പ്രോവിഡന്റ് ഫണ്ട്; ചില പുതിയ മാറ്റങ്ങൾ അറിയാം

പ്രോവിഡന്റ് ഫണ്ടുമായി ബന്ധപ്പെട്ട് ചില മാറ്റങ്ങൾ നടപ്പാക്കുകയാണ് എംപ്ലോയീ പ്രോവിഡന്റ് ഫണ്ട് ഓർഗനൈസേഷൻ (EPFO). അംഗങ്ങൾക്ക് കൂടുതൽ സൗകര്യങ്ങൾ ലഭ്യമാക്കുക, നടപടിക്രമങ്ങൾ ഡിജിറ്റൈസ് ചെയ്യുക, സുതാര്യത വർധിപ്പിക്കുക എന്നീ ലക്ഷ്യങ്ങളാണ് പുതിയ മാറ്റത്തിന് പിന്നിൽ. ഇതോടെ പ്രൊഫൈൽ അപ്ഡേഷൻ, തൊഴിൽ മാറുമ്പോൾ പി.എഫ് ട്രാൻസ്ഫർ, ഉയർന്ന പെൻഷനുമായി ബന്ധപ്പെട്ട പോളിസികൾ തുടങ്ങി പി.എഫുമായി ബന്ധപ്പെട്ട എല്ലാക്കാര്യങ്ങളും കൂടുതൽ ലളിതമാകും.
1. പ്രൊഫൈൽ അപ്ഡേഷൻ
പ്രൊഫൈൽ അപ്ഡേറ്റ് ചെയ്യുക എന്നത് ഏറെക്കുറെ ബുദ്ധിമുട്ടേറിയ ഒരു പ്രക്രിയയായിരുന്നു. നിങ്ങളുടെ യു.എ.എൻ ആധാറുമായി ബന്ധിപ്പിച്ചിട്ടുണ്ടെങ്കിൽ പ്രൊഫൈൽ അപ്ഡേഷൻ ലളിതമായി ചെയ്യാം. നിങ്ങളുടെ പേര്, ജനനത്തിയ്യതി, ജെൻഡെർ, നാഷണാലിറ്റി, രക്ഷിതാക്കളുടെ പേര്, മാരിറ്റൽ സ്റ്റാറ്റസ്, ജീവിത പങ്കാളിയുമായി ബന്ധപ്പെട്ട വിവരങ്ങൾ, തൊഴിൽ ആരംഭിച്ച/അവസാനിച്ച തിയ്യതികൾ തുടങ്ങിയ കാര്യങ്ങളെല്ലാം ഒരു രേഖകളുമില്ലാതെ തന്നെ ഓൺലൈനായി നൽകാൻ സാധിക്കും. അതേ സമയം നിങ്ങളുടെ യു.എ.എൻ, 2017 ഒക്ടോബർ 1ന് മുമ്പ് ലഭിച്ചതാണെങ്കിൽ ചില വിവരങ്ങൾ മാറ്റണമെങ്കിൽ എംപ്ലോയറുടെ അപ്രൂവൽ ആവശ്യമാണ്.

2. പി.എഫ് ട്രാൻസ്ഫർ
ജോലി മാറുമ്പോൾ പി.എഫ് മാറ്റുക എന്നത് സങ്കീർണമായ ഒരു നടപടിക്രമമായിരുന്നു. 2025 ജനുവരി 15ന് ഇത് സംബന്ധിച്ച് ഇ.പി.എഫ്.ഒ പുതിയ മാർഗനിർദ്ദേശങ്ങൾ പുറപ്പെടുവിച്ചിട്ടുണ്ട്. ഇത് പ്രകാരം ചില കേസുകളിൽ പഴയ അല്ലെങ്കിൽ പുതിയ തൊഴിലുടമയുടെ അംഗീകാരം പി.എഫ് ട്രാൻസ്ഫറിന് ആവശ്യമില്ല. താഴെ പറയുന്ന കേസുകളിലാണ് ഇത് ബാധകമായിരിക്കുന്നത്.
ഒരേ യു.എ.എൻ ലിങ്ക് ചെയ്തിരിക്കുന്ന മെംബർ ഐ.ഡിയിലെ ട്രാൻസ്ഫറുകൾ (2017 ഒക്ടോബർ 1ന് ശേഷം ഇഷ്യു ചെയ്ത, ആധാറുമായി ലിങ്ക് ചെയ്തിരിക്കുന്ന യു.എ.എൻ)
ആധാറുമായി ലിങ്ക് ചെയ്തിരിക്കുന്ന രണ്ട് വ്യത്യസ്ത യു.എ.എൻ. പേര്, ജനനത്തിയ്യതി, ജെൻഡർ എന്നിവയിൽ മാറ്റമുണ്ടാകരുത്. ഒരു യു.എ.എൻ നേരത്തെ ഇഷ്യു ചെയ്തതും, രണ്ടാമത്തെ യു.എ.എൻ പിന്നീട് ഇഷ്യു ചെയ്തതും ആണെന്നിരിക്കട്ടെ. ഇവിടെയും ആധാർ വിവരങ്ങൾ പൊരുത്തപ്പെടുന്നുണ്ടെങ്കിൽ ട്രാൻസ്ഫർ നടത്താൻ സാധിക്കും.
3. ജോയിന്റ് ഡിക്ലറേഷനിലെ മാറ്റങ്ങൾ
ജോയിന്റ് ഡിക്ലറേഷനുമായി ബന്ധപ്പെട്ടും പുതിയ മാർഗ നിർദ്ദേശങ്ങൾ പുറത്തിറക്കിയിട്ടുണ്ട്. നേരത്തെ ബാധകമായിരുന്ന ‘Earlier SOP version 3.0’ ഒഴിവാക്കി. ആധാർ അധിഷ്ഠിത യു.എ.എൻ ഉള്ളവർക്കും, പഴയ യു.എ.എൻ ആണെങ്കിലും ആധാറുമായി ബന്ധപ്പെട്ട് യു.എ.എൻ വെരിഫിക്കേഷൻ നടത്തിയവർക്കും ഓൺലൈനായി ജോയിന്റ് ഡിക്ലറേഷൻ നൽകാം. യു.എ.എൻ ഇല്ലാത്ത, ആധാർ വെരിഫിക്കേഷൻ നടത്താത്ത, മരണം തുടങ്ങിയ കേസുകളിൽ ഫിസിക്കൽ ജോയിന്റ് ഡിക്ലറേഷന് വ്യവസ്ഥകളുണ്ട്

4. പുതിയ പെൻഷൻ പേയ്മെന്റ് സംവിധാനം
2025 ജനുവരി 1 മുതൽ സെൻട്രലൈസ്ഡ് പെൻഷൻ പേയ്മെന്റ് സിസ്റ്റം (CPPS) ഇ.പി.എഫ്.ഒ നടപ്പാക്കിയിട്ടുണ്ട്. നിലവിൽ രാജ്യത്തെ ഏത് ബാങ്ക് അക്കൗണ്ടിലേക്കും എൻ.പി.സി.ഐ പ്ലാറ്റ്ഫോമിൽ നിന്ന് നേരിട്ട് പെൻഷൻ അയയ്ക്കാൻ സാധിക്കും. അതേ സമയം യു.എ.എൻ ആധാറുമായി ലിങ്ക് ചെയ്തിരിക്കേണ്ടത് ഇവിടെ ആവശ്യമാണ്. എങ്കിൽ മാത്രമേ ഡിജിറ്റൽ ലൈഫ് സർട്ടിഫിക്കറ്റ് (ജീവൻ പ്രമാൺ) ലഭ്യമാവുകയുള്ളു.

5. ഉയർന്ന പെൻഷൻ
ഉയർന്ന വരുമാനമുള്ള, പെൻഷൻ എടുത്തതോ, എടുക്കാൻ ആഗ്രഹിക്കുന്നതോ ആയ അംഗങ്ങളുമായി ബന്ധപ്പെട്ട് പുതിയ നയം പ്രഖ്യാപിച്ചിട്ടുണ്ട്. ഇത് പ്രകാരം എല്ലാ പെൻഷൻകാരുടെയും പെൻഷൻ ഏകീകൃതമായി മാത്രമേ കണക്കാക്കുകയുള്ളു. റിക്കവറി, പേയ്മെന്റ് അരിയർ എന്നിവ വെവ്വേറെയായി പരിഗണിക്കും.