ്ട്രയോട് തോല്‍വി. മൂന്ന് വിക്കറ്റിനായിരുന്നു സൗരാഷ്ട്രയുടെ വിജയം. ടൂര്‍ണ്ണമെന്റില്‍ കേരളത്തിന്റെ രണ്ടാം തോല്‍വിയാണ് ഇത്. ടോസ് നേടി ആദ്യം ബാറ്റ് ചെയ്ത കേരളം 45 ഓവറില്‍ 156 റണ്‍സിന് ഓള്‍ ഔട്ടാവുകയായിരുന്നു. ക്യാപ്റ്റന്‍ നജ്‌ല സിഎംസി, ഓപ്പണര്‍ മാളവിക സാബു എന്നിവര്‍ മാത്രമാണ് കേരള ബാറ്റിങ് നിരയില്‍ അല്പമെങ്കിലും പിടിച്ചു നിന്നത്. നജ്‌ല 40ഉം മാളവിക 39ഉം റണ്‍സ് നേടി. വൈഷ്ണ എം പി 16ഉം അജന്യ ടി പി 11ഉം റണ്‍സെടുത്തപ്പോള്‍ മറ്റുള്ളവര്‍ രണ്ടക്കം കാണാതെ പുറത്തായി. സൗരാഷ്ട്രയ്ക്ക് വേണ്ടി ഹീര്‍വ മൂന്നും ആയുഷി, ജഡേജ ഹര്‍ഷിതാബ എന്നിവര്‍ രണ്ട് വിക്കറ്റ് വീതവും വീഴ്ത്തി.
മറുപടി ബാറ്റിങ്ങിന് ഇറങ്ങിയ സൗരാഷ്ട്രയ്ക്ക് ഓപ്പണര്‍ ഉമേശ്വരിയുടെ മികച്ച ഇന്നിങ്‌സാണ് വിജയമൊരുക്കിയത്. ഉമേശ്വരി 71 റണ്‍സ് നേടി. മധ്യ ഓവറുകളില്‍ തുടരെ വിക്കറ്റുകള്‍ വീഴ്ത്തി കേരള ബൌളര്‍മാര്‍ പിടിമുറുക്കിയെങ്കിലും രണ്ട് പന്തുകള്‍ ബാക്കി നില്‌ക്കെ സൌരാഷ്ട്ര ലക്ഷ്യത്തിലെത്തി. കേരളത്തിന് വേണ്ടി അജന്യ ടി പി രണ്ടും ജോഷിത വി ജെ, നിയ നസ്‌നീന്‍, അലീന എം പി എന്നിവര്‍ ഓരോ വിക്കറ്റും വീഴ്ത്തി.
